6
Kindmant Wamp Mbʉ Nga Ik
Kindmant wamp mbʉ ndi pora, en enim nga wu ou mbʉ, tʉk ou nduk, wu kai nangina, wote wamp ekit orunga mbʉ ndi, Got kʉn kep, wote tʉn nga ik mbo endʉtmʉn ik nimbʉ, nʉk kit mundi nʉmʉndeing. Mondpa pili wu ou ti nga, kongun kindmant wu mbʉ, en enim nga wu ou mbʉ, minal tʉk ou ndʉi! Wu ʉngʉn ti nʉk, ik tʉk roi ndui nʉndʉi! Nambuⱡ emel, kongun endʉtmin mondpa pili wamp kʉⱡ, en enim ndi, numan nguk kongun ronduⱡ mundʉk endʉtmin. Uⱡ etmin ei ndi, mondpa pili wamp ou kʉⱡ, minal tʉk rapʉndʉrmʉn. Timoti nim ndi, ik kupa mbʉ mbo endkʉn, wamp mbʉ pep ring nʉkʉn, ndoimp rundi!
Kandpa Kum Pindi Uⱡ
3-4 Wamp nam ti, Got nga ik puⱡ elpa mat mbo endpa, tʉn nga Nuim Jisas Kraist nga ik kupa ei kʉn, tʉn Got kʉn mbi paka rormʉn uⱡ kʉⱡ wak ropa, ik elpa mat mbo endʉm ndam, wamp ni nga rukʉr orunga mondpa pili ila mel ti, ti natʉtʉm. Wote ik puⱡ ti kep, pili napʉtʉm ku. Wamp ei, numan kit pendpa, ik puⱡ mbʉ nga ropa akpa nimba etʉm. I etʉm uⱡ ei ndi, wʉlʉk rui uⱡ, ik kit ni uⱡ, ik mbuldung orunga nindi uⱡ ik ropa mondpa ni uⱡ mbʉ nga puⱡ pendpa, numan ila pʉtʉm. 5-6 Wote, wu mat numan kit morum mbʉ ndi, ik kupa ei wak rormʉn. Wamp i etpa mbʉ ndi pilik kʉn, Got kʉn atinga rui uⱡ ei, kng mel mbʉ ting, nombuⱡa mam ti nʉk pʉtmʉn. Mondpa pili wamp ti, elim tep mor mel mbʉ, manda nimba pʉtʉm ni, Got nga uⱡ kai mbʉ, wamp ei kʉn tepa kapⱡa endʉtʉm. Tʉn ya mʉi kona ila uimin etpʉn mel ti, mepʉn ui nʉwʉrmʉn. Ni mel ku, wote tʉn ya mʉi kona wak ropʉn mbin etpʉn, mel ti mepʉn pi nʉpʉmʉn. Wote, nim rʉng na, wal pʉki na mat tekʉn mun ndam, ei nim nga to ila manda. Wamp ti mel ou ndupa, timp nimba pilpa etʉm wamp ni, Seitan nga oⱡa tʉpa kʉni uⱡ mbila, mana mba, kandpa kum pendpa anduⱡnga, elim nga moⱡpa kundi orunga, kit moⱡnga wamp ei, elim kit morum. 10 Ku moni kandpa kum pindi uⱡ ei, uⱡ kit mbʉ nga puⱡ pilkan ei. Wamp mat, ku moni nga kum pendʉk, en enim nga mondpa pili uⱡ ei, wak rok, kitim mindil tʉk, tiki polk andurmin.
Pol Ndi, Timoti Man Ngurum
11 Nim Got nga kindmant wu ei kandkʉn, uⱡ mbʉ kildi kulkʉn. Wote, uⱡ kun kai, uⱡ eng nui na, mondpa pili na, wamp numan ngui uⱡ na, numan ronduⱡ pili uⱡ na omba, wote numan wang ndui uⱡ kʉⱡ, ronduⱡ mundkʉn iti! 12 Nim nga mondpa pili el ruin ei, ronduⱡ mondkʉn el rui, wote uⱡ nga kʉnt nga kont mul uⱡ ei, timp nʉkʉn pilkʉn el rui! Got ndi, nim kont mul uⱡ ei, ngumba pilpa kʉn, nim wi ropa tilinga, wamp nga mou ila, nim nga uⱡ kit mbʉ nʉkʉn ekit ndurun. 13-14 Got mel mbʉ pora, etpa peng kont tʉtʉm Puⱡ Wu ei kʉn, wote Kraist Jisas elim nga mondpa pili ei, wu Pontas Pailot ei nimba ngurum. Ei mel, wu raⱡ nga kuimp keta ila, na nim kʉn man ngump nʉnt ei, ‘Nim ndi, Got nga mi ik kʉⱡ wamp mbʉ ndi, nʉk kit munding ei nga, tʉk mendkʉn pep rokʉn moⱡana, Nuim Jisas Kraist yant omba ui ei, kandkʉn tʉn.’ 15-16 Jisas omba ui ei, Got elim to ropa pendpa morum. Wu Got ei, wamp ambʉⱡpa puⱡ uⱡ mbʉ nga Puⱡ Wu. Nuim mumuk mormun mbʉ nga Nuim Mumuk Oⱡa orunga ei, omba wu nuim mbʉ nga Nuim ei. Mel mbʉ nga pora Rʉp Wu ei, ronduⱡ elim kont moⱡpa mint purum. Ei nga, tʉn akup kont mormun ui ila wamp ti, rʉⱡang ila morum kona ila, kapⱡa rukʉr pi napʉmba. Wamp ti ndi, elim kʉni nʉkʉndrʉm. Wote, akil tep, kʉni nʉkʉning ku. Nuim Got ei mint, mbi ou tangga, uⱡ nga kʉnt nga ronduⱡ tepa mint pangga! Ei kupa! 17 Mel ou nduk tek mormin wamp mbʉ kundkʉn, enim nga kʉng orunga, mek oⱡa pi napʉk, en enim nga mondpa pili uⱡ ei, mel pora nimba mbʉ kʉn ti natʉk, Got kʉn mendpʉⱡ pilik nokundʉk muⱡeing ni! Got wu mel pi ei ndi, numan kai pendpa, tʉn mel minal nguⱡnga, tepʉn moⱡpʉn, ambuⱡpʉn paⱡpʉn muⱡeimin nimba etʉm. 18 Wamp mbʉ kundkʉn, uⱡ kai mbʉ iteing ni! Uⱡ kai mbʉ nga mel piyangga nʉkʉn, molk kai mondʉk, en enim nga mel tetmin mbʉ, numan kai pendʉk, mok rok iteing ni! 19 Uⱡ ei mel eng ndam, mel kai mat, wote ui tila tʉpa rapʉndʉmba ei nga, tʉk mou rok muⱡing. Ei, uⱡ nga kʉnt nga rʉk rʉk kont mul uⱡ kupa ei ting. 20 Timoti, Got ndi, nim kongun ngurum ei, ronduⱡ mundkʉn rʉp iti! Ik kit na, wote ik mat, ik kol rok, “ik pilpa kungʉndi kai” nʉk enmin mbʉ, tʉkʉn mbuⱡ ngukʉn iti! Ik mbʉ, Got nga el rui ik mbʉ.
21 Wamp mat, ya ik pilpa kungʉndi kai ei, tep mor nʉk pilik, en enim nga mondpa pili ei, wak rormin. Got nga wamp poⱡ ti uⱡ ei, nim kʉn kan piyangga!