2
Bahi
1 Henduen a te rusas diyà te Sharon wey henduen a te liryu ziyà te menge suǥud.
Maama
2 Uya, emun ibpetug-iring te zuma he vahi is pinelanggè ku, ne iring sikandin te liryu he nemekar ziyà te teliwazà te zuǥiyen he zezeisey he kayu.
Bahi
3 Emun idhindeg te zuma he vetan-en he menge maama, is minahal ku, ne iring sikandin te mensanas he zuma te menge kayu ziyà te ketelunan. Utew ku ingkesuat is kedhelung diyà te sihung din ne meemis is beǥas din.
4 Midume e zin diyà te kebibuwan su wey maahà te langun ke sengemenu is kebmahala zin kediey.
5 Ipemezesen a keniyu pinaaǥi te pasas wey menge mensanas, su mibmeluya a tenged te kebmahal ku.
6 Ebpeulun a te givang he velad din, ne egkepkep kedì is kewanan.
7 Sikiyu is menge vahi te Jerusalem, penangdù kew pinaaǥi te menge selazeng wey menge gasila he kenè niw ebpukawen is kebmahal zutun te kenè pa hustu he timpu.
8 Nezineg ku is laǥeng te minahal ku. Ebpekeuma sikandin he edlinglingketew ziyà te menge vuntud
9 iring te selazeng. Ahàa niw man, diyà sikandin te gawas is edhithitindeg diyà te kilid te elavat dey is ebpantew kedì diyà te sulawà.
10 Migkaǥi sikandin kayi te kedì te, “Hendini kad is pelanggè ku. Duma ka kedì, is minahal ku he utew mekempet.
11 Netapus en is timpu te meǥenew wey tipenguzan.
12 Nemekar en is menge vulak diyà te menge pemuleey, ne timpu en heini te kegkanta. Egkezineg en diyà te menge pemuleey is laǥeng te menge merepatik.
13 Ebpemeǥas en is menge higus, ne ebmeǥuymuyan en is ebpengevukad he menge paras. Hendini kad is pelanggè ku. Duma ka kedì, is minahal ku he utew mekempet.”
Maama
14 Iring ka te merepatik he ed-eles diyà te vudsi te kelendiǥan. Ipeehè nu kediey is mekempet he zagwey nu wey ipezineg nu kedì is menayù he laǥeng nu.
Menge Bahi ziyà te Jerusalem
15 Agpas kew! Hingutela niw is dezeisey he menge laku he edezaat te menge pemuleey te paras dey he ebpengevukad en.
Bahi
16 Kediey zà is minahal ku, ne kandin e zà. Ibpepenabtab din is menge uyaǥen din diyà te zuen duen menge liryu.
17 Dutun te kenè pa egkeriwaswas wey kenè pa egkaawà is merusirem, ne likù ke en, pelanggè ku. Likù ka he iring keǥaan te selazeng diyà te vuvungan.