13
Edlumpiyuwan is menge Israilihanen te menge Salè Dan
1-2 Migkaǥi pa is Nengazen he Mekeǥeǥehem te, “Dutun he andew ibpetudà is serebseb para te kevuwazan ni David wey te menge meǥinged diyà te Jerusalem, su edlumpiyuwan sikandan tenged te menge salè dan wey kegkeremeriki kandan. Id-awè ku is menge ed-ezapen diyà te tanà he Israel ne kenè en heini egketenuzan. Ibpaawè ku puun te Israel is menge etew he uvag kun ebpeneuven, wey is mezaat he menge mulin-ulin he edumala kandan.
3 Ne emun duen pa uvag ebpeneuven, iyan mismu is amey zin wey iney zin egkaǥi ziyà te kandin he kinahanglan sikandin he edhimetayan, su tarù is migkaǥi zin ne egkeǥiyen din pa he ebpuun haazà diyà te Nengazen. Ne emun edsigudu pa sikandin ne iyan en mismu is amey zin wey iney zin ed-uney edhimatey kandin.
4 Dutun he timpu igkeeled en te menge ebpeneuven is migkaǥi zan he nelewasan dan. Kenè en sikandan ebivisti te bulvulen he visti te ebpeneuven he iyan egemiten dan te kedlimbung.
5 Egkaǥi en hinuun sikandan te, ‘Kenà a ebpeneuven. Perevasuk a, ne iyan heini terebahu ku puun pa te menguhed e pa.’
6 Emun duen ed-insà kandan bahin te menge palì diyà te lawa zan, ne iyan heini tavak dan: ‘Nepelian a ziyà te valey te menge emiǥu ku.’ ”
Ebpatey is Perevantey te menge Kerehidu ne Ebpekedsusuwey is menge Kerehidu Zin
7 Migkaǥi is Nengazen he Mekeǥeǥehem te, “Endama is ispada! Himetayi is perevantey ku te menge kerehidu he suluǥuen ku. Himetayi sikandin su wey mekedsusuwey is menge kerehidu, is egkaayuayu he menge etew ku. Ne edsilutan ku sikandan.
8 Ebehinen te tetelu he vahin is menge etew kayi te tivuuk he tanè he Israel. Ebpatey is dezuwa he vahin.
9 Is egkesamà he iketelu he vahin, ne edlumpiyuwan ku he iring te pelata he edhimuwen he lunsey pinaaǥi te hapuy. Ne egezaman ku sikandan iring te kegezam te kegkelunsey te vulawan he pinaaǥi te hapuy. Ed-ampù dan kayi te kedì ne ebpemineǥen ku sikandan. Egkaǥi a te, ‘Menge etew ku sikandan,’ ne egkaǥi zaan sikandan te, ‘Is Nengazen iyan Megbevayè dey.’ ”