9
Jesús yajtzooc tüg huintzpɨ
1 Hue' anajty Jesús huɨdijtp co ijxy tüg huintz, jadu'n anajty huiintz tɨ yma'xung'aty.
2 Chi ydiscípulos ajcxy y'amɨdoohuɨ:
―Huindzɨn, ¿pɨn pocy ytuun, jada huintzpɨ o ytaj yteedy, co huintz yma'xung'atyɨ?
3 Chi Jesús y'adzooy:
―Ca' yɨ' ypocytuuñ, ni ytaj yteedy, hue' janchtɨy paady ycɨxp jadu'n yjajty, jɨgɨx Dios ymɨc'ajt ñiguëxɨ̈gɨty ma yɨ'.
4 Copɨcy njactúunɨbɨch yɨ' ytung huɨdibɨ tɨ xyquexyɨch ya naaxhuiñ. Miinɨp je xɨɨ tiempo ma ca' pɨn Dios y'ayuc tunaanɨ. Jadu'n nej jɨhuɨ̈y ixyipy je xɨɨmbɨ tɨ ñaxy etz je coodzpɨ tɨ ymiiñ.
5 Jadu'n nej n'ityɨch ya naaxhuiñ nmɨɨdɨch Dios ytɨy'ajt, jadu'n ɨɨch nipaady nej tüg jɨɨn huɨdibɨ codɨɨcxp yɨ naaxhuiñyjäy.
6 Co Jesús jadu'n ymɨnanday, chi nidzujɨɨy naax, chi mo'ntz yaj'oyɨɨy mɨɨd chujnɨɨ, chi jada' yajjaaxɨ je jäy yhuiin mɨɨd je mo'ntz.
7 Chi nɨmay jada':
―Nɨcx quejtzpuj yɨ mo'ntz jɨm ma yɨ Siloé nɨɨ y'abojtzɨ̈gɨty ―je ayuc Siloé jadu'n yhuimbɨdzɨmy: quexyöybɨ.
Chi je jäy huintzpɨ ñɨcxy jɨm, chi oy quejtz pujy je mo'ntz, chi oy huimbity tɨ anajty yhuindɨcxɨ̈gy.
8 Je ymɨjɨɨn ymɨdɨjc ajcxy etz tüg'ócɨy huɨdijaty anajty ajcxy tɨ ixy je huintzpɨ co jabom jabom ɨñäy limosna yajmucy, chi ajcxy ñay'amɨdoohuɨ miñ xyɨpy:
―¿Nej ca' jada yjëjɨty je huintzpɨ huɨdibɨ anajty jabom jabom limosna yajmujcpɨ?
9 Nijëjɨty ajcxy ymɨnañ:
―Je' yɨ'.
E jacjadyii ajcxy ymɨnañ:
―Huingbɨ yɨ', nɨgoob jadu'n yquëxɨ̈gy nej je'.
E je' ymɨnañ cɨ'm:
―Ɨɨch jëdu'n huɨdibɨ anajty huintz.
10 Jadu'n anajty ajcxy tzach'amɨdoy:
―¿Nej yɨ mhuiin tɨ ñay'ahuäcxyii?
11 E je' anajty y'adzooy:
―Yɨ yëydɨjc huɨdibɨ ajcxy ytijyp Jesús, yɨ' mo'ntz yaj'oyɨɨy xyajjaaxɨch nhuiin, e chi xyñɨmaayɨch: “Nɨcx quejtzpuj ma yɨ Siloé nɨɨ.” Chi nnɨcxyɨch, e oy nguejtzpujyɨch, e chi nhuindɨcxɨ'cyɨch.
12 Chi ajcxy je' nɨmay:
―¿Ma je' je yëydɨjc?
Chi je huintzpɨ y'adzooy:
―Ca' nnejhuɨ̈yɨch.
Fariseojäy tɨy'ajt pɨjcy nej je huintzpɨ anajty tɨ chögy
13 Chi ajcxy yajnɨcxy ma fariseojäy ajcxy yhuinduu, je huɨdibɨ anajty huintz yajpatp.
14 Hue' anajty tüg sábado xɨɨ (judíojäy ajcxy amayxɨɨ) co Jesús mo'ntz yaj'oyɨɨy, e yajhuindɨcxɨ̈gy je huintzpɨ.
15 Chi je fariseojäy ajcxy jadüg'oc yajtɨy nej anajty je jäy tɨ yhuindɨcxɨ̈gy. Chi je jäy y'adzooy:
―Mo'ntz tɨ pɨdägy ma ɨɨch nhuiin, chi ɨɨch tɨ nguejtzpujy, e cham n'ijxnɨbɨch.
16 Nijëjɨty fariseojäy ajcxy ymɨnañ:
―Yɨ yëydɨjc huɨdibɨ jada jadu'n tɨ tuñ, ca' yɨ' Dios ytɨy'ajt mɨɨdɨty, com ca' yɨ' amay'aty sábado xɨɨ.
Chi ajcxy jacjadyii y'adzooy:
―¿Nej tijy jada mɨjhuinma'ñ octuñ, pen hue' yɨ' pocyjäy?
Ca' ajcxy nay'ayuc-huinjɨhuɨ́ɨyɨgɨxy.
17 Chi ajcxy jadüg'oc nɨmay je jäy huɨdibɨ anajty tɨ y'ijxɨ̈gy:
―E miich, ¿nej m'ocmɨnambɨ? ¿Pɨn jäy yɨ tɨɨbɨ xyajhuindɨcxɨ̈gy?
Chi je jäy y'adzooy:
―Tüg jäy huɨdibɨ Dios y'ayuc etz ymɨc'ajt mɨɨd.
18 Chi je judío ixpɨcytɨjc ajcxy ca' anajty tɨm mɨbɨgaangɨxy co je yëydɨjc anajty huintz yajpaady, e co anajty tɨ yhuindɨcxɨ̈gy, ixtɨ coonɨ ajcxy ytaj yteedy mɨjhuoohuɨ.
19 Chi ajcxy amɨdoohuɨ ytaj yteedy:
―¿Nej je' jada miich ajcxy m'ung huɨdibɨ huintz ma'xung'ajtɨ? ¿Nej jada tɨ yhuindɨcxɨ̈gy?
20 Chi je' ytaj yteedy ajcxy y'adzooy:
―Ɨɨch ajcxy nnejhuɨɨyb co ɨɨch ajcxy yɨ' n'ung, e co yma'xung'ajty huiintz.
21 Per jadu'n nej cham tɨ yhuindɨcxɨ̈gy, e pɨn yɨ' yhuiin tɨ yajhuäcxyii, ca' ɨɨch ajcxy yɨ' nnejhuɨɨygɨxy. Amɨdoo miich ajcxy yɨ' cɨ'm. Mɨj'anäcɨñ yɨ', ñigapxɨpy yɨ' cɨ'm.
22 Jadu'n ajcxy ytaj yteedy y'adzooy, mɨɨd co ajcxy tzachtzɨgɨɨygɨxy je judío ixpɨcytɨjc ajcxy. Com je judío ixpɨcytɨjc ajcxy tɨ anajty ñaygápxɨgɨxy co anajty yajpɨdzɨmaangɨxy ma ajcxy ñaymujctac je jäy ajcxy pɨnjaty anajty mɨbɨjcp co Jesús anajty yjëjɨty je Cristo.
23 Paady ajcxy ytaj yteedy ymɨnañ:
―Mɨj'anäcɨñ yɨ', amɨdoogɨx miich ajcxy yɨ' cɨ'm.
24 Chi ajcxy y'amɨdooy mɨmejtz'oc je yëydɨjc huɨdibɨ anajty tɨ y'ijxɨ̈gy, e chi ajcxy nɨmay:
―Cömay capxpat yɨ Dios co tɨ mdzögy. Ca' mgömay mgapxpaady je Jesús. Com ɨɨch ajcxy nejhuɨɨyb co yɨ Jesús, tüg yɨ' pocytumbɨ. Ca' yɨ' Dios y'ayuc ytɨy'ajt mɨɨdɨty.
25 Chi je jäy y'adzooy:
―Pen tüg pocytumbɨ yɨ Jesús, ca' nejhuɨ̈yɨch. Huɨdibɨ janchtɨy nnejhuɨɨybɨch, co anajty ɨɨch nhuintzɨty etz co cham huindɨ́cxnɨbɨch.
26 Chi ajcxy y'amɨdooy jadüg'oc:
―¿Nej tɨ xytuñ? ¿Ti tɨ tuñ co tɨ xyaj'ijxɨ̈cɨ yɨ mhuiin?
27 Chi je' y'adzooy:
―Tɨ ajcxy nyajnɨmaaygɨxy, e ca' ajcxy tɨ m'amɨdo'idaangɨxy. ¿Nej nañ ixpɨgaangɨxy miich ajcxy ma yɨ'jɨ?
28 Chi ajcxy je' ojy, nɨmay ajcxy jadu'n:
―Miich ixpɨjc ma yɨ', ɨɨch ajcxy n'ixpɨjcpɨch ma Moisés ytɨy'ajt.
29 Ɨɨch ajcxy nejhuɨɨyb co Dios Moisés mɨgapxy. Janch yɨ Jesús ca' ɨɨch ajcxy nnejhuɨɨygɨxy ma yɨ' chooñ (ma mɨc'ajt tɨ paady).
30 Chi je jäy y'adzooy:
―Ooy yɨ' y'oychɨgɨɨyñɨty y'oyhuinma'ñɨty co miich ajcxy ca' mnejhuɨɨygɨxy ma yɨ' chooñ (ma mɨc'ajt tɨ paady), e tɨ ɨɨch yɨ' xyajhuindɨcxɨ̈gyɨch.
31 Yajxon yajnejhuɨ̈y co Dios ca' yɨ' mɨdoohuɨ pocyjäydɨjc y'ayuc. Pen oy jäy ɨɨch ajt, e nguyduunɨm Dios ytɨy'ajt, huin'it ajt Dios n'ayuc xymɨdoohuɨm.
32 Ni camɨnaaxɨɨ ycayajmɨdoy, co pɨnjäy tüg huintzpɨ tɨ yaj'ijxɨ̈gy huɨdibɨ jadu'n tɨ yma'xung'aty huintz.
33 Co ixyipy je Jesús ca' jiiby chooñ ma Dios, ca' ixyipy jaty nej ti tunɨpy.
34 Huin'it ajcxy y'adzooy:
―Miich jadu'n tɨ mma'xung'aty pocymɨɨd. Ca' miich huaad ti xyaj'ixpɨ́jccɨxyɨch.
E chi ajcxy yajpɨdzɨmy tɨbäy'tüccɨ'yɨ (ma ajcxy ñaymujctac etz ma Dios ytɨjc).
Je jäy ajcxy huɨdibɨ ca' cöbɨjccɨxy Dios ytɨy'ajt jadu'n nipaady ajcxy nej jɨhuɨ̈y huintzɨty
35 Chi Jesús nejhuɨy jadu'n co anajty tɨ yajpɨdzɨmy tɨba'y tüccɨ'yɨ ma Dios ytɨjc. Co mɨnaaybaatɨ chi nɨmay:
―¿Nej mmɨbɨjcyp mɨjpɨdaacyp miich je jäy huɨdibɨ tzoon tzajpjoty?
36 Chi je' y'adzooy:
―Huindzɨn, nɨmaaygɨch pɨn je', jɨgɨx nmɨbɨcyɨch.
37 Chi Jesús je' y'adzooy:
―M'ijxyp yɨ'du'n yam. Yɨ je' je huɨdibɨ xymɨɨdmɨydacp.
38 Chi jada' huingoxtɨnay'ahuɨy ma Jesús yhuinduu, je huintzpɨ huɨdibɨ Jesús tɨ yajtzögy nɨmay:
―Nmɨbɨjcypɨch, huindzɨn.
39 Chi jada' Jesús ymɨnañ:
―Ɨɨch tɨ nmiñ ya naaxhuiñ co n'ixyöyaanɨch nbayöyaanɨch jäy ypocy, jɨgɨx nyajpocycähuɨbɨch pɨn ca' ypocymɨɨdɨty, etz nyajpocyñïhuädzɨbɨch pɨn ypocy mɨɨd. Jadu'n nej jɨhuɨ̈y nyajhuindzɨ̈yɨch je jäy huɨdibɨ ijxp, etz jadu'n nej jɨhuɨ̈y nyajhuindɨcxɨ̈gyɨch yɨ huintzpɨ.
40 Chi nijëjɨty fariseojäy huɨdibɨ anajty jɨm ma Jesús ymɨjc jadu'n mɨdoy nej Jesús ymɨnañ, chi ajcxy nɨmay Jesús:
―¿Nej nañ jadu'n miich mdijy ɨɨch ajcxy ca' Dios ytɨy'ajt nejhuɨɨyɨch, jadu'n nej jɨhuɨ̈y ɨɨch ajcxy nhuintzɨty?
41 Chi Jesús y'adzooy:
―Co ixyipy miich ajcxy janch janch ca' mnejhuɨɨygɨxy Dios ytɨy'ajt, ca' ixyipy ti pocy ajcxy mmɨɨdɨty. Per miich ajcxy mɨnam co Dios ytɨy'ajt mguyduunɨy, e ca' yjanchɨty. Paady ajcxy mbocymɨɨdɨty. Nipaatyp jadu'n nej jɨhuɨ̈y miich ajcxy mhuintzɨty, e mmɨnaangɨxy co m'ijxcɨxy.