12
Deo Kapaꞌina Fakapa Eoma Auga Mo Fakapa Faefuafua
1 Ega puo iꞌa ifoꞌa mo alaagu kai, egaꞌina papiauꞌi kemae mo ganinagai, apuapu akaikiꞌa koa iꞌopoga kemia keailofeiꞌa keisaꞌa. Ke pau egaꞌina papiauꞌi fouꞌi Deo ega iifa pukagai akuapina aisama, kapaꞌina akapa auga kepafokiꞌa keifafouiꞌa. Ega kainai laomai apalaꞌi faagaꞌaisai kekae auꞌi meauꞌi maꞌoai apaelaiꞌi. Ke laomai apalaꞌi fiakoa mo maaꞌa kelaꞌa meꞌe auꞌi isafa apuaꞌafuniꞌi. Ke kapaꞌina akemia mo ganinagai, aꞌa pakoꞌa Iesu eegai faafiapia mo, Deo iꞌa fauꞌaisai pipalauai kapaꞌina faafia eoma auga faula.
2 Iesu auga iꞌa aꞌa pakoꞌa inagome, ke Deo maagai aloꞌa opaina ipauma fepamiaiꞌa auga. Kai Deo ega logoai muni alogama feafia eoma puogai, kolotiai emae kiekiega auga eafiapia mo, ke meagaina aepaꞌaua. Ke isa Deo eaguagu afuga kaina kainai eague. Ega kainai iꞌa aꞌa pakoꞌa Iesu mo eegai faoge.
3 Ke laomai apalaꞌi kekapa auꞌi isa keumakalaina kainai, ega ekiekie oma kai eafiapia auga foopolaga. Ega koa oi Iesu muninai opea auga foloafipuguaina, foloapoke foloapakipo.
4 Kai papiau laomai apalaꞌi kekapa auꞌi oi Iesu fomunia, isa fou laomai apalaꞌi fokapaꞌi keoma. Kai oi isa ainaꞌi aloafia kainai keafi apalanimi. Kai oi founiaimoimo laomai apalaꞌi egaꞌina foumakalainiꞌi felao faagamiai ifa agaꞌo feake fomae auga aekainia.
5-6 Ke Deo ega iifa pukagai oi eifanimi gauga epamiaimi, magogo kapula epeniimi auga oꞌagege efua. Deo iina eifa oma:
“Lau Lopia kaisau aniꞌi laani alogaina auꞌi, lapaikifaniꞌi keaga felogai lapapeaꞌi.
Ke Lau kaisau gau lapamiaꞌi auꞌi eꞌi laomai apala afa lapeniꞌi.
Ega puo gauagai, Lau lapaikifanio keaga felogai lapapeaiso auga, kapa eꞌele folopamia.
Ke Lau oi alafinaiso aisama, Lau muniuai pea auga foloapokeaina foloapakipo,”
eoma. Proverbs 3:11-12
7 Au kapa auga gauga aepaikifania keaga felogai aepapea? Au maꞌoai mo gauꞌi kepaikifaniꞌi. Ega koa iꞌopoga, Deo oi auga Isa gauga epamiaimi. Ega kainai Deo epaikifanimi keaga felogai epapeaimi auga alomafuga folopaꞌaua foafiapia mo.
8 Iꞌa alogo papiau maꞌoai ega kepaikifa omaꞌi, keaga felogai kepapeaꞌi. Ega kainai oi afakepaikifanimi keaga felogai afakepapeaimi koa aisama, oi inami amami agaꞌo akegome, piakele kalufa imoimi koa iꞌopomi.
9-10 Ke iꞌa alogo, inaꞌa amaꞌa kepamauniꞌa auꞌi, kepaikifaniꞌa keaga felogai kepapeaiꞌa. Egaꞌina kekapaisa alogai, kapaꞌina keopolaga felo keoma auga mo, iꞌa faagaꞌaisai kekapaisa kai epo aemaefa. Ega mo ganinagai, iꞌa isa apalopianiꞌi ainaꞌi aafiia. Kai Deo auga iꞌa Isa koa iꞌopoga, aloꞌa opaina femia eoma puo, iꞌa epaikifaniꞌa keaga felogai epapeaiꞌa. Ke Amaꞌa Deo auga, papiau maꞌoai lalauꞌi iꞌima inagome, iꞌa amaꞌa kepamauniꞌa auꞌi ekaꞌegainiꞌi. Ega kainai iꞌa auga Amaꞌa Deo aina faafi kapulania, ega koa agaagu aoniamo.
11 Kai papiau maꞌoai kepaikifaniꞌi keaga felogai kepapeaꞌi alogai, papiau aloꞌi aegama kai kiekie mo kepaꞌaua. Kai muni kemaleleaina efua aisama, egaꞌina ikifagai isa aloꞌiai Deo ega gagao euki, ke anina eoge auga Deo maagai alo opaina emia.
12 Kai papiau isaꞌi keafi apalaniꞌi alogai, faagaꞌi keapoke alogaina, imaꞌi kemua, ke kiuꞌi keaꞌafu koa iꞌopoga puo, keapakipo Iesu muninai akepea. Kai oi auga egaꞌina papiauꞌi fopakapulaniꞌi Iesu muninai fekepea.
13 Ke oi emi laomaisai, Iesu muninai opea auga fopaꞌopaina foloapakipo. Ega koa keapoke melo auꞌi koa kemia auꞌi, keaga iꞌoꞌinagai fakepea kai, fekekapula pugu keaga felogai mo fekepea.
14 Ke oi Deo maagai alomi afaelolofa koa aisama, Lopia Deo agoisa afaekaina. Ega kainai Deo maagai alo lolofa agugai foagu, ke alomi koꞌagai papiau maꞌoai isafa fou gagaoai foagu.
15 Egaꞌina alogai foisa felo kai agaꞌo ega laomaisai, Deo ega gafegafe eegai faeafiꞌafu. Ke au euki anina eoge kai epiꞌigu aisama, papiau eeꞌiai apala emia. Ega koa iꞌopoga, papiau agaꞌo alogai apala ageka aisama, laomai egaꞌina ageuki papiau ageꞌaugainiꞌi agepalifuꞌi. Ega puo foisa felo oi epomiai kai agaꞌo ega koa faekapa.
16-17 Ufainagai Aisak gauga faꞌaniauga Esau, ama au faꞌaniau kapaꞌina agepenia eoma auga feafia koa iꞌopoga kai, inaega ekimu aniani mo puogai Deo gefa aeaunia aina aeafia, Deo isa kapaꞌina fepenia eoma auga akina imagai eꞌafaꞌafalaina. Kai Esau muniai eopopagai, Deo kapaꞌina au faꞌaniauꞌi apuꞌi eoma auga feafimue pugu eoma. Ega puo maisapepega mo keaga agaꞌo ekapunia, ama opo gaafimue, kapaꞌina isa apuga eoma auga gapenimue eoma. Kai ama eumaka. Egaꞌina auga fouga ologo felo. Ega kainai foisa felo, aagoai kapa agaꞌo anina oani puo Deo kapaꞌina agepenimi eoma auga, Esau koa iꞌopoga folomia foloꞌafaꞌafalaina. Ke Deo folomunia, aagoa kapaꞌi apalaꞌi ipaumaꞌi auꞌi muniꞌiai folopea.
18-21 Ufainagai Deo eake Sinai ikugai eagu. Egaꞌina alogai oi ufumi apami Israel papiauꞌi kelao iku eegai keagu. Egae lo eaga, umina akaikiꞌa ipauma iku egaꞌina eumiapua, ke lanina akaikiꞌa isafa epua auga keisa. Ega aisama kemaniꞌi alogaina, ke isa Deo eagu ikuga eega ipauma akelao, ke akeafi opogaina. Ke fiꞌi keipinia aꞌo akaikiꞌa ipauma, ke iifa aꞌoꞌi isafa kemai aꞌoꞌi kelogonia. Ega aisama Deo isa eifa kapula penia einaka, “Papiau agaꞌo, ke aꞌo mo ganinagai, iku Lau laagu afuga ageafi opogaina auga kepoai fofoupugua,” eoma. Ega puo Deo ega iifa aꞌoꞌi kelogonia auꞌi maꞌoai, Deo kegoinia faeniniꞌani pugu keoma. Gome isa Deo kapaꞌina eifania auga fekeafia fekeaguaina auga aekainiꞌi. Ke papiau ega koa emia auga keisa kemaniꞌi alogaina puo, Moses eifa einaka, “Lau lamaniꞌi lapigugu alogaina,” eoma. Kai pau oi auga, Deo eega agolao aisama, ega koa faagamiai afaemia.
22 Oi auga Iesu opakoꞌania puogai, Sion ikuga eega olao. Sion ikugai Ierusaleme taonina ufai ekaega auga eapae, ke Deo egae eague aoniamo. Ke agelo isafa ealogai alogaina egaꞌina taoninai kekaigugu kealogama.
23 Ke Deo kepakoꞌa kakaua auꞌi, Deo gauga faꞌaniauꞌi kemia, ke akaꞌi ufai kepapua ekaega. Isa egaꞌina taoninai kekaigugu keague. Ke Deo papiau maꞌoai eꞌi laomai felo o apala afa agepeniꞌi auga, ufai Isa kepakoꞌania auꞌi aloꞌi opaina epamia. Ke pau oi isa eeꞌi olao.
24 Ke ufainagai Kaino Apele eaupugua ifa elolo auga Deo afa eogemue. Kai Iesu auga, Deo papiau eꞌi laomai apalaꞌi feꞌagegeainiꞌi eoma puogai emae. Ega kainai Iesu auga, Deo iꞌa fou epoꞌaisai gagao ekokoaina, pakoꞌa niniꞌanina mamaga ekapaisa. Ega puo isa ifa elolo auga kapa akaikiꞌa ipauma, Apele ifa ekaꞌegaina. Oi auga Iesu egaꞌina eega olao.
25 Ufainagai Moses aagoai eagu aisama, Deo ega iifa papiau maaꞌiai eifania. Ke papiau isa aina keumakalaina auꞌi, Deo isa eꞌi laomai apala afa agepeniꞌi auga eegai akepiau koko, maꞌoai keafi afeꞌaina. Ke pau Deo ufai eague auga, Iesu eulaisa ainaꞌa epalogo. Kai iꞌa Deo agaumakalaina agamunia aisama, Deo iꞌa aꞌa laomai apala afa agepeniꞌa auga eegai fapiau koko koa auga keagaga agaꞌo laaꞌi. Ega puo foisa felo, Deo oi epainimi auga aina folopamafua.
26 Ufainagai Deo eake Sinai ikugai aisama, eniniꞌani ainagai aagoa epigugu. Kai pau ega iifa pukagai eifa koꞌania iina eoma: “Lau alapamue pugu, aagoa mo afalapapigugunia kai ufa isafa alapapigugunia,” eoma.
27 Egaꞌina iifaga alogai, ‘Alapamue pugu’ iifaga auga, kapaꞌina akepigugu auꞌi maꞌoai ageafiꞌauꞌi auga fouga eifania. Egaꞌina amuꞌi auga, Deo aagoai ke ufai epagama amuꞌi maꞌoai eifaniꞌi. Kai Deo ega agofaꞌai kapaꞌina afakepigugu auꞌi akeka aoniamo.
28-29 Iꞌa auga, Deo ega agofaꞌa egaꞌina, afaepigugu auga agaafia kainai Deo tenkiu akaikiꞌa amapenia. Ke iꞌa aꞌa Deo auga, lo akaikiꞌa kapa maꞌoai euma afeꞌainiꞌi auga koa iꞌopoga. Isa papiau eꞌi laomai apalaꞌi kainai afa apala epeniꞌi eumaꞌi. Ega puo iꞌa Deo famaniꞌiaina, Au Akaikiꞌa fapamia, aloꞌa koꞌagai faau afagaina, ke anina eani auga mo fakapa.