6
Jisas ile pakekere o el matheong pulua nge ole omaing.
1 Na them um tomo nge a God na them ri engeng a thomu nge ve, thomu o el a God ile themosaling lale, na ilemi simikal lomu vothung kerenga lale, na o mothong tova o lel kimomu nge i.
2 Eneke God ile erere i ri ve,
“Na tho ateal nang areko lale
ako aro tho opoal thomu nge,
mo aro tho el werer thomu nge.
Na nge nang aken,
tho nongpol lomu nongong,
mako tho opoal thomu lale.” Aisaia 49:8
Na God i ri vene, na thomu o nongpol, ponange ol ake God i monsi lale ako aro i opoal ol tokokoere, na ponange mun ake aro i el werer tokokoere.
3 Na them oma vothung kerenga e avele ako aro tokokoere o thopol i mo o lel okime nge lemem omaing ake.
4 Aveto them pathengal tokokoere ako ve, them ini a God ile umonga sivengare nge lemem mimiong alavusnga, nge ur areko rongan them potun i, ranga ve ini matheong na lemi kerereong na kerengaingre,
5 na nge ur areko them el i, ako o so litlit them, na o paeso them a mang a midenga lemi, na toko volingare o vustuno them mo aro o pun rin them, na nge umong engengare ako them el senu nokolkolong nge avele, na them an senu avele.
6 Na ur alavusnga ako them oma i, i riri a God itheki, na lemem lemi rumong i sivenga, na them vol avele, na them oma omaing sivenga a tokokoere nge, na them panes inga Oni Riringa ako i mukalpo lemem, na emem sagu tokokoere,
7 na evelelnga them ri nunganga, na God ile engenging i voth a them nge, na them oma vothung vengvenga mo aro them panongpol senu nge a God ile riong, naro them olal senu riong areko olemi otun them nge.
8 Na them oma inga venen aken tova ve o papomnga them eve oni silal them, na tova o ri sivenga nge them eve o ri kerenga nge them. Na lemem riong i nunganga, aveto toko pelie o rivenga lemem apaltet,
9 na tokokoe pelie olemi mire senu nge tho ako tho ini a Krais ile pakeke nunganga, aveto pelie o atekokol tho, na nge nang pulua them toth re ako aro them rin, aveto rongan them mimi, na tokokoere o paomelal them, aveto o pun rin them avele,
10 na tokokoere o nong sirik lek riong, mako lemik kerere nge, aveto evelelnga lemik sivenga, eneke God i opoal tho, na them ini toko le ur avelengare, aveto them opoal tokokoere mo aro ole ur elonga pom ol ako ro a Pen a Urvet, na lemem ur elonga avele, aveto lemimem i vual nge ur alavusnga ako God i sungu i a them nge. Na them oma venen aken mo i pathengal tokokoere ako ve, them ini a God ile umonga sivengare.
11 Na lek riong areke, ako tho wat i a thomu Korin angare nge, i nunganga, na tho thep opok lale nge thomu nge ur alavusnga ako i voth a lemik.
12 Na ok sagu thomu lale, aveto omu sagu mos tho avele.
13 Na tho ria thomu ranga ve ako thomu ini tutukre ve, aro thomu o thep mun opomu a tho nge, mo aro ar sagu werer ol pel.
Mothong tova paneo tomo nge areko olemio nge a Krais avele.
14 Na thomu o mothong tova o kin lomu riong tomo nge areko olemio nge a Jisas avele, eneke toko vengvenga na toko le vothung kerengare ole lemi rumong i vur e pel avele. Na tokokoe areko o es nge pen lalanga na mideng esngare o pavurvur aro o pathun tomo e pel avele.
15 Na Krais i pavurvur aro ilemi sivenga nge a Satan ile omaing e avele. Na toko lemioongare o pavurvur avele aro o paneo tomo nge tokokoe areko olemio nge a Krais avele.
16 Na God i pavurvur aro isa womalo tokokoere mo o lotual avalare a ile lotuonga a vel, kene avele, na ranga ve mun i ako te pavurvur avele aro te paneo tomo nge tokokoe areko olemio nge ole god ako ini God nunganga avele. Eneke it toko lemioongare it ranga ve ini a God ile lotuonga a vel, eneke Ioni Riringa i voth a lemir. Na i ranga ve ako God i ri nge ve,
“Aro tho voth tomo nge or,
naro tho es tomo nge or,
naro tho velpol ini ole God,
naro or ini lek tokokoere.” Wok Pris 26:12; Jeremaia 32:38; Esekiel 37:27
17 Mako aro thomu o panes a God ile riong ako ile erere i ri nge ve,
“Toko Pomnga i ri vene:
‘Thomu o lo lelpot nge areko olemio a tho nge avele,
na thomu o naktet thomu nge ole vothung,
na o mothong tova o oma vet ole vothung,
na aro ve thomu o oma venen aken,
aro tho elo thomu a tho nge.’ ” Aisaia 52:11
18 Na God ile erere i ri mun ve,
“Aro tho velpol ini omu Vovo,
naro thomu o velpol ini tutukre.
Na Toko Pomnga ako i theal tetal toko alavusnga
i ri re venen aken.” 2 Samuel 7:8,14