5
Je libro etz je Dios y'ung, je Cordero
Chi jada' nhuin'ijxyɨch ma je huɨdibɨ anajty ɨñaayb ma je ane'mdac mɨɨdɨty anajty ma y'a'oygɨ' tüg libro abugucy, yjaayɨty jotjoty'amy etz nïgɨxy'amy, yco'aducyɨty mɨɨd huixtujc sellɨ. Chi nañ jadu'n nhuin'ijxyɨch tüg ángel huɨdibɨ mɨj cötujcɨn mɨɨd, yajtɨy mɨɨd ycapxɨn janch mɨc:
―¿Pɨn jada' janch tudägyɨp co yaj'ahuädzɨp jada libro etz mɨgɨɨdzɨydähuɨpy yɨ ysellɨ?
Ni tzajpjoty, ni naaxhuiñ, ni naaxpa'tcɨ'py ycacá'ɨty pɨn tudägyɨp huɨdibɨ mɨhuaad je libro co yaj'ahuädzɨp, o oy nɨgoodɨ'ajty ja'ixaanɨp. Ɨɨch janch yaaxpɨch mɨɨd tajɨn mayɨn anajty, com ca' anajty yajpaady pɨn je libro mɨhuaad co yaj'ahuädzɨp, o oy nɨgoodɨ'ajty huindɨɨcxɨp. Chi nidüg je mɨjjäy xyñɨmaayɨch:
―Ca' myäxy. Chi je' je mɨc'ajt mɨɨdpɨ ma yɨ judíojäy, je David y'ap y'oc huɨdibɨ nipatp nej tüg ama'ycaa, yɨ' tɨ mɨmadactäy tüg'ócɨy jɨbɨcpɨ. Yɨ' mɨhuaad yɨ libro yaj'ahuädzɨp, etz mɨguejɨydähuɨpy je huixtujcpɨ ysellɨ.
Chi nhuindɨcxpejtyɨch, e agujc'amy ma je ane'mdacɨn, etz agujc'amy ma je mɨdaaxpɨ ɨyujc, etz agujc'amy ma je mɨjjäydɨjc ajcxy, jɨm anajty ytɨnäy je Dios y'ung, je Cordero. Ooy anajty ñiguëxɨ̈gy chaachɨ̈'au nej anajty ayo'n tzaachypɨ tɨ yajnaxy. Ymɨɨd anajty huixtujc ymu'n, e huixtujc yhuiin, je' je' je huixtujcpɨ Dios yjɨhuɨ'ñ ymɨc'ajt huɨdibɨ yquejx huindu'my naaxhuiñ. Chi je Cordero, je Dios y'ung, ninɨcxy je huɨdibɨ anajty ɨñaayb ma je mɨj'ane'mdac, e chi oy cɨychoy je libro huɨdibɨ je mɨj'ane'mbɨ anajty ymɨɨd ma je a'oy'amybɨ ycɨ'. Co je' anajty tɨ cɨychoy je libro, chi je mɨdaaxpɨ ɨyujc etz je iipxmɨdaaxpɨ mɨjjäy ycojxtɨnay'ahuɨyday ajcxy ma je Dios y'ung, je Cordero, yhuinduu. Ymɨɨd anajty ajcxy nidüg nidüg y'arpa etz oorɨ copɨ ujtzɨty mɨɨd poom, je' je' anajty nipaady nej ajcxy chajpcapxy capxy je huɨdibɨ ajcxy mɨbɨjcp Dios. Janch y'ɨɨyb anajty ajcxy ɨy jemybɨ, ymɨnaangɨxy:
Miich mɨhuaad co mgɨyɨ̈gy yɨ libro, e mmɨguejɨydaayɨ je huixtujcpɨ ysellɨ. Com miich tɨ myaj'ögyii, tɨ mgojuy jäy ajcxy ypocy ma Dios mɨɨd mgɨ'mnɨ'py. Tɨ mgojuy ma Dios nidüg'ócɨy jäy ajcxy ypocy, huen huɨdibɨ razɨty, pɨnjaty capx huen huɨdibɨ ayucɨty, pɨnjaty tzomb huen huɨdibɨ cajpɨty huen huɨdibɨ naciónɨty.
10 Miich tɨ xymóoygɨxyɨch ane'mɨn etz je tung mɨjpɨ nej huaad ɨɨch ajcxy n'ojadajtcɨxy nmɨbɨjctzoogɨxy Dios, jɨgɨx jëbɨ ɨɨch ajcxy n'ane'mgɨxy yɨ naaxhuiñyjäy etz n'ojadajtcɨxy nmɨbɨjctzoogɨxy Dios mɨɨd jäy ajcxy ycɨxpɨ.
11 Chi ɨɨch oy nhuin'ixyɨch e nhuinmɨdooyɨch may ángeles ajcxy ycapxɨn ymɨydaacɨn jühuɨdity ma je ane'mdac, ma je ɨyujc ajcxy yajpatcɨxy, etz ma je mɨjjäy ajcxy yajpatcɨxy. E janch canaag millon je ángeles anajty ajcxy. 12 Janch mɨc je' anajty ajcxy chachmɨnaangɨxy:
Je Dios y'ung, je Cordero, je huɨdibɨ öc mɨɨd jäy ajcxy ypocy ycɨxpɨ, yɨ' mɨhuaad paadɨp ane'm'ajtɨn, comeeñ'ajtɨn, ixpɨjcɨn, mɨc'ajt, cömayɨn, oy'ajt mɨj'ajt, etz huin'ɨɨhuɨn huinyaaxɨn.
13 E tüg'ócɨy ɨyujc animal je huɨdijaty Dios tɨ yajcojy tɨ yaj'abadɨ̈y huɨdibɨ jiiby tzajpjoty, etz huɨbɨ ya naaxhuiñ etz naaxpa'tcɨ'py, huɨdibɨ jiiby mejyjoty, nhuinmɨdooyɨch co tüg'ócɨy ajcxy chachmɨnaangɨxy:
Tzoc huin'ɨɨhuɨm tzoc cömayɨm, tzoc mooyɨm oy'ajtɨn etz mɨj'ajtɨn huinɨxɨɨ huinɨtiempo je Dios y'ung, je Cordero, etz je huɨdibɨ ɨñaayb ma je ane'mdaacɨn.
14 Je mɨdaaxpɨ ɨyujc anajty chachmɨnaangɨxy:
―Jadu'n huen tuñyii jadyii. Amén.
Chi nañ jadu'n je iipxmɨdaaxpɨ je mɨjjäy ajcxy ycojxtɨnaygɨdactay, chi ajcxy ooy huindzɨgɨɨy patjɨhuɨɨy je huɨdibɨ huinɨxɨɨ huinɨtiempo tzɨnaayb.