3
ቄኤሶ ሱኡጋሢ ዛሎ ፆኦሲ ዛካሪያሴም ፔጋሲ ዻዌ ባኮ
1 ዬካፓ ቄኤሶ ሱጋሢ፥ ዒያሱ ፆኦሲ ኪኢታንቻሢኮ ቤርታ ዔቂ ዓኣያ ናንጊና ናንጋ ጎዳ ታኣም ፔጋሲ ዻዌኔ፤ ዒማና ፃላሄ ዒያሱ ካሳሳኒ ዒዛኮ ሚዛቆ ዛላ ዔቂ ዓኣኔ።
2 ፆኦሲኮ ኪኢታንቻሢ ፃላሄ ኮይላ፦ «ሃይ ኔ ፃላሄ! ናንጊና ናንጋ ጎዳ ኔና ጎሮም! ዬሩሳላሜ ፔኤሮ ማሂ ዶኦሬ፥ ናንጊና ናንጋ ጎዳሢ ኔና ጎሮም! ሃይ ዓሢ ታሚ ጋውሌንቴ ባሺ ዓቲ ዓኣ ሚሢታሢ ኔ ዛጉዋይ» ጌዔኔ።
3 ዒያሱ ኪንቄ ዓፒላ ማኣዒ ፆኦሲ ኪኢታንቻሢ ቤርታ ዔቂ ዓኣኔ።
4 ፆኦሲኮ ኪኢታንቻሢ ዒዛም ዓይሢንቲ ማዻ ሃንጎ ኪኢታንቾ፦ «ዬያ ኪንቄ ማኣዓሢ ዒዛ ዑፃፓ ሺኢሹዋቴ!» ጌይ ዓይሤኔ፤ ዒማና ሃሣ ዒዚ ዒያሱ ባንሢ ሺራዖ፦ «ጎሞ ታ ኔኤኮ ኔጊዳፓ ሺኢሼኔ፤ ቃራ ኮሺ ማኣዖ ታ ኔና ማይሳንዳኔ» ጌዔኔ።
5 ዛካሪያሴ ዒማና፦ «ቶኦካኣ ዒዛኮ ጌኤሺ ዓፒላ ማሩዋቴራ» ጌዔኔ፤ ዔያታኣ ዓይሢንቴ ጎይፆማ ማዼኔ፤ ዒያሱ ዒማካ ዔቂ ዓኣ ጎይሣ ዓኣንቴ ፆኦሲኮ ኪኢታንቻ ዓኪ ማኣዖ ዒዛ ማይሴኔ።
6 ዒማና ፆኦሲ ኪኢታንቻሢ ዒያሱም፦
7 «ቢያ ባኮ ዎይሣ ጎዳሢ ሂዚ ጋዓኔ፤ ኔ ሃንታ ሃንቲፃ ታ ጋዓ ጎይፆጉዲ ማዔቴ፥ ታ ኔና ዓይሤ ባኮ ቢያ ኔ ማዺ ኩንሤቴ፥ ታኣኮ ጌኤዦ ማኣሮ ኔ ቢታንቶና ኔ ዎይሣንዳጉዲ፤ ታኣኮ ዴራ ቡካ ጶኦኮይዳኣ ዼኤፑሞ ቢታንቶ ታ ኔኤም ዒንጋንዳኔ፤ ሃይካ ሃሢ ዔቂ ዓኣ ፆኦሲ ኪኢታንቾና ዎላ ኔ ማዻያ ታ ኔና ማሃንዳኔ።
8 ቄኤሶ ሱኡጋሦ፥ ዒያሱ! ዋይዜ፤ ዒንሢያኣ ዒዛና ዎላ ቄኤሴ ማዒ ማዻያ፥ ጊንሣ ሃሣ ሃጊ ሴካ ማዓንዳ ባኮኮ ማላታ ማዒ ዓኣ ዓሳ ሃያ ታ ጋዓሢ ዋይዙዋቴ፤ ‹ሚሢ ካኣፒ› ጌይንታ ታ ዓይላሢ ሃጊ ታኣኒ ዳካንዳኔ።
9 ሃኣዛጉዋቴ፥ ታኣኒ ላንካይ ዓኣፒ ዓኣ ፔቴ ሹቺ ዒያሱ ቤርታ ጌሣንዳኔ፤ ዬይ ዎዚ ጌይሢታቴያ ዒኢካ ታኣኒ ቆኦቂ ፃኣፓንዳኔ፤ ሃኖ ዓጮኮ ጎሞ ፔቴ ኬሊና ታኣኒ ሺኢሺ፥ ጌኤሻንዳኔ።
10 ዬኖ ኬሎና ዒንሢ ፔቴ ፔቴሢ ዎይኖና ቤሌሶ ሚፆና ዴማ ዴዒ ዒንሢኮ ዓሺኖ ዔኤሊ ሙይ ዑሽኪ ዑሽኪ ዎዛዻንዳኔ።» ጋዓኔ ቢያ ባኮ ዎይሣ ጎዳሢ።