1 ጫሪንጮ ኔኤኒ ዳርዚ ኬዴቴ ዓይጎ፤ ዹካ ኔ ቤርታ ዓጊፄቴ ዓይጎ፤ 2 ሻርሻ ታሚዳ ዔኤቲ ዋኣሢ ፔንቲሳሢጉዲ ኔኤኮ ሱንፃ ሞርኮም ዔርታንዳጉዲ ኬዴ፤ ካኣታኣ ኔ ቤርታ ጎጋይቃንዳጉዲ ማዼ። 3 ሃያኮ ቤርታ ኔኤኒ ሙኪ ኑኡኒ ማሊባኣ ባኣዚ ሚርጌና ዒጊቻያ ማዔ ባኮ ማዼ ዎዶና ዹካ ኔና ዛጊ ዒጊቹሞና ዓጊፄኔ። 4 ሚናፓ ዓርቃዖ ኔና ጉሙርቃ ዜርፆም ዬያ ቢያ ዲቃሣ ዓኮ ባኮ ማዼ ፆኦሲ ኔ ጊዳፓ ዓቴም ሜሌ ዋይዚንቲባኣሴ፤ ጴዺያ ጴዺባኣሴ። + 5 ኔኤኮ ጎይፆ ማሊ ጶቂሢ ኔ ማሊፆ ዎዛና ማዺ ኩንሣዞንሢ ኔኤኒ ማኣዳኔ፤ ኔ ማሊፆፓ ዻቢንቲ ኬዞ ኑኡኒ ዓርቄ ዎዶና ኔኤኒ ኑና ጎሬኔ፤ ዓካሪ ኑኡኒ ዎዲ ዻቃኒ ዳንዳዓንዳይ? 6 ኑኡኒ ቢያሢ ጎሜና ዒኢቴኔ፥ ፂሉማኣ ኑኡኮ ኪንቄ ቱርጫጉዲ ማዔኔ፤ ኑኡኮ ጎሞ ሚርጉማፓ ዔቄያና ዢባሬ ዲኢኒሻ ዒላሺጉዲ ኑ ማዔኔ። 7 ኔኤኒ ማኣዳንዳጉዲ ኔና ሺኢቃ ዓሲ ባኣሴ፤ ኔኤም ጉሙርቂንታያ ማዓኒ ማላያኣ ባኣሴ፤ ዬያሮ ዓኣፖ ካሮ ኑኡፓ ኔኤኒ ሺርሼኔ፥ ኑ ጎሞሮዋ ኑና ኔ ሃሼኔ።

8 ያዺ ማዔያታቴያ ናንጊና ናንጋ ጎዳሢዮ! ኔኤኒ ኑኡኮ ዓዶኬ፤ ኑኡኒ ዢኢጮ ዓጮ ማዓዛ ኔ ኑና ማዣሢኬ፤ ኑና ቢያሢ ኔ ኩጫ ማዤያኬ። 9 ናንጊና ናንጋ ጎዳሢዮ! ኔኤኒ ዑሣ ዓኣዼ ዻጋዺፖ፤ ኑኡኮ ጎሞዋ ናንጊና ዓርቂ ዴዒፖ፤ ኑኡኒ ቢያሢ ኔ ዴሬ ማዔሢ ማሌ። 10 ኔኤኮ ዱማዼ ካታማ ዓሲ ናንጉዋ ዳውሌ ማዔኔ፤ ፂዮኔያ ዒማጉዲ፥ ጊንሣ ሃሣ ዬሩሳላሜያ ፔጌ ማዔኔ። 11 ኑኡኮ ቤርታ ዓዶንሢ ኔና ጋላቴ፥ ዱማዼያና ቦንቺንቴ ጌኤዦ ማኣራ ኑኡኮ ታሚና ሚቺንቴኔ፤ ሚዛጲ ማዒ ዓኣ ቤዛኣ ቢያ ኑኡኮ ዶዒ ባይቄኔ። 12 ናንጊና ናንጋ ጎዳሢዮ! ዬይ ቢያ ማዓዛ ኔ ኑ ባንሢ ሺሩዋዓዳ? ኔኤኒ ዚቲዮ ጌዒ ዑሣ ዓኣዼ ሜቶይዳ ኑና ጌጌልዛ?