8
Puka Ipaafiapina Imagea Gua Auga Ke Liti Goldai Kekapa Auga
1 Egaꞌina afegai Sipi Gauga puka ipaafiapina kapa imagea gua auga epaagalaisa aisama, ufai 30 minutes koa iꞌopoga aꞌoaꞌo agaꞌo aemia.
2 Ke agelo auꞌi imagea gua Deo agogai keapa auꞌi, fiꞌi maꞌoai mo imagea gua kepeniiꞌi keafiiꞌi laisaꞌi.
3 Ke agelo iꞌoina agaꞌo, mulamula foga felo keumaꞌi kapa goldai kekapa eafia auga, emai Deo amu kepalao penia afugai eapa. Isa mulamula fogaꞌi feloꞌi maꞌo kepeniia eafiiꞌi, ega koa Deo ega papiau maꞌoai eꞌi megamega fou feafiꞌi Deo fepaꞌa penia eoma, elao Deo agogai amu Deo kepaꞌa penia afuga goldai kekapa auga afugai eapa.
4 Ega aisama mulamula foga felo auga akuga, ke Deo ega papiau eꞌi megamega fou agelo imagai egaꞌina mulamula euma kapagai auga, kepealai keꞌagaukae kelao Deo agogai.
5 Ke agelo amu Deo kepaꞌa penia afugai lo eafiia mulamula foga felo keumaꞌi kapa goldai kekapa auga alogai eukaisa epapogua. Ke eafiia epiulaisa eake agofaꞌa elao. Ega aisama ufa eauniia aꞌo, ke aꞌoaꞌo akaikiꞌa emia, ke kimage eafi, ke kafokau akaikiꞌa emai.
Fiꞌi Aꞌoꞌi
6 Egae kai agelo imagea gua fiꞌi imagea gua keafiꞌi auꞌi, kefua fiꞌi kegaipiniꞌi keoma.
7 Ke agelo eufai auga ega fiꞌi eipinia. Ega aisama aisi oꞌopiꞌi imu akaikiꞌa koa ufai keake, ke lo ifa fou ekaifou auga ufai kepiulaiꞌi keake kemai aagoai. Ke agofaꞌa fofouga alogai, ago oiso koa iꞌopoga auga epogai agaꞌomo eaga. Ke au fofougai oiso koa iꞌopoꞌi auꞌi epoꞌiai agaꞌomo eaga. Ke egaꞌina ago alogai mukimuki fofouga keaga.
8 Ke agelo gua auga ega fiꞌi eipinia. Ega aisama kapa agaꞌo iku akaikiꞌa koa iꞌopoga eufa auga, keafiia aꞌuai kepiulaisa. Ke aꞌu fofouga alogai oiso koa iꞌopoga auga epoꞌiai agaꞌomo auga ifa emia.
9 Ke aꞌu alogai kapa maꞌoai maaꞌi mauniꞌi gopu oiso koa iꞌopoꞌi epoꞌiai gopu agaꞌo auga kemae. Ke lonti fofouga gopu oiso koa iꞌopoꞌi auꞌi, epoꞌiai gopu agaꞌo auga keauoka afeꞌainiꞌi.
10 Ke agelo oiso auga ega fiꞌi eipinia. Ega aisama miꞌimiꞌi akaikiꞌa ikui koa iꞌopoga eaga auga, ufai eꞌualai eake. Ke eake emai agapuge fofouga alogai oiso koa iꞌopoga auga, epoꞌiai agaꞌomo auga alogai eꞌualai. Ke fei ifo eꞌuki auga isafa laagai eꞌualai.
11 Ke miꞌimiꞌi egaꞌina aka ‘Kimu,’ keoma. Ke fei fofouga alogai oiso koa iꞌopoga auga epoꞌiai agaꞌomo auga ekimu. Ke papiau fei egaꞌina ekimu auga keinu puogai maꞌo kemae.
12 Ke agelo pani auga ega fiꞌi eipinia. Ega aisama kina, gafa, ke miꞌimiꞌi fofouga alogai oiso koa iꞌopoga auga, agaꞌomo auga keauniia. Ega puo keauga afuga auga epaꞌuminania. Ke kina agaꞌomo fofouga alogai, kina maaga oiso koa iꞌopoga auga, agaꞌomo auga alogai eaea laaꞌi emia. Ke gapi isafa faagagai ega koa iꞌopoga emia.
13 Ke maau elao aisama, paili ufa gua ipuainagai egopo, aina akaikiꞌagai iina eifa oma aina lalogonia:
“Agelo oiso eꞌi fiꞌi kekae paukai akeipiniꞌi kainai, agofaꞌai keague auꞌi afa apala akeafia! Afa apala akeafia! Afa apala akeafia paisa!” eoma.