28
Ke Kinekevanew ni Hisus
(Marcos 16:1-10; Lucas 24:1-12; Juan 20:1-10)
1 Guna su neipus ke Hewii te Id-imeley ne mehaan en egkepawà te hewii te Akad ne mibpendiyà si Maria Magdalina wey ke senge etew ne Maria su ed-intengan dan ke leveng ni Hisus.
2 Ne ketà ne ruen midtekew ne linug, ne ruen mibpehunrerenà ne suluhuen te Eleteala ne midlilid din ke batu ne inlekeb dut te leveng ne mibpinuuwan din en.
3 Ne ke paras din ne egkinrab iring te kilat, ne mibpeneringsing te keputì te velegkas din.
4 Ne migkerker ini se menge ebantey te kegkeandek dan ne nevidtawan dan iring te minatey en.
5 Ugaid ne migkahi ke suluhuen kayi te menge meritan te, “Kenà kew meandek!” ke sikandin. “Su netuenan ku te ebpemengà kew ki Hisus ke inlansang dan diyà te pinebelavag ne kayu.
6 Ugaid ne warè en kayi su nevanew en iring dut te migkahi rin. Pengkayi kew ne intengi niyu ini se midtehuan dan kandin.
7 Ne pekehaan kew se ed-ipanew ne penudtula niyu riyà te menge edumdumaan din te nevanew en sikandin ne mid-una en sikandin keniyu riyà te Geliliya ne riyà kew ebpemekegkita. Na kenà niyu lipati ini se migkahi ku keniyu.”
8 Arà dà ne migaangaan mid-awà ke menge meritan dut te leveng. Nengeandek dan ugaid ne netehuan dan te dekelà ne kegkehalew ne mibpelelahuy ran se ebpenudtul diyà te menge edumdumaan ni Hisus.
9 Ugaid ne gewii ran te ed-ipanew ne midtekew mibalak si Hisus kandan ne migkahi en te, “Mebmerinew se egketemanan niyu!” Ne mid-uvey ran kandin ne midlumpeng dan se egawed te paa rin te ebpengarap kandin.
10 “Kenà kew meandek!” ke si Hisus. “Beyai niyu ke menge edumdumaan ku ne pependiyana niyu sikandan te Geliliya ne diyan a nikandan egkekita.”
Midselipsipan dut te Menge Mepurù te Terebpelengesa te dekelà ne pirak ke Menge Sundaru ne Mibantey te Leveng ni Hisus apey ran Mekepenudtul te Nepenakew ke Bangkey ni Hisus
11 Ne ketà te kineipanew en dut te menge meritan se ed-awà kayi te leveng, ne mibpendiyan en te Hirusalim ke menge sundaru ne ebantey te leveng su mibpenudtulan dan ke menge mepurù te terebpelengesa te langun ne ned-ulaula kayi.
12 Arà dà ne miburun en dut te menge mepurù te terebpelengesa ke menge pekilukesen te Hudiyanen ne mibpengasak dan ke engkey se ed-ul-ulaan dan. Guna su neupakat dan en ne mibehayan dan te dekelà ne pirak ke menge sundaru
13 ne migkahi ran te, “Penudtula niyu diyà te menge etew te mibpenakew dut te menge edumdumaan ni Hisus ke bangkey rin te merukilem te gewii niyu te nekelipereng.
14 Ne embiya egkerineg ini dut te gubinedur,” ke sikandan, “ne kenà kew egkeuru su sikami rà se ebpetuntey kandin su apey kew kenà ed-isuhata.”
15 Ne midtelimà dut te menge sundaru ini se kureta ne midtuman dan arà se insuhù kandan. Tembù be taman te ini en ne hewii ne ini red ke ebpemenudtulen te menge Hudiyanen.
Mibpekita si Hisus Dut te Sepulù wey Seveka ne Edumdumaan Din
(Marcos 16:14-18; Lucas 24:36-49; Juan 20:19-23; Nenged-ulaula 1:6-8)
16 Ne ini se sepulù wey seveka ne edumdumaan ni Hisus, ne mibpendiyà dan te Geliliya ketà te buvungan ne migkahi ni Hisus kandan.
17 Guna su nekita ran sikandin ne mibpengarap dan kandin, misan duen kandan eduwaruwa se hinawa ran ke si Hisus ini se nekita ran.
18 Ugaid ne mid-uvey si Hisus kandan ne migkahi te, “Langun ne gehem te kebayàbayà diyà te langit wey kayi te ampew te dunya ne imbehey en kediey.”
19 Na, pendiyà kew te langun ne menge etew kayi te ampew te dunya ne penurua niyu sikandan ke memenu se kebpesakup dan kediey. Ne pembunyahi niyu ke menge etew ne ebpesakup kediey te tuus te keduma ran te Eleteala, wey siaken ke Anak din, wey ke Kedesenan ne Ebpetuntul te Menusiyà.
20 Ne penurua niyu sikandan te kedtuman dut te langun ne impenurù ku keniyu. Ne ini se idtahù niyu te hinawa te layun a eduma keniyu taman te taman.