13
Oja Maꞌaravujara Natohwana
1 ꞌEne na emaapuni ira ani aniꞌina ꞌwarame ꞌee ꞌona ojiꞌina puni ira ꞌwaraꞌikaꞌi ea oja pamiꞌipisa na areri maa paꞌanaꞌe rejuꞌu ꞌee tini ata punaꞌi ꞌumene ꞌee kurupate punaꞌi kure kurevuꞌu.
2 ꞌEne na swara kaꞌene poropeti epuni ira ꞌwaravuji apene ꞌee hema mahoꞌo hena kiparane henakaꞌa mahoꞌo heparane ꞌee nimairoa kaꞌene huriꞌa ꞌwarave jahena ruvahuna apeꞌi kaivo ea oja mihujara paꞌanaꞌe reꞌipisa na maa paꞌanaꞌe rejuꞌu.
3 ꞌEne na nuni kukua mahoꞌo ea kaꞌene pivusahuji vajihe ꞌee nuni hahakaho veni aporuꞌavarono miꞌikaꞌi na nihoꞌo ea oja pamihiꞌinaꞌe reꞌipisa ijí uneunecha kajija na paniꞌajihaꞌa.
4 ꞌEne oja mihuni ꞌunamijaho masuanu ajuarane hijujine oja mihuni ꞌunamijaho epunaꞌi mamaaꞌe vejujina kaivo paajiname oja sisea vwihajura. ꞌEne oja mihuni ꞌunamijaho pajarika rene ꞌee kehi kehi vejura.
5 Ea oja mihuni ꞌunamijaho areri parehuni ꞌunamijaho pavenune ꞌee huni ura ijiru pasaramune ꞌee hu maraku paajiviꞌine ꞌee hu siseꞌi ꞌahaujaho ruvuꞌe paꞌarenuna.
6 ꞌEne ꞌunama arira paꞌajaho patemaranuna kaivo nimai jihunaꞌe temaranuna.
7 Ea oja mihunijaho mají vena apene vaꞌuna ꞌee hu uneunecha mahoꞌo mají nimaa vena apene vaꞌuna ꞌee uneunecha kaꞌene ijiꞌa rehunijija nimaa ronuna ꞌee uneunecha aniꞌina vejuri vajijaho hu nihoꞌo kirane hina apene vaꞌuna.
8 Oja mihuni ꞌunamijaho maiji nama apene vaiꞌi nahuna. ꞌEnakaivo swara ꞌahoꞌa poropeti epuni ira ꞌwarahuna kaivo ijija paꞌarehuna. ꞌEne ꞌahoꞌa ꞌira ani ani ꞌwarahuna kaivo ijija paꞌarena vahuna. ꞌEne ꞌahoꞌa henaka kaivo ijija paꞌarehuna.
9 Ijihuni maijaho nú pwina maꞌuaku hena kavara ꞌee nú poropetia puni ira pwina maꞌuaku ꞌwaravu.
10 ꞌEnakaivo vea kaꞌene nimaa nimaijara roujaho nimaa paꞌajaho paꞌarena vahuna.
11 Vea kaꞌene na kasimaa hijuti veijaho kasimaa puni iri ꞌwaravuta ꞌee na sesamaa punaꞌi vwihajute ꞌee sesamaa punaꞌi hene vejuta. ꞌEnakaivo na vea kaꞌene emakina rejujaho kasimaa puni uneunechijija ni irechavume paꞌarejara.
12 Ijihunaꞌe iviamaa nú maneꞌa vaja hami pakasaravu. ꞌEnavo vea kaꞌene roe ura varira kakaraꞌavajiꞌa nú hena kahuna. ꞌEnareje iviamai ijí pwina kwinu nara hejujaho mahoꞌo he parahuna. Areri Hura na hena kima paranu jaꞌinaꞌe hehuna.
13 ꞌEnakaivo ike ꞌunama noꞌopiso ikehipo majama nahuna. Ijija nimairoa ꞌee ijiꞌa túnaꞌi rehuniji nimaa rojujine ꞌee oja mihiꞌinijina. ꞌEnakaivo ikehi puni vajakino nihoꞌo niꞌimaꞌurijaho oja mihunijara asitaha paranana.