18
Minatey si Absalom
1 Midtiǥum ni David is menge sakup din te tig-1,000 wey tig-100, ne mibpilì sikandin te peremandar he iyan ed-uwit kayi.
2 Ne impehipanew zin sikandan he tetelu he vahin. Si Joab is egalen te sevaha, si Abishai he suled ni Joab is egalen te ikezuwa, ne si Itai he tig-Gat is egalen te iketelu. Migkeǥiyan sikandan ni Hadì David te, “Iyan ad eduma keniyu te kebpekidtebek niw.”
3 Midtavak haazà is menge sakup din te, “Kenè en kinahanglan he meduma ke pa kenami. Su kenè key en idtetenged te menge kuntada ke ebpelaǥuy key, wey edhimetayan dan is ketengà kenami. Iyan dan pa ganì egkesuatan he iyan ke zan mepatey kenà ke iyan heini is tig-10,000 kayi te kenami. Umbe meupiya pa ke kayi ke zà pelintetaǥak te inged ne peuwiti key zà ke hengkey is igketavang nu kenami.”
4 Midtavak si Hadì David te, “Ebeelan ku is meupiya para keniyu.” Ne midhitindeg si Hadì David dutun te uvey te pultahan te inged dutun te kemulu en edliǥawang is langun he menge sakup din he mibahin te tig-1,000 wey tig-100.
5 Midsuǥù ni Hadì David si Joab, si Abishai, wey si Itai te, “Tenged kedì ne kenè niw menuwa is betan-en he si Absalom.” Nezineg haazà te langun he grupu is migkaǥi ni David diyà te menge peremandar zin.
6 Midhipanew is menge sundaru ni David su ebpekidtebek te menge sundaru te Israel, ne ziyà sikandan medtetebek te ketelunan te Efraim.
7 Nezaag is menge sundaru te Israel te menge sundaru ni David. Utew mezakel is nemematey, te haazà he andew 20,000 he etew.
8 Nekeeneb te tivuuk he ketelunan is kedtetebek, ne utew pa mezakel is minatey tenged te kepiligru zutun te ketelunan kenà is nepatey pinaaǥi te ispada.
9 Timpu te tebek, nesinuǥung te menge sakup ni David si Absalom, ne mibpelaǥuy sikandin he ed-untud te kudà. Ne nenursuriyuk diyà te dizalem te merapung he menge subpang te kayu he ulayan, ne nekesanggat is ulu zin dutun te kayu. Ne midlaus en is kudè din mebpelelaǥuy, ne netaǥak en sikandin is nevivitey zutun te kayu.
10 Duen sevaha he sakup ni David he nekaahà dutun ne mibeyaan din si Joab ne migkeǥiyan din te, “Neehè ku si Absalom is nevivitey zutun te kayu he ulayan.”
11 Ne migkeǥiyan ni Joab sikandin te, “Hengkey? Neehè nu sikandin? Maan is wazè nu sikandin himetayi? Emun midhimetayan nu pezem ne edsuhulan ku sikew te sepulù he vuuk he selapì wey vakes he para te upisyal.”
12 Midtavak haazà is etew te, “Minsan ebeǥayan a kenikew te 1,000 he selapì ne kenè ku edhimetayan is anak te hadì. Su nezineg dey is migkaǥi te hadì kenikew, ki Abishai, wey ki Itai, he kenè niw menuwa is betan-en he si Absalom tenged kandin.
13 Emun midhimetayan ku si Absalom ne egketuenan te hadì heini ne kenè e man kenikew edlevanan.”
14 Migkaǥi si Joab te, “Kenà a egkeuǥet kayi te kenikew!” Migkuwa si Joab te vangkew he tetelu ne mibeyaan din si Absalom he nevivitey zutun te kayu he ulayan he uuyag pa. Ne mibpilak din diyà te kumeng si Absalom.
15 Ne is sepulù he tig-uwit te ǥumaan ni Joab, midlingutan dan si Absalom, ne midhimetayan dan.
16 Ne zutun impezaǥing ni Joab is budyung he tuus te ibpeengked en te edlayas is menge sundaru zin te menge sundaru te Israel.
17 Migkuwa zan haaza is lawa ni Absalom ne in-ulug dan te vudsi ziyà te ketelunan ne midtembuan dan te mehabet he menge vatu. Ne nemelaǥuy is langun he menge sundaru te Israel ne mibpemen-ulì dan.
18 Hein uuyag pa si Absalom ne mibpehitindeg sikandin te munyumintu para te keugelingen din diyà te Suǥud te Hadì, su wazè din anak he maama he ebpekeuwit te ngazan din. Migngezanan din haazà te “Munyumintu ni Absalom,” ne iyan ded heini ngazan din taman guntaan.
Midlalew si David te Kebpatey ni Absalom
19 Ne migkeǥiyan ni Ahimaaz he anak ni Zadok si Joab te, “Tuǥuti a te kedhendiyà te ki David su egkeǥiyen ku kandin is kedlibriya kandin te Nengazen puun te ǥehem te menge kuntada zin.”
20 Migkaǥi si Joab te, “Kenà ka iyan edtudtul ziyà te hadì guntaan he andew. Egkehimu ka he ebpenudtul emun duma he andew kenà guntaan, tenged te nepatey is anak te hadì.”
21 Ne migkeǥiyan ni Joab is sevaha he etew he tig-Etiopia te, “Hipanew ke en, ne tudtuli nu si Hadì David te neehè nu.” Ne hein nekepasad he edseludu haazà is etew ziyà te ki Joab, ne mibpelelaǥuy sikandin.
22 Mid-umanan keǥiyi ni Ahimaaz si Joab te, “Minsan hengkey is egkeulaula, tuǥuti a he edsunud a zutun te etew he tig-Etiopia.” Midtavak si Joab te, “Mama, maan is egkesuat ka he edhipanew? Wazà suhul nu keniyan te kebpenudtul nu.”
23 Migkaǥi sikandin te, “Minsan hengkey is egkeulaula ne edhipanew a.” Ne migkeǥiyan ni Joab sikandin te, “Uya, genat ke en!” Ne zutun mibpelelaǥuy si Ahimaaz, ne nememantek dà sikandin diyà te menge suǥud te Jordan, ne nehunaan din pa haazà is etew he tig-Etiopia.
24 Ne zutun te ebpimpinuu si David diyà te teliwazà duen te zezuwa he pultahan he ziyà te ǥawas wey ziyà te seled he vahin te verengbeng he zutun te inged. Nemenahik dutun te verengbeng is tigbantey te inged ne midhithitindeg dutun te atep te pultahan te inged. Ne mibpememantew sikandin, ne zuen neehè din he sevaha he etew he ebpelelaǥuy.
25 Ne mibensaǥan din si David diyà te sihung he zuen etew he ebpekeuma. Migkaǥi si David te, “Emun sevaha zin dà ne duen din buwa uwiten he tudtul.” Ne hein ebpekeuvey-uvey en haazà is etew,
26 ne zuen pa maan naahà dutun te tigbantey he sevaha he etew he ebpelelaǥuy. Migkulahì din is diyà te sihung te zuen pa sevaha he etew he ebpekeuma. Migkaǥi haazà is hadì te, “Duen din buwa uwiten he tudtul.”
27 Migkaǥi haazà is ebantey te, “Is nehuna he ebpelelaǥuy ne henduen te si Ahimaaz he anak ni Zadok.” Migkaǥi haazà is hadì te, “Metazeng heeyan he etew. Duen din buwa meupiya he tudtul.”
28 Hein nekeuma si Ahimaaz, migkemusta zin is hadì ne midluhud he tuus te kedtahud din. Ne migkaǥi sikandin te, “Ereg he edeliǥen is Nengazen he Megbevayè nu, Mahal he Hadì! Su iyan mibeǥey kenikew te kezeeǥan te menge etew he midsukul kenikew.”
29 Mid-insà haazà is hadì te, “Kemuste en si Absalom? Wazè be sikandin memenu?” Midtavak si Ahimaaz te, “Hein impetawag a ni Joab he suluǥuen nu ne neehè ku he egkeǥuliyaved is menge etew piru wazè ku metueni ke hengkey haazà.”
30 Migkaǥi haazà is hadì te, “Keniyan ke zà dèpa.” Ne midhitindeg sikandin diyà te kilid.
31 Netegteǥaad ne nekeuma haazà is tig-Etiopia he egkaǥi te, “Mahal he Hadì, duen meupiya he tudtul ku. Su midluwas ka te Nengazen guntaan he andew te langun he midsukul kenikew.”
32 Mid-insaan sikandin te hadì te, “Kemuste en si Absalom? Wazè ded be sikandin memenu?” Midtavak haazà is etew te, “Berakat he is neulaula kandin ne iyan daan egkeulaula te langun he menge kuntada nu, Mahal he Hadì.”
33 Migkerker si David. Ne nemenahik diyà te ruǥu zin diyà te divavew te pultahan dutun te inged ne midsineǥew. Dutun te kebpemenahik din, ke sikandin te, “He Absalom, anak ku, iyan e en pezem nepatey he elili kenikew. He Absalom, anak ku!”