10
1 Angmʉn! Na nga numan ei ndi, pilip kʉn, Isrel wamp kʉⱡ Got ndi, etpa tangga nʉmp atinga rʉk rʉk rondʉr.
2 Got nga mbi pangga nʉk, uⱡ mbʉ ombil pendʉk etmin. Wote, uⱡ mat pilik kun iti natʉk etmin ila, na kandʉp kʉn, para ndup nʉt.
3 Got ndi, wamp etpa kun kai mondrum nombuⱡa mam ei, pep rui narʉk, en enim nga uⱡ ronduⱡ ila, uⱡ mat etamina kʉn, Got ndi, etpa kun kai mondʉmba nʉk pʉtmʉn.
4 Mi ik petʉm mbʉ, Kraist ndi, pep ropa pora ndurum. Ei nga, wamp nam ti ndi, Kraist kʉn mondpa pilim ei, Got ndi, kun kai nimba.
Got Ndi Wamp Pora Etʉp Rukʉr Timp Nitim
5 Mi ik pep rok, Got kʉn kun kai muⱡing uⱡ ei nga, Moses ndi, mon ropa nimba mel,
“Wamp nam ti ndi, mi ik mbʉ pora, pilpa pep rom ndam, kont mba moⱡmba,” nitim.
6 Wote, wamp nam ti mondpa pili uⱡ ila moⱡnga, Got ndi, etpa kun kai mondrum wamp ei ndi, nimba mel,
“Nim ninim nga numa ei ndi, ik ei mel ni nʉni! Wamp nam ti, muⱡ kona oⱡa mba?
(Kraist mepa mana urum.)
7 Muna,
“Wamp nam ti, wamp kui kona ila mana mba?
(Kraist ropa rut ndupa mepa wangga tʉn tʉpa rapʉndʉmba nda?)
Nʉtʉn ik ei, ko tʉkʉn pili nʉpili ku,” ” nʉtʉm.
8 Uⱡ ei nga, Buk Wingti ei ndi, nimba mel, “Ei ik kʉⱡ, int enim kʉn, nondpa telinga, mundmong ila pilik, keta ila nʉk ekit ndurmin,” nʉtʉm. Got nga ik mong kʉⱡ, tʉn mbun pilpʉn kʉn, enim kundʉp nʉtmʉn.
9 Ei nga, nim nga keta ila, Jisas wu Nuim nʉkʉn, wote nim nga mundmong ila, Got ndi, Jisas ni, on kona ila, ropa rʉt ndurum, nʉkʉn mondkʉn pin ndam, nim etpa tʉmba.
10 Wote, tʉn nga mundmong ila mondʉp pʉtmʉn ei kʉn, Got ndi, tʉn kun kai nʉtʉm. Wote keta ila, Jisas nga para ndupʉn nʉtmʉn ei kʉn, tʉn etpa tʉtʉm.
11 Uⱡ ei nga, Buk Wingti ila, nimba mel,
“Wamp nam ti, elim mondpa pilpa moⱡum ti, pipil kuⱡi naⱡʉmba,” nʉtʉm.
12 Ei kʉn, Got ndi, wamp mbʉ pora, to tenda ila kandrʉm. Jura wamp na, wamp rʉⱡaip elpa na mbʉ, tʉpa tenda etpa, Jisas Nuim rak ndupa ei morum. Wamp nam ti, elim mbi tek angʉndʉk nʉng wamp mbʉ, memp pendʉmba.
13 Buk Wingti ei ndi, nimba mel,
“Wamp nam ti, Oⱡa Nuim ei nga mbi tepa angʉndpa, nim wamp ti, etpa tʉmba,” nʉtʉm.
14 Wote, elim mondʉk pili napiling ndam, namba etʉk, mbi tek angʉndʉk ning? Wote, elim nga ik ei pili napiling ndam, namba etʉk mondʉk piling? Wote, elim nga ik ei, ni nanʉng ndam, namba etʉk kum tek piling?
15 Nombuⱡa rung wu mat, tʉk mundi namʉndʉⱡina ndam, Rʉnang Ik Kai ei nilingina, mel nant? Buk Wingti ei ndi nimba mel,
“Rʉnang Ik Kai nʉk nguing onmʉn, wu kʉⱡ kʉmp nengina noⱡnga, uⱡ kai ti etʉk onmʉn!” nʉtmʉn.
16 Wote wamp mbʉ, Rʉnang Ik Kai ei, pilik ti natʉtʉng. Ei nga, painui wu Aisaiya ndi, nimba mel,
“Nuim ye! Wamp nam ti ndi, na nga ik nʉmp ngur ei pilpa titim?” nitim.
17 Wote ni kʉn, nombuⱡa rung ik ei, Kraist nga ik nʉndʉtmʉn ila ekit orum. Ei nga, Got nga ik mong ei, pilingina kʉn, mondpa pili uⱡ ei oⱡa orum.
18 Wote na ndi, ik waldʉp nʉnt ei, ik ei, enim Jura wamp kʉⱡ, kupa pili napʉtmʉn ei? Ei mon. Pʉtmin ei ka! Buk Wingti ei ndi, nimba mel,
“Got nga ik ei, kona mbila pora purum. Ik ei mba, mʉi kʉmp mbila, tepa kapⱡa inditim,” nitim.
19 Aldpa, na waldʉp, nʉmp mel, “Isrel wamp mbʉ, ik ei kupa pili napʉtmʉn ei?” Moses elim ndi, ik ei nga punt ropa nimba mel,
“Na ndi, wamp roldʉnga mat ruk tamba, enim wamp mbʉ kʉn wʉlʉk ruing. Na ndi, wamp numan kun pi nʉpi mat, rukʉr tamba, enim popuⱡ kuⱡing,” nitim.
20 Wote, Buk Wingti ila Painui wu Aisaiya ndi, ronduⱡ mundpa, nimba mel,
“Na kuri nakʉrʉrʉng wamp kat ndi, na kandʉk tʉtʉng, Na wuldi nawʉldʉtʉng wamp mbʉ kʉn, mot nga ur,” nitim.
21 Wote, Isrel wamp mbʉ nga nimba mel,
“Wote, ui roⱡ etʉp na nga ki ei run ndup wamp kʉⱡ, etʉp timp nʉmp elimba. Wote wamp mbʉ, ik tʉk roi nduk, ik kit nʉk etʉng,” nitim.