18
Babilônia Cidaderî Ataretî'ka
1 Moropai mîrîrî tîpo tiaron inserî autî era'ma'pîuya ka' poi. Mîîkîrî wanî'pî meruntî ke pu'kuru. Moropai mîîkîrî ya'karuya tamî'nawîron ya'karu'ma'pî tamî'nawîrî.
2 Moropai mîîkîrî entaimepîtî'pî meruntî ke pu'kuru.
—Kure'nan Babilônia itese' ataretî'ka pe man!
Tarîpai Makui poitîrîtonon ko'manto'pe eena pe man.
Moropai imakui'pî yekatonyamî' nurakon ko'mamî moro.
Tamî'nawîronkon toronyamî' nurakon
itarumai'san ko'mamî miarî.
3 Maasa pra mîîkîrîya tamî'nawîronkon pemonkonyamî' wo'papîtî'pî,
tîîpia tîwe'sen tenî'sen ke.
Moropai tamî'nawîronkon ipîkkukon pata esanon,
reiyamî'ya imakui'pî kupî'pî yarakkîrî.
Se' tapairî wîri'sanyamî' yarakkîrî to' wanî'pî.
Moropai manni'kan warayo'kon
yemanne ke'kon tîwe'repasanon ena'pî ipîkku pe,
maasa pra tu'kankon wanî'pî imakui'pî iteseru yu'se
—ta'pîiya.
4 Mîrîrîya tiaron mai eta'pîuya ka' poi. Ta'pîiya:
Epa'katî upemonkonoyamî'.
Imakui'pî tînkupî'pîkon wenai
tîwe'taruma'tîsanon kore'tapai
epa'katî sîrîrî cidade poi.
To' pokonpe awe'taruma'tî namai epa'katî.
5 Maasa pra kure'ne imakui'pî ku'sa' to'ya man Paapa winîkîi.
Mîrîrî pî' Paapa enpenatan pî' man,
tîîwanmîra iku'sai'ya pra.
6 Mîrîrî ye'nen mîîkîrî ese'ma e'pai man
inkupî'pî yepe'pî pe.
Tîîse ye'ma e'pai awanî e'mai' pe inkupî'pî kaisarî pra
tîîse itentai asakî'ne ite'ka.
Moropai mîrîrî itenya' manni' yannîpî e'pai awanî mai' ke,
awe'taruma'tîto'pe mararî pra,
tiaronkon taruma'tî tîuya yentai.
7 Mîîkîrî e'taruma'tî moropai esewankono'ma e'pai awanî
e'mai' pe aatausinpa'pî moropai aatapurî'pî warantî.
Maasa pra mîî pe eeseurîmapîtî'pî tîîwarîrî:
—Uurî wanî sîrîrî ipîkkupa' rainha warantî ereutasa' sîrîrî.
Moropai taapîtî'pîiya: —Uurî wanî pepîn inyo isa'manta'pî pe.
E'taruma'tî pepîn tiwin kin
tîîse tîwanmîra uuko'mamî
—taapîtî'pîiya, aatapurî ye'ka pe.
8 Mîrîrî ye'nen tiwin wei tîîse
kure'nan pata ponkon e'taruma'tîto' erepamî pe man.
Moropai kure'nan iwan erepamî,
moropai esewankono'manto' erepamî,
moropai sa'mantanto' erepamî,
inîmîkîiya pra tîîse.
Moropai mîîkîrî yarannîpî apo'ya pe man.
Maasa pra mîîkîrî yenumî Uyepotorîkon Paapaya,
meruntî ke pu'kuru tîwanî ye'nen
ta'pî mai ka' poinonya.
9 Moropai inkamoro ipîkkukon pata esanon reiyamî' yarakkîrî imakui'pî kupîtîponkon, moropai iwenai Paapa piapai atarima'san tiaron yapurîkonpa, inkamoro entaimepîtî pe man mararî pra. Moropai to' karau pe man, apo' awittasa'ya mîîkîrî arannîpî'pî era'ma tîuya'nîkon pî'.
10 Inkamoro ko'mamî pe man aminke iipiapai, maasa pra mîîkîrî e'taruma'tîto' nama tîuya'nîkon ye'nen. Moropai taa to'ya:
—Ane! Ekenne, amîrî wanî ipîkku pe pu'kuru.
Meruntî ke tîwe'sen pe Babilônia cidaderî wanî teuren.
Tîîse tiwin hora kaisarî
ataruma'tîto' ton erepansa' sîrîrî tiwinarî
—taa to'ya.
11 Moropai ipîkkukon yemanne ke'kon sîrîrî pata ponkon nîrî entaimepîtî pe man. To' esewankono'ma mîrîrî wenai. Maasa pra inî'rî anî'ya to' yemanne, to' e'repato', yenna eserîke pra awanî ye'nen.
12 Anî'ya to' ourorî, moropai to' pratarî, moropai tî' epe'ke'kon pu'kuru, moropai pérolas yenna pra awanî ye'nen, to' esewankono'ma pe man. Moropai anî'ya to' kamisarîkon morîkon pu'kuru, kamisa suuyukon, moropai kamisa seeta rekkarukon, moropai kamisa ere'sinkon, moropai to' e'repato'kon yeikon morîkon moropai ikonekapî'sa'kon epe'ke'kon pu'kuru yeikon, moropai bronze moropai sa'man ferro, moropai tu'kan yenna to'ya pra awanî ye'nen to' esewankono'ma.
13 Moropai canela kuya'wari poro to' nîtîrî, moropai yo' wanî wosi, moropai to' nîpo'tî a'pusin, moropai mirra, moropai kara'kon moropai to' wukukon tenî'senkon, moropai kaiwan î' rî puuto'kon, moropai trigo kutupan, moropai trigo yena'pî, moropai to' yekînnon paakayamî', moropai carneiroyamî', moropai kawareyamî', moropai to' tararanikon, moropai to' poitîrîtonon, moropai tiwin kin pemonkon ke to' e'repato' yenna to'ya pra to' wanî ye'nen, to' esewankono'ma.
14 Mîrîrî pî' inkamoro yemanne ke'konya ta'pî mîrîrî ipîkku cidade pî': —Tamî'nawîrî itu'se awanî'pî manni' morîkon itu'se eeseka'nunka'pî, mîrîrî ataretî'kasa' man. Moropai tamî'nawîrî ipîkku pe awe'to' ataretî'kasa' man, ipatîkarî inî'rî eporîya pata pe pra. Tamî'nawîron ourokon yennapîtî'pîya tarîpai inî'rî eporîya pe pra nai.
15 Moropai inkamoro mîrîrî cidade po si'ma ipîkku pe ena'san, inkamoro ko'mamî pe man aminke mîîkîrî e'taruma'tîto' pî', eranne' pe tîwanîkon ye'nen. Inkamoro entaimepîtî pe man moropai to' esewankono'ma mararî pra ipî'.
16 Inkamoroya taa:
—Ane, ekenne amîrî wanî'pî
kure'nan cidade pe ipîkku pe pu'kuru.
Morîkon kamisa ke epontî'pî pe epe'ke'kon ya'.
Moropai kamisa suuyukon ya'
moropai kamisa epe'ke ere'sinkon ya' epontî'pî pe.
Moropai morî pe pu'kuru aatari'ku'tî'pî
ourokon tî'kon epe'ke ke.
Moropai pérolakon ke aatari'ku'tî'pî.
17 Teuren tîîse tiwin hora wanî tanne,
tamî'nawîrî ipîkku pe awe'to' ataretî'kasa' man
—taa to'ya pe man.
Moropai tamî'nawîronkon apo'yen ya' teesenyaka'masanon esanonyamî' moropai tamî'nawîronkon apo'yen ya' tuutîsanon, tuna po teesenyaka'masanon, inkamoro wanî'pî aminke ipî' era'mapî'se.
18 Mîrîrî cidade awittasa' ure'sin era'ma tîuya'nîkon yai, inkamoro entaimepîtî'pî. —Î' pensa sîrîrî ye'ka cidade kaisaron era'masa' pra man —kai'ma to' entaimepîtî'pî.
19 Moropai inkamoroya kutupan yenunpîtî'pî tîpu'paikon pona teesewankono'makon ye'nen. Inkamoro entaimepîtî'pî mararî pra moropai to' karawa'pî.
—Ane, ekenne amîrî kure'nan cidade
o'non pata ipîkku pe pu'kuru anna ena pata'se'.
Anna ena'pî ipîkku pe apo'yen esa' pe,
tamî'nawîrî kure'nan tuna po.
Teuren tîîse tiwin hora wanî tanne,
aataretî'kasa' man tamî'nawîrî.
Inî'rî eesera'ma pepîn
—taapîtî'pî to'ya.
20 Tîîse taatausinpai pu'kuru e'tî
pemonkonyamî' ka' ponkon,
sîrîrî cidade imakui'pî pata'se' ataretî'ka ye'nen.
Taatausinpai pu'kuru e'tî,
Paapa pemonkonoyamî' inaipontî'san
moropai manni'kan imaimu ekareme'nenan profetayamî'.
Maasa pra Paapaya mîrîrî cidade ponkon yenunsa' sîrîrî tarîpai,
awinîkîi'nîkon inkupî'pî wenai.
21 Mîrîrîya tiwin inserî meruntî pu'kuru e'mî'sa'ka'pî kure'nan tî' yarakkîrî tenya'. Moropai mîrîrî tî' yenumî'pîiya kure'nan tuna, pîrana ka. Moropai ta'pîiya:
—Sîrîrî warantî kure'nan Babilônia cidaderî
yenumî to'ya kupî sîrîrî teekore'mai,
inî'rî eesera'ma pe pra man.
22 Mîrîrî yai anî'ya te'nunpasen harpa ye'nunpanen eta pepîn.
Moropai tiaron te'nunpasen to' sinarî ye'nunpa eseta pepîn.
Moropai flauta to' ne'nunpa ye'nunpanen eta pepîn.
Moropai trombeta ye'nunpanen eta pepîn.
Moropai teesenyaka'masanon esera'ma pepîn inî'rî.
Moropai a' pî' teesenyaka'masanon eseta pe pra man.
23 Moropai a'ka ton pra awanî pe man,
a'kuma'tu lamparinha ton pra tiwin kin.
Moropai taatausinpai tîwe'marimasanon maimu eseta pepîn kupî sîrîrî,
maasa pra tamî'nawîrî ataretî'kasa' man.
Maasa pra manni'kan yemanne ke'kon tîwe'repasanon
tamî'nawîronkon yentai esi'san,
inkamoroya tamî'nawîronkon sîrîrî pata ponkon yenku'tî'pî
tetarumukon ke —ta'pî inserîya.
24 Mîrîrî wenai manni' kure'nan Babilônia e'taruma'tî'pî.
Maasa pra mîrîrî cidade po Paapa pemonkonoyamî' taruma'tî'pî to'ya ye'nen,
moropai manni'kan Paapa maimu ekareme'nenan profetayamî' wî'pî to'ya ye'nen,
Paapaya to' taruma'tî'pî.