12
Papie Ke Kaapa Akaikiꞌa Ipauma Maiꞌife Maipanina Auga
1 Egaꞌina afegai ufai gou akaikiꞌa ipauma epealai. Gou egaꞌina alogai papie agaꞌo, kina auga isa ega tiapu epamia eiꞌiuka ke ife papagai gafa eka ke kaniagai miꞌimiꞌi 12, kin kaniaꞌiai kraon keoge auga koa iꞌopoga kemia kaniagai eogeiꞌi laisa.
2 Isa einae ke ega mauni kina ekainia aisama, ega kiekieai eagaga.
3 Ke ufai gou iꞌoina agaꞌo epealai pugu. Gou egaꞌina alogai, kaapa akaikiꞌa ipauma maiꞌife maipanina faaga pitoga auga laisa. Isa kania imagea gua, ke paꞌo ouꞌaga, ke kania imagea gua laagai kin kaniagai kraon keoge auga eogeiꞌi.
4 Isa iugai ufai miꞌimiꞌi fofouga epoꞌiai oiso koa iꞌopoga auga, agaꞌomo koa iꞌopoga auga elaꞌalaiꞌi, ke epiulaiꞌi keake aagoai. Ke kaapa papie egaꞌina gamauni eoma auga agogai eapa, ega koa isa afemauni koa aisama, fiakoa mo gauga fekogopa eoma.
5 Ke papie egaꞌina imoi maguaega epamauga. Ke egaꞌina imoina isapu eafia auga gouga aulina ageafia agofaꞌa fofouga papiauꞌi maꞌoai ageꞌimaꞌi. Deo papie egaꞌina gauga eafiia elaoaina Isa ega aguagu afugai.
6 Kai papie auga epiau ago maini elao. Egaꞌina afuga auga Deo isa faugai epafua eka, ega koa kina maꞌoai mo 1,260 alogai isa fekeꞌima eoma.
7 Egae kai ufai ifani emia. Lopia agelo aka Michael, ega agelo fou, kaapa maiꞌife ke maipanina auga fou kepipaini. Ke kaapa egaꞌina isafa, ega agelo apalaꞌi fou Michael ega agelo fou kepipaini.
8 Kai kaapa egaꞌina ega kapula, Michael ega kapula aekaꞌegaina, ke isa ega agelo apalaꞌi fou ufai afuꞌi eka auga kepagea.
9 Kaapa akaikiꞌa ipauma egaꞌina auga keafiia kepiulaisa eake. Isa auga kaapa ufaina, kepafaala tiapolo, o tiapolo eꞌi lopia aka Satani keoma. Ke isa agofaꞌa fofouga papiauꞌi efogeꞌi. Ke isa kepiulaisa eake agofaꞌai aisama, isa ega agelo apalaꞌi auꞌi fou kaiꞌialao kepiulaiꞌi.
10 Ega aisama lau ufai aufalao agaꞌo aina akaikiꞌa emai iina eifa oma aina lalogonia pugu:
Pau papiau kaniaꞌi isagamauga, isapuga, ke iꞌa aꞌa Deo ega agofaꞌa,
ke isa ega Mesaia papiau feꞌimaꞌi isapuga eafiia auga fou kemai efua.
Gome iꞌa aaꞌa akiꞌa pakoꞌa papiauꞌi epaagu fofouꞌi auga,
ke aufa kina kinai ke gapiai Deo agogai isa epaagu fofouꞌi aefuafua auga,
kepiulaisa eake.
11 Kai pakoꞌa auꞌi,
Sipi Gauga ifagai, ke Deo ega iifa koꞌa mo keifafoua auga faagagai
isa kepalutinia.
Egaꞌina papiauꞌi auꞌi,
aloꞌi koꞌagai ifoꞌi eꞌi agu maunina anina akeani,
ega mo keagu oma elao kemae.
12 Ega puo oi ufai oague aumi,
ke oi isa fou oague aumi alomi gagama.
Kai oi pakoꞌa aumi laaꞌi,
aagoai ke aꞌuai oague aumi,
Deo oi afa apala ipauma fepenimi laoma. Gome tiapolo eake oi eemi efai.
Isa auga gua ekupu alogaina,
gome isa elogo ega kina maaga ofolaꞌo,” eoma.
13 Ke kaapa maiꞌife, maipanina egaꞌina kepiulaisa eake agofaꞌai elogo aisama, isa papie imoi maguaega egaꞌina epamauga auga papiega muninai elao eafi apalania.
14 Ega aisama paili akaikiꞌa ipauma panina auniꞌi papie kepeniia, ega koa isa fegopo felao ago maininai isa faugai afuga kepafua ekae auga afugai feagu. Ke isa felao egaꞌina afuga, kaapa ageafia afaekaina auga afugai, inipo oiso, ke gafa imagea alogai egae fekeꞌima eoma.
15 Ega aisama kaapa egaꞌina akegai fei akaikiꞌa agapuge koa iꞌopoga eakilaisa papie muninai elao, ega koa fei egaꞌina felao papie fekaꞌegaina pugepugegai fepakipo eoma.
16 Kai aagoa ake epaagalaisa, kaapa egaꞌina akegai agapuge eakilaisa auga ekogopia faagagai papie epalagaina.
17-18 Ega aisama kaapa egaꞌina papie eegai gua ekupu alogaina. Ke ekailai elao papie egaꞌina gauga kapaꞌi mo keague auꞌi fou fekeifani eoma. Egaꞌina papiauꞌi auga, Deo ega iifa kapulaꞌi kainai kepea, ke Iesu Kristo iifa koꞌa eifafoua keafiapia mo auꞌi. Ke isa papiau egaꞌina auꞌi fou fekeifani eoma puo, elao foeai eapa.