7
1 ዒማና ቂርያትይዓሪሜ ዓሳ ሙኪ ናንጊና ናንጋ ጎዳኮ ጫኣቁሞ ሳኣፂኖ ዔኪ ጌሜራዻ ዓጫ ናንጋ፥ ዓቢናዳኣቤ ጎዖ ዓሲስኬያ ማኣሪ ጌልዜኔ፤ ዒኢካ ዔያታ ናንጊና ናንጋ ጎዳኮ ጫኣቁሞ ሳኣፂኖ ካፓንዳጉዲ ዒዛኮ ናኣዚ ዓላዜሬ ዬያም ዱማሲ ዶኦሬኔ።
ሳሙዔኤሌ ዒስራዔኤሌ ዓሶኮ ሱኡጌ ማዔሢ
2 ዬካፓ ፆኦሲኮ ጫኣቁሞ ሳኣፂና ዖዶሲ ዎዴ ቂርያትይዓሪሜይዳ ዴዔኔ፤ ዒኢካ ዴዔሢ ላማታሚ ሌዔ ጉዴያኬ፤ ዒማና ዒስራዔኤሌ ዓሳ ናንጊና ናንጋ ጎዳ ዔያቶ ማኣዳንዳጉዲ ዒዛ ባንሢ ዒላቴኔ።
3 ሳሙዔኤሌ ዒስራዔኤሌ ዴሮም፦ «ጉቤ ዒናፓ ናንጊና ናንጋ ጎዳ ባንሢ ዒንሢ ማዓኒ ኮዔቴ ሜሌ ፆኦዞ ቢያ፤ ባሼና ዓስታሮቴ ጌይንታ ላኣሊ ማሎና ማዢንቴ ፆኦዜሎ ባይዙዋቴ፤ ዒንሡሞ ጉቤ ናንጊና ናንጋ ጎዳም ዒንጊ ዒዛ ሌሊ ካኣሽኩዋቴ፤ ዒዚ ፒሊስፄኤሜ ዓሶ ኩጫፓ ዒንሢ ዓውሳንዳኔ» ጌዔኔ።
4 ዬያሮ ዒስራዔኤሌ ዓሳ ባዓኣሌና ዓስታሮቴና ጌይንታ ፆኦዞ ባይዚ፥ ናንጊና ናንጋ ጎዳ ሌሊ ካኣሽኬኔ።
5 ዬካፓ ሳሙዔኤሌ፦ «ታኣኒ ዒንሢም ናንጊና ናንጋ ጎዳ ሚፂጳይዳ ሺኢቃንዳሢሮ ዒኢካ ቡኩዋቴ» ጌይ ዒስራዔኤሌ ዓሶ ጉቤ ዔኤሌኔ።
6 ዬያሮ ዔያታ ፔቱሞና ሚፂጳይዳ ቡኬኔ፤ ዒኢካ ዔያታ ዋኣሢ ዱይ ዔኪ ፆኦሲም ዒንጎ ባኣዚ ማሂ ላኣሊ ዬኖ ኬሎ ጉቤ ዔኤቢ ሙዋዖ ፔኤቄኔ፤ ዒማና ዔያታ፦ «ኑኡኒ ናንጊና ናንጋ ጎዳም ዋይዞ ዒፂ ዻቤኔ» ጌይ ዻቢንቶ ፔኤኮ ቡኡፄኔ፤ ዒስራዔኤሌ ዓሶ ባኣካ ማዢንታ ሞኦቶ ማዔቴያ ሜሌ ሜሌ ጌኤሲ ሳሙዔኤሌ ጌስቲ ዎጋሢ ዬኖ ሚፂጳይዳኬ።
7 ዒማና ዒስራዔኤሌ ዓሳ ሚፂጳይዳ ቡኬሢ ፒሊስፄኤሜ ዓሳ ዋይዛዖ ዶንጎ ፒሊስፄኤሜ ካኣታ ዔያቶ ዖላኒ ፔኤኮ ዖላ ዓሶ ዔኪ ኬስኬኔ፤ ዬያ ዒስራዔኤሌ ዓሳ ዋይዛዖ ዒጊጪ፦
8 ሳሙዔኤሌም፥ «ፒሊስፄኤሜ ዓሶ ኩጫፓ ኑና ዒ ዓውሳንዳጉዲ ናንጊጊና ናንጋ ጎዳ ማዔ ኑ ፆኦዛሢ ሺኢቂፆ ኑም ሃሺፖ» ጌዔኔ።
9 ዬያሮ ሳሙዔኤሌ ጉኡጲባኣ ዻካ ማራናይ ሹኪ ጉቤና ሚቺ ዒንጎ ዒንጊሢ ማሂ ናንጊና ናንጋ ጎዳም ሺኢሼኔ፤ ዬካፓ ዒስራዔኤሌ ዓሶ ዛሎ ናንጊና ናንጋ ጎዳ ዒ ሺኢቃዛ ሺኢጲፆ ዒዛኮ ዒዚ ዋይዜኔ፤
10 ሳሙዔኤሌ ሚቺ ዒንጎ ባኮ ናንጊና ናንጋ ጎዳም ዒንጋ ጎይሣ ዓኣንቴ ፒሊስፄኤሜ ዓሳ ዒስራዔኤሌ ዓሶ ዖላኒ ሙኬኔ፤ ጋዓንቴ ዒማ ኬሎ ናንጊና ናንጋ ጎዳ ጫሪንጫፓ ዼኤፒ ጉጉንሢ ጉጉንሤም ፒሊስፄኤሜ ዓሳ ዒጊጪ ጎጋይቂ ዒስራዔኤሌ ዓሶ ቤርታፓ ጳሽኬኔ።
11 ዬያሮ ዒስራዔኤሌ ዓሳ ሚፂጳፓ ዔቂ ዔያቶኮ ቤርታፓ ጳሽኬ ፒሊስፄኤሜ ዓሶ ዴንዲ ቤትካራ ጌይንታ ቤዞኮ ዴሞ ሄላንዳኣና ዳውሲ ዳውሲ ጎይፃ ዔያቶ ዎዼኔ።
12 ዒማና ሳሙዔኤሌ ፔቴ ሹቺ ዔኪ ሚፂጳና ሼኔ ጌይንታ ቤዞኮ ባኣካ ዻኣቢ፦ «ናንጊና ናንጋ ጎዳ ሃኖ ሄላንዳኣና ኑና ማኣዴኔ» ጋዓኒ ዬኖ ሹጮ «ዓቤንዔዜሬ» ጌይ ሱንሢ ጌሤኔ።
13 ዬያይዲ ፒሊስፄኤሜ ዓሳ ዖሎና ባሺንቴኔ፤ ሳሙዔኤሌ ናንጌ ዎዶ ቢያይዳ ናንጊና ናንጋ ጎዳ ዒስራዔኤሌ ዓሶና ዎላ ማዔሢሮ ፒሊስፄኤሜ ዓሳ ዒስራዔኤሌ ዓሶ ዖላኒ ኬስኪባኣሴ።
14 ዬያኮ ቤርታ ፒሊስፄኤሜ ዓሳ ዖሎና ባሺ ዓርቄ፥ ዔቅሮኔና ጋቴናኮ ባኣካ ዓኣ ካታማ ቢያ ዒስራዔኤሌ ዓሶም ማሂንቴኔ፤ ሃሣ ዒስራዔኤሌ ዓሳ ፔኤኮ ዛጶ ዓኣ ካሮና ቢያ ማሂ ዔኬኔ፤ ዬያሮ ዒስራዔኤሌ ዓሶና ዓሞራ ዓሶና ዎላ ጊኢጊ ናንጌኔ።
15 ሳሙዔኤሌ ናንጌ ዎዶይዳ ቢያ ዒስራዔኤሌ ዓሶኮ ሱኡጌ ማዒ ናንጌኔ።
16 ዒዚ ሌዓ ሌዓ ቤኤቴኤሌንታ ጌልጌላንታ ሚፂጳኣ ዓኣዺ ዓኣዺ ዒስራዔኤሌ ዓሶ ባኣካ ማዢንታ ጌኤዞ ጌስቲ ዎጋኔ።
17 ዬካፓ ዒዚ ናንጋ ራኣማ ማዒ ዴንዲ ዴንዲ ዒኢካ ዓኣ ጌኤዞዋ ዛጋኔ፤ ራኣማይዳ ናንጊና ናንጋ ጎዳም ዒንጎ ባኣዚ ዒንጎ ቤሲያ ዒ ኮሼኔ።