12
Deo Ega Spiritu Ega Ipeni
1 Aau akiu Kristiano papiaumi, pau auga oi emi maleleai Deo ega Spiritu ega ipeni fouga opaꞌaniaina auga fouga maamiai alaifania. Deo ega Spiritu ega ipeni kapaꞌina auga afolologo auga lapamafua puo, fouga maamiai alaifania.
2 Oi ologo, oi Kristiano alomia alogai, deo pifogeꞌi akeniniꞌani, ke ainaꞌi efua auꞌi oi maami kelaꞌa meꞌe keaga iꞌoiꞌi iꞌoiꞌiai opea.
3 Ega kainai oi lapainimi, aufalao agaꞌo Deo ega Spiritu alogai eagu auga, iina afaeifa oma afaeinaka, “Deo Iesu afa apala gapenia,” afaeoma. Ke kai agaꞌo iina afaeifa oma afaeinaka, “Iesu Lopia,” afaeoma kai, Deo ega Spiritu isa alogai ageagu aisama kai, “Iesu Lopia,” ageoma.
4 Kai Deo ega Spiritu ega ipeni auga iꞌoina iꞌoina kai, Spiritu agaꞌomo mo ipeni egaꞌina maꞌoai epipeni.
5 Ke Lopia ega pinauga iꞌoina iꞌoina akapa kai, Lopia agaꞌomo mo ega pinauga akapa.
6 Ke papiau pinauga iꞌoiꞌi maꞌo kekapaꞌi kai, Deo agaꞌomo mo, isa egaꞌina pinauga fekekapa fekaina auga logo epeniꞌi kekapaꞌi.
7 Ke Deo ega Spiritu papiau agaꞌo agaꞌo aloꞌiai eague auꞌi, eꞌi pinaugai papiau agaꞌo agaꞌo kepalagainiꞌi. Ega koa kekapa aisama, Deo ega Spiritu isa aloꞌiai eague auga efoki.
8 Egaꞌina auga pau inamoꞌe alaifaniꞌi. Deo ega Spiritu papiau isaꞌi auga, ipeni agaꞌo epeniꞌi Deo ega ikifa niniꞌaniꞌi keifaniꞌi. Ke Deo ega Spiritu egaꞌina mo papiau isaꞌi ipeni epeniꞌi, Deo ega logo fouga keifafoua.
9 Ke Deo ega Spiritu egaꞌina mo, papiau eꞌi pakoꞌa akaikiꞌa femia auga ipenina epeniꞌi, ega koa isa Deo kepakoꞌania. Ke Deo ega Spiritu egaꞌina mo, papiau isaꞌi, isafa papiauꞌi fekepafeloꞌi auga ipenina epeniꞌi papiau kepafeloꞌi.
10 Ke Deo ega Spiritu egaꞌina mo papiau isaꞌi mirakulo isapuꞌi fekekapaꞌi auga ipenina epeniꞌi mirakulo kekapaꞌi. Ke Deo ega Spiritu egaꞌina mo papiau isaꞌi profeta koa fekemia Deo ega iifa fekeifafoua auga ipenina epeniꞌi. Ke Deo ega Spiritu egaꞌina mo papiau isaꞌi spiritu kapa felo o apala auga fekelogo ipenina epeniꞌi kelogo. Ke Spiritu egaꞌina mo papiauꞌi isaꞌi mala iꞌoina kai agaꞌo aelogo auga malagai fekemegamega ipenina epeniꞌi. Ke Spiritu egaꞌina mo, mala egaꞌina kapaꞌina eifania auga fekeau pagainia ipenina papiau isaꞌi epeniꞌi.
11 Deo ega Spiritu agaꞌomo egaꞌina auga, iꞌina pinaugaꞌi maꞌoai ekapaꞌi. Ke Spiritu anina eani papiau kapa ipeni kapa gapenia eoma auga mo epenia.
12 Ke Deo ega Spiritu ega koa ekapa, gome iꞌa papiau aumauni imaauꞌa auga agaꞌomo kai, imaauꞌaisai kapa maꞌo mo kekae. Ke imaauꞌaisai kapa maꞌo kekae mo ganinagai, egaꞌina kapaꞌi maꞌoai kemai imaauꞌa agaꞌomo kepamia. Ega koa iꞌopoga Kristo imaauga isafa ega koa.
13 Gome iꞌa Iudea auꞌa ma, Grik auꞌa ma, kalaꞌafi, o aagu aage mo ifoꞌa aꞌa pinauga akapa ma ganinagai, Spiritu agaꞌomogai iꞌa maꞌoai baptismo aafiia. Ke imaauꞌa agaꞌomo koa iꞌopoga, iꞌa maꞌoai Iesu fou agaꞌomo amia. Egaꞌina auga Deo ega Spiritu agaꞌomo mo iꞌa maꞌoai ega ipeni epeniꞌa ainu koa iꞌopoga, aloꞌaisai eague.
14 Koꞌa ipauma imaauꞌa auga agaꞌomo ekae kai, kapa agaꞌomo imaauꞌa aepagama kai, kapa maꞌo kemai imaauꞌa kepagama.
15 Ega kainai ifeꞌa afeifa, “Lau papiau ima laaꞌi puo, lau papiau imaauga faagagai laaꞌi,” ageoma mo ganinagai, isa egaꞌina eifania puo, isa papiau imaauga faagagai laaꞌi afaemia kai, egae mo ageka.
16 Ke ainaꞌa afeifa, “Lau papiau maaga laaꞌi puo, lau papiau imaauga faagagai laaꞌi,” ageoma mo ganinagai, isa egaꞌina eifania puo, isa papiau imaauga faagagai laaꞌi afaemia kai, egae mo ageka.
17 Kai iꞌa imaauꞌa fofouga maaꞌa mo gamia koa aisama, papiau ainaꞌi ala falogo oma? Ke imaauꞌa fofouga ainaꞌa mo gamia koa aisama, kapa fogaꞌi ala falogo omaꞌi?
18 Kai iifa gome, Deo iꞌa imaauꞌaisai kapaꞌa maꞌoai isa anina eani koa iꞌopoga, aua aua afuꞌiai eogeiꞌi.
19 Kai kapaꞌa maꞌoai iꞌoiꞌi fakemia kai, kapa agaꞌomo kegamia koa aisama, imaauꞌa auga kapai feka?
20 Kai pau auga, kapaꞌa maꞌoai iꞌoina iꞌoina mo ganinagai, maꞌoai kemai imaauꞌa agaꞌomogai keꞌafai imaauꞌa agaꞌomo emia.
21 Ega puo iꞌa maaꞌa imaꞌa afaepaina afaeinaka, “Lau ifou mo laague ekainia puo, oi animu alaani,” afaeoma. Ke kaniaꞌa ifeꞌa afaepaina afaeinaka, “Lau ifou mo laague ekainia puo, oi animu alaani,” afaeoma.
22 Kai imaauꞌaisai faagaꞌa kapaꞌi eꞌeleꞌi keapoke auꞌi mo ganinagai, imaauꞌaisai afakeka koa aisama, kapa agaꞌo agakapa felo afaekaina.
23 Ke imaauꞌaisai faagaꞌa isaꞌi, iisaꞌi aefelo alogaina mo ganinagai, iꞌa faagaꞌa egaꞌina auꞌi kapa akaikiꞌaꞌi koa iꞌopoꞌi apamiaꞌi aꞌima lopianiꞌi. Ke aopolaga imaauꞌaisai faagaꞌa isaꞌi, kai agaꞌo faeisa aoma auꞌi, tiapu feloꞌi aiꞌiukaiꞌi apakaisapu felo alogainiꞌi.
24 Kai imaauꞌaisai faagaꞌa iisaꞌi feloꞌi ipaumaꞌi auga ega alaꞌima omaꞌi. Kai faagaꞌa isaꞌi kapa eꞌeleꞌi koa apamiaꞌi auꞌi mo ganinagai, Deo faagaꞌa egaꞌina auꞌi kapa akaikiꞌaꞌi epamiaꞌi, imaauꞌaisai eoge felo alogainiꞌi kainai, faagaꞌa egaꞌina auꞌi aꞌima feloꞌi, apalopianiꞌi.
25 Deo ega koa ekapaisa, ega koa imaauꞌaisai faagaꞌa ifoꞌi mo epoꞌiai fakeꞌeaꞌi kai, maꞌoai agaꞌo agaꞌo fekepalagainiꞌi eoma.
26 Ega koa emia, faagaꞌa agaꞌo ekiekie aisama, faagaꞌa fofouga isafa isa fou kekiekie. Ke aufalao agaꞌo faaga agaꞌo kapa akaikiꞌa koa epamia eꞌima felo epalopiania aisama, imaauga fofouga faaga egaꞌina fou kaiꞌialao aloꞌi egama.
27 Ke oi auga Kristo imaauga, ke oi agaꞌo agaꞌo auga Kristo ima ife, ke faaga fofouga omia.
28 Ke iifi eꞌa alogai auga, Deo apostolo auꞌi ekina kakauꞌi. Isa muniꞌiai auga profeta auꞌi ekinaniꞌi. Profeta auꞌi muniꞌiai auga, pamalele auꞌi ekinaniꞌi. Pamalele auꞌi muniꞌiai auga mirakulo fekekapa auꞌi, ke isafa papiauꞌi fekepafeloꞌi ipenina keafia auꞌi, ke papiau fekepalagainiꞌi auꞌi, ke Deo ega iifi eꞌa pinauga fekepapea ipenina keafia auꞌi ekinaniꞌi. Ke fuagai auga, mala iꞌoina papiau akelogo auga malagai Deo fekemegamega penia auga ipenina keafia auꞌi ekinaniꞌi.
29 Kai Deo iꞌina papiauꞌi ekinaniꞌi auꞌi maꞌoai apostolo ma? Ke isa maꞌoai profeta ma? Ke isa maꞌoai pamalele auꞌi ma? Ke isa maꞌoai mirakulo kekapa ma?
30 Ke isa maꞌoai isafa papiauꞌi fekepafeloꞌi auga ipenina keafiia ma? Ke isa maꞌoai mala iꞌoina papiau akelogo auga malagai Deo kemegamega penia ma? Ke isa maꞌoai papiau mala iꞌoinagai kemegamega auga, keau pagainia ma? Laaꞌi! Isa maꞌoai iifi eꞌa alogai, aua aua eꞌi ipeni keafia kepinauga.
31 Kai oi auga guami fofouga ipeni kapa akaikiꞌa auga eegai fooge.
Alomi Koꞌagai Deo Ke Papiau Fou Aniꞌi Foani
Ke pau Deo ega Spiritu ega ipeni ala fopapinauga oma auga keagaga felo ipauma inamoꞌe alapakinaimi.