1 ꞌEnakaivo na akúpa ꞌee mweꞌa maiuꞌina kavuta. Ijihuni maijaho akúpa mweꞌa sahasijaho sohijiꞌi paꞌare ranamana. 2 ꞌEꞌeme ara natohwa nimaa nimaa kaꞌene Jerusaremi maiuꞌinijaho kahi akúpi ꞌahi Godoni rene ariha roana. Areri ꞌasúra parua ꞌajaꞌiroreꞌe amairiu jaꞌini ariha roana. 3 ꞌEꞌejume na hejume toronu ꞌahi ira ajira ikaꞌina ꞌwaramana. Ike heha! Godoni harai arijaho emaapuni roana. ꞌEnaꞌomo Hu pu puꞌúmo ahuma hije pu Huni ehija reje Godiho oriꞌini pu puꞌúmo hihuna. 4 ꞌEjakame Hura puni nia toa mahoꞌo ukunihuna. ꞌEne kúꞌo pakwamasahuna. ꞌEne kúꞌo temuka apehuna pane niramaruhuna pane hianahuna paꞌana. Ijihuni maijaho uneunecha marako orijija nipaꞌarenana. 5 ꞌEnavo Ea kaꞌene toronu ꞌahi hinajara ikaꞌina ꞌwarimana. Heha! Na uneunecha maiuꞌina mahoꞌo vejuta ꞌwimana ꞌEne Hu kúꞌo ikaꞌina ꞌwarimana. Vuꞌa kaꞌene Nara ꞌwaravukaho nimaa nimaakúne heha ꞌahi veꞌamana ꞌwimana. 6 ꞌEne Hu ikaꞌina ꞌwarimana Niparanana. Na aneja kahene púsa kamena. ꞌEnavo ea irara toa huaꞌamajaho toúja kaꞌene majama hihunijaho paꞌimeꞌeje mamahuna. 7 Ea irara siseaꞌe piunamareje asitaꞌamajaho uneunechakija ꞌekahuna. ꞌEjakame Na huni Godi reje hu Nuni hariha rehuna. 8 ꞌEnakaivo ea kaꞌene juviꞌina panimaa rojiꞌina sisea mamaꞌina vejiꞌina ea ꞌaniu kwamasahiꞌina ꞌuasa vejiꞌina ea masihaviꞌina icha muni godi iraꞌata vejiꞌinijija ꞌee iraꞌasina ea ijaꞌini jihipuni tinijaho vena niꞌimaꞌura marekijiꞌi rejiꞌi nahúna namuji rehuna. Ijaho kúꞌo kwamasahunijina.

9 ꞌEꞌeme Godoni ꞌona ojiꞌina kaꞌene iropu noꞌo tevua iropu noꞌo ꞌekari vajijaho Godoni sena iropu noꞌo ijija ituꞌoꞌuna navajihipuni vaji ꞌona ojiꞌina kwinu ikaꞌina ꞌwarimana. Iki roa kame na Remuijara ꞌasúra kaꞌene ꞌwahuniji najahuma ꞌwimana. 10 Hu na ꞌAveni vaji aherime apenie huriꞌa nihoꞌo niꞌimaꞌura ꞌahi vaꞌana. ꞌEnarena ara natohwa mamaa kaꞌene Jerusaremiho akúpa ꞌahi Godoni rene ariha roana. 11 Ara natohwa kajaho Godoni hanajiꞌini jaꞌina. ꞌEne hura hanamajaho areri muna kaꞌene jasipa moni mapoka ꞌimejuraꞌomo ijipo hanama paraju jaꞌina. 12 Ara natohwa kajihuni verijaho nihoꞌo jojora ichutomaa. ꞌEne vwicha iropu ropu noꞌone ꞌee vwicha kajija ꞌona ojiꞌina iropu ropu noꞌo namijara. Vwicha ꞌaha kaji iha kaꞌene vejajaho Isureri oni harihi puni kachiꞌina iha vejara. 13 Vera kajaho vwicha iropu ropu noꞌuna. ꞌEnaꞌomo noꞌopisu karaꞌine noꞌopisu kahaꞌine noꞌopisu kamaꞌine ꞌee noꞌopisu karoꞌina. 14 Vera kajihuni kutejijaho muna iropu ropu noꞌona. Ijihuni toijaho Remui jihuni apasoru iropu ropu noꞌo puni iha vejara. 15 Godoni ꞌona ojiꞌina kaꞌene na ꞌwarimajara mina vehuni pijuaha kaꞌene korutia vejajino apene ara natohwa kajaho mina vene ꞌee vwicha ꞌee vera mina venana. 16 Ara natohwa kajihuni nupiijaho arearerina. Ara natohwa kaji pijuahi mina venajaho kiromita mapoka mapoka (2,400). Hahuna ꞌee huhuna nupiijaho nikwisuꞌina. 17 ꞌEjumakame Godoni ꞌona ojiꞌina kajara iji vera kaꞌene mina vejajaho emaapuni miniji venana. Vera kajara poma joranajaho mita mapoka (72) renana. 18 Vera kaji vejajaho jasipai vejara. Ara natohwa kajaho korutiru venanaꞌomo maneꞌa punaꞌi hanana paranana. 19 Ara natohwa kajihuni vera kutejijaho muna ani aniꞌina mavarasaꞌini savara. Muna amurijaho jasipa muna pinijaho sapaia muna pinijaho charasitoni muna pinijaho emaroria. 20 Muna pinijaho saratoniki muna pinijaho saratiasi muna pinijaho kurisoraiti muna pinijaho perairu muna pinijaho topasi muna pinijaho kurisoparasi muna pinijaho jesiniti muna pinijaho ametisitina. 21 Vwicha iropu ropu noꞌujaho perua ꞌoiꞌoi iropu ropu noꞌo kaji venana. Vwicha kwinu kwino perua eru venana. Ara natohwa kajihuni ꞌunamijaho korutiru venanaꞌomo maneꞌa epunaꞌi hanana paranana. 22 ꞌEnakaivo Na niriujaho ara natohwa vaja kajaho Temiporu pana. Ijihuni maijaho Godi Niꞌina ꞌee Remuijaho ara natohwa kajihuni Temiporu. 23 Ara natohwa kajaho vea ꞌee masapa ijipo hanahuna pana. Ijihuni maijaho Godoni hanajiꞌinijara veje hanahuna. Ara natohwa kajihuni nahehijaho Remuijina. 24 ꞌEne kwakwa keꞌura ara natohwa kajihuni hanajiꞌinijara hananiꞌeje ohuna. ꞌEje mweꞌa kehuni kinijija puni pinana ꞌeka roe ara natohwa kaji vajahuna. 25 Ara natohwa kajaho naꞌimujaho paꞌajihuni hahi veiriꞌa rena navakame vwicha pakuhuna. 26 ꞌEjakame pu kwaa ara mapoka kehipuni pinana ꞌee mamaijaho ꞌeka roe ara natohwa kaji vajahuna. 27 ꞌEnavo uneunecha chiha rukina ea sisesa ea iraꞌasina ijija ara natohwa kajihuni vwichijaho pavaꞌe aruhuna. ꞌEnakaivo ea irahuni iha Remui jihuni puka kaꞌene majama hihuniji naꞌamajara pupusu ijí ara natohwa vaja kajaho vaꞌa aruhuna.