16
Peg-aneng-aneng i Pablo te medita otaw
1 Nayan, iindan ko den kenyo tepad ki Febe. Sikandin se doma tadon egsalig diyà ki Cristo, aw sebad opisyal te simbahan doton te Sengkriya.
2 Aw domateng sikandin doton kenyo, pegsagman kaw kandin tandà te pegsalig din diyà te Pengolo tadon, so yan se keilangan inangen tadon menge sakop te Timanem. Aw doen kelidoan din, pegtabang kaw kandin, so medita se doma otaw tinebangan din, pengkey siaken, tinebangan a din heman.
3 Indani niyo si Priscila aw esawa din si Akilas te eg-aneng-aneng a kandan, so sikandan se egtelaban kanak te pegtoladà ko tepad ki Jesu Cristo.
4 Neketagad dan imetayan amon ketebangan a dan. Egpesiontong a kandan, aw egpesiontong heman kandan se kedita te otaw kenà Judiyo egsimba dini.
5 Indani niyo heman se kedita te otaw egsimba doton te kandan balay te eg-aneng-aneng a kandan.
Indani niyo heman se sigalak ko si Epeneto te eg-aneng-aneng a kandin. Sikandin se tagnà otaw simalig diyà ki Cristo doton te probinsya te Asya.
6 Indani niyo si Maria te eg-aneng-aneng a kandin, so measeb sikandin egtabang kenyo.
7 Indani niyo heman si Andronico aw si Junias te eg-aneng-aneng a kandan. Sikandan se doma ko Judiyo kineleboso doma kanak. Ontò dan nedengeg sogounun i Cristo, aw migpesakop dan diyà ki Cristo te wedà a pa pegpesakop.
8 Indani niyo se sigalak ko diyà te Pengolo tadon si Ampliato te eg-aneng-aneng a kandin.
9 Iling heman kenyan se iindan niyo diyà ki Urbano, so egtelaban sikandin kenami te pegtoladà day tepad ki Cristo, aw si Estakis nedekelan ko heman te pedowan.
10 Indani niyo si Apeles te eg-aneng-aneng a kandin. Egkeseligan sikandin te pegtaking din ki Cristo. Indani niyo heman se pamilya i Aristobulo te eg-aneng-aneng a kandan.
11 Indani niyo se doma ko Judiyo si Herodion te eg-aneng-aneng a kandin. Eg-aneng-aneng a heman te menge otaw diyà te pamilya i Narciso timaking te Pengolo tadon.
12 Eg-aneng-aneng a ki Trifena aw si Trifosa. Measeb dan egtolò te Pengolo tadon. Eg-aneng-aneng a heman ki Persida. Dakel se nebatog din te pegtolò din te Pengolo tadon.
13 Eg-aneng-aneng a heman ki Rufo. Nedengeg sikandin egtaking te Pengolo tadon, aw inay din egkeido kanak iling te ontò inay ko.
14 Eg-aneng-aneng a heman ki Asincrito, si Flegonte, si Hermes, si Patrobas, si Hermas, aw menge doma dan egpemenal.
15 Eg-aneng-aneng a heman ki Filologo, si Julia, si Nereo aw etebay din, aw si Olimpas aw kedita te doma dan menge sakop te Timanem.
16 Pegpeliyagay kaw se kedita niyo egpemenal ki Cristo, so yan se pengilala te egpedekelay kidon te pedowan. Ibeg te kedita te otaw egsimba dini, megpetaga-taga dan kenyo te eg-aneng-aneng dan kenyo.
17 Menge kedowa ko, peg-ahà kaw te menge otaw egbaet te pegsebad te pedowan niyo aw egbaet te pegsalig niyo diyà ki Cristo, so kenà iling kenyan se kebenalan intoladà day kenyo. Ikà niyo egtaking kandan.
18 Kenà dan egtolò te Pengolo tadon si Cristo, meneng egtaking dan te ibeg te kandan pedowan. Pineokit te mèpiya kagi dan, eg-akal dan te menge otaw wedà ketaga-taga te kebenalan.
19 Nedengeg kaw den so egtolò kaw te kebenalan pig-ilingan niyo, aw ontò a neluba kenyan. Ibeg ko ontò kaw megkebiyasa meg-inang te mèpiya, aw wedad toig niyo meg-inang te medaet.
20 Timanem se egpemegay te kelinaw te pedowan, aw sikandin se mekedaeg ki Satanas te eked kenamay amon wedad mebatog din inangen diyà kenyo.
Ibeg ko, tebangan kaw te Pengolo tadon si Jesu Cristo.
21 Si Timoteo doma ko egtoladà, ibeg din metaga-taga kaw te eg-aneng-aneng sikandin kenyo. Iling heman kenyan se ibeg te menge doma ko Judiyo, si Lucio, aw si Jason, aw si Sosipatro.
22 Siaken heman, si Tercio, impesolat i Pablo te solat seini, eg-aneng-aneng a heman kenyo tandà te pegpesakop tadon diyà te Pengolo tadon.
23 Eg-aneng-aneng heman si Gayo kenyo. Impeogpà a din doton te balay din, aw egsimba heman dini te balay din se kedita te otaw te lonsod seini. Se tesorero te lonsod seini si Erasto, aw kedowa tadon heman si Cuarto, eg-aneng-aneng dan heman kenyo.
[
24 Ibeg ko tebangan se kedita niyo te Pengolo tadon si Jesu Cristo. Metoman iyan.]
Iduyun se Timanem
25 Na, iduyun tadon se Timanem. Sikandin olò se mekelobos te pegsalig niyo diyà kandin pineokit te Mèpiya Indan ipegtoladà ko tepad ki Jesu Cristo, aw pineokit te kebenalan nenamay wedà petega-tegahi te Timanem gebii.
26 Meneng yan se kebenalan impetaga-taga den pineokit te insolat te menge telekeliwat te kagi te Timanem gebii. Simogò se Timanem wedad temanan te ipetaga-taga iyan diyà te kedita te otaw amon somalig dan diyà ki Cristo aw tomolò dan heman kandin.
27 Timanem olò se netaga-taga te kedita. Iduyun sikandin te wedad temanan pineokit ki Jesu Cristo. Metoman iyan.