5
Is Nelewasan Mehitenged te Linulun he Belesahan he Midlayang
Midlilingey a ne neehè ku is sevaha he linulun he velesahan he midlayang. Mid-insà is belinsuǥuen kayi te kedì te, “Hengkey is neehè nu?” Midtavak a, “Neehè ku is linulun he velesahan he midlayang, he menge 30 he ǥiek is keleyat din ne menge 15 he ǥiek is keluag din.”
Ne migkaǥi haazà is belinsuǥuen kayi te kedì te, “Nekesurat keniyan te velesahan is rawak he egkehitavù diyà te tivuuk he tanà te Israel. Nekaǥi ziyà te senge vahin he id-awà puun te Israel is langun he menge tekawen, ne nekaǥi ziyà te selakew en he vahin he id-awà daan is langun he ebpenangdù te tarù. Migkaǥi is Nengazen he Mekeǥeǥehem, ‘Ibpaaǥi ku heini he rawak ne edseled heini ziyà te valey te tekawen wey ziyà te valey te nenangdù te tarù he migamit din is ngazan ku. Ne kenà heini egkaawà diyà te kandan taman te egkepurung egkewaǥey is menge valey zan.’ ”
Is Nelewasan Mehitenged te Bahi ziyà te Seled te Revan
Mid-uman mebpaahà sikan is belinsuǥuen he nekidlalag kedì, ne migkaǥi te, “Tengtengi nu ke hengkey heeyan is edhengkayi.” Mid-insà a te, “Hengkey heeyan?” Midtavak sikandin te, “Revan heeyan he para te idtakes. Iyan ibpaalung keniyan is menge salà te menge etew ziyà te tivuuk he tanà te Israel.”
Heeyan is revan duen din tangeb he timeǥà. Ne hein mibpuwas haazà is tangeb, neehè ku he zuen bahi he ebpimpinuu ziyà te seled dutun te revan. Migkaǥi haazà is belinsuǥuen te, “Heini is bahi simbulu te kelelalung.” Ne intekenled din dutun te seled te revan sikan is bahi ne midtengevan din. Ne neehè ku is dezuwa he vahi he edlayang he utew meǥaan. Meluag is menge pakpak dan iring te pakpak te dugwak ne mibitbit dan diyà te zivavew sikan is revan. 10 Ne mid-insà a zuen te velinsuǥuen he nekidlalag kedì te, “Hendei zan ed-uwita sikan is revan?” 11 Midtavak sikandin te, “Ziyà te Babilonia he zutun ebengunen is simbahan he para kayi. Emun egkepasad en is simbahan, ne ibpelastar zutun heeyan is revan su para ed-ezapen.”