12
Midsawey ni Natan si David
Midsuǥù is Nengazen te ebpeneuven he si Natan diyà te ki David. Hein nekeuma sikandin diyà te ki David, migkaǥi sikandin te, “Duen dezuwa he etew he ed-ubpà te sevaha he inged. Is sevaha ne sepian ne is sevaha ne pubri. Mezakel utew is kerehidu wey vaka zutun te sepian, piru sikan is pubri ne sebsevaha zà is nati he kerehidu zin he pinemasa zin pa. Mid-elimahan din heini, ne midekelà duma te menge anak din. Impekaan din heini te kandin he keenen, ne impeinum din diyà te kandin he vasu, ne edsepsepipiyen din pa. In-iring din heini te anak din he vahi. Sevaha zutun he andew, duen mibpenumbaley zutun te sepian, piru kenà sikandin egkesuat he edlapà te kerehidu wey ke vaka ve para ibpeǥana zin dutun te meǥeliyug din. Iyan din migkuwa haazà is nati he kerehidu zutun te pubri he etew ne iyan din midlapà ne iyan impekaan din dutun te meǥeliyug din.”
Utew nepeuki ni David haazà is etew he sepian ne migkaǥi sikandin diyà te ki Natan te, “Idsaad ku ziyà te uuyag he Nengazen he engayan he edhimetayan is etew he mibaal zutun. Su wazè din kegkehizu zutun te pubri he etew, meupiya ke edliwanan din te heepat haazà is sevaha he kerehidu he nekuwa zin.”
Ne migkeǥiyan ni Natan si David te, “Iyan ka haazà! Iyan heini lalag te Nengazen he Megbevayà te Israel: ‘Mibpilì ku sikew he hadì te Israel ne midlibri ku sikew ziyà te ki Saul. Imbeǥey ku kenikew is ginhedian din wey is menge esawa zin. Midhimu ku sikew he hadì te tivuuk he Israel wey Juda. Ne emun kurang pa heini ne ed-umanan ku pa te mezakel pa. Ne maan is wazè nu tumana is menge lalag ku ne iyan nu maan heini mibeelan is kenè ku igkesuat? Mibpehimetayan nu si Uria he Hitihanen diyà te tebek; mibpehimetayan nu sikandin te menge Amunihanen, ne mid-aǥew nu pa is esawa zin. 10 Umbe, tenged te mibeelan nu, puun guntaan layun duen tebek wey ebpehimetayà diyà te pemilya nu, tenged te midsupak a kenikew ne migkuwa nu is esawa ni Uria.’
11 “Iyan pa heini egkeǥiyen te Nengazen: ‘Duen ebpuun te pemilya nu he edsukul kenikew. Ibeǥey ku is menge esawa nu ziyà te etew he kenè nu selakew, ne ebpekidhulid sikandin kandan minsan duen ebpekaahà. 12 In-eles nu is kenà meupiya he mibeelan nu, piru is ebeelan ku kenikew ne ibpeǥawaǥawa ku mulà.’ ”
13 Ne migkeǥiyan ni David si Natan te, “Nekesalà a te Nengazen.” Midtavak si Natan te, “Mibpesaylu ke en te Nengazen, ne kenè ke zed ebpatey kayi he salà. 14 Piru tenged dutun te mibeelan nu he nekeveǥey te higayun diyà te menge kuntada te Nengazen he egkesumpalit sikandin, siguradu he ebpatey is anak nu.”
15 Hein mid-ulì en si Natan, impezaru te Nengazen is anak ni David diyà te ki Batsheba. 16 Midhangyù si David diyà te Megbevayà para zutun te vatà. Midseled sikandin diyà te ruǥu zin ne mibpuasa ne kada mezukilem ne ziyè dà edlipezeng te saag. 17 Mibeyaan sikandin te menge upisyal zin su ibpeenew zan, piru kenà sikandin ebpemineg, ne kenà daan sikandin egkaan duma kandan.
18 Hein ikepitu en he andew, minatey haazà is batà. Nengahandek haazà is menge suluǥuen ni David he edtazem kandin he minatey en kes batà. Migkaǥi sikandan te, “Ebmenmenuwen tew en be he mekeǥiyi tew te minatey en kes batà? Wazè kiw zin man ganì pemineǥa te kedlelaǥi tew kandin hein uuyag pa haazà is batà, wey pe be ǥuntaan he minatey en haazà is batà. Kela ke zuen mezaat he ebeelan din diyà te lawa zin!”
19 Hein egkaahà ni David he ednenaasnaas haazà is menge suluǥuen din, ne netaǥù diyà te ǥehinawa zin is minatey en bes kes batà. Mid-insà sikandin te, “Minatey en be kes batà?” Midtavak dan te, “Uya.” 20 Ne mid-enew si David, nemeziǥù, midheplasan din is lawa zin te mehemut he lana ne mid-ilis. Ne midhendiyà sikandin te valey te Nengazen ne midsimba. Nekepasad ne mid-ulì sikandin ne mibuyù te keenen, ne migkaan sikandin. 21 Migkeǥiyan sikandin te menge suluǥuen din te, “Kenè dey egkesavut heini is mid-ulaula nu. Hein uuyag pa kes batà, ne wazè ka megkaan is edsineǥew, guntaan te minatey en kes batà, ne mid-enew ka ne migkaan ka!” 22 Midtavak si David te, “Uya, mibpuasa a wey midsineǥew a hein uuyag pa kes batà su iyan egkeisip ku is kela ke mehizuwi e zed te Nengazen ne kenè din ded idtuǥut he mebpatey kes batà. 23 Piru ǥuntaan te minatey en sikandin, maan is ebpuasa e pa? Egkeuyag ku pa be sikandin? Keuzemà ke ebpatey a, ebpekehendiyà a te kandin, piru kenè en mulà sikandin ebpekelikù kayi te kedì.”
24 Dutun ne midlangan ni David is esawa zin he si Batsheba ne mibpehulizè dan. Mibmeǥingey si Batsheba ne mid-anak te maama, ne migngezanan dan sikandin ki Solomon. Mibmahal te Nengazen haazà is batà, 25 ne midsuǥù din is ebpeneuven he si Natan he egngezanan din haazà is batà te Jedidia su mibmahal zin sikandin.
Naaǥew ni David is Raba
(1 Cronica 20:1-3)
26 Midsurung eni Joab is Raba, he iyan kepital te Ammon, ne hapit dan en heini egkaaǥew. 27 Midsuǥù si Joab te menge etew he ibpepenudtul ziyà te ki David he egkaǥi te, “Midsurung dey is Raba ne naaǥew zey is kuweey zan te wahig. 28 Umbe, tiǥuma nu is nengesamà he menge sundaru wey leusa nu en te ed-aǥew haazà is inged para iyan ka egkevantug ne kenà a iyan.”
29 Dutun midtiǥum ni David is langun he nesamà he menge sundaru ne midsurung dan is Raba, ne naaǥew zan heini. 30 Migkuwa ni David is bulawan he inkuruna te ulu te hadì te menge Amunihanen ne insuup te ulu zin. Ne is keveǥat kayi he kuruna ne menge 35 he kilu, ne zuen kayi mahalen he menge vatu. Utew mezakel he menge azen is nengekuwa ni David dutun he inged. 31 Mid-uripen din is menge meǥinged kayi ne impemeterebahu zin he egamit te menge ǥavas, piku, wey wasey. Impevaal zin daan sikandan te menge brik. Iyan heini mibpeveelan din te langun he menge meǥinged diyà te menge inged te menge Amunihanen. Ne mid-ulì si David diyà te Jerusalem wey is langun he menge sundaru zin.