11
1 Ne nga ba, ngahauli ngaharingia Maikel mana niani mugamugangama Darias lipu Midiam wa xaitamoxi.
Sangga Bukang Xaung Kanggua Xaitamoxiamdi
2 “Tauna, bagula ngahatanga axamang maxunamdi bagula disok. Xaitamoxi tuwa muli bagula disok Pesia. Baing bagula tela muli sok, xalinging xumang sibuna dali teladi. Xalingindi bagula hauli ba xap haringinga. Xap masup baing bagula yumyum lipu longgalo ba dahaunggana yongga Grik.
3 Baing xaitamoxi haringing tela bagula sok. Bagula wa etua mana yongga sabanga sibuna, saing bagula libu baraxing baraxinta muruna mana.
4 Ne kimuya mana haring, yongaxinoa bagula utuina saing hata ba sok hataing luwa luwa. Bagula garandi daxap te. Xauna, adi daxap ba haringingadinga bagula bila xaitamoxi haringingamga ba te. Namua na yonggaxinoa bagula duxup disina na teladi.
5 “Baing xaitamoxi mana yongga wa bukang, Isip baing, bagula haring, ne lipuxing haungingam yanam tela bagula xap haringinga dali inia, saing bagula wasa mana yonggaxinoa xaung haringinga sabanga.
6 Niani teladi disup, baing bagula tang dahau haruangua liwe madingtang. Xaitamoxi mana yongga wa kanggua, Siria baing, nanuhanginoa bagula sina na xaitamoxi mana yongga bukang (Isip) bu hau haruanga ba, ne bagula hainga haringinganoa etua mana xaitamoxia ba bagula sup, saing bila balau haruanga dahau ba bagula xung mari, saing haingga ba, ayuana digabu garanoa bagula dila bixuadingdi rimadingia.
7 “Kimuya haingga ba sibing tela bagula sok xaitamoxi mana Isip wa bukang. Bagula gabu lipuxing haungingamdi dila haunggana lipu haungingamdi digabu xaitamoxi mana Siria wa kanggua. Bagula diluxu soxautingama saing didalidi haringina.
8 Bagula digoxoya mala Isip, disia Siria babudingdi xaung adi ditongtongiadi mana gol xaung silba dita babudingdi maxadingia. Baing niani xumana bagula yungadi duwa.
9 Baing xaitamoxi mana Siria wa kanggua bagula luxu Isip wa bukang, ne bagula goxoya mala ing sibung titinia muli.
10 Ning xaitamoxi Siriam garandi bagula daxauxau digugunia lipu haungingam xumang sibuna. Bagula dima dima, dibaxagi dimatu ding, dikisi mala titia ba bila silinga sabanga, daxap haungingua mala mala masok bixuang gamgaming haringinia.
11 “Baing xaitamoxi mana Isip wa bukang atindi bagula disala haringing sibuna, binabu bagula ila bu haunggana xaitamoxi mana Siria wa kanggua. Xaitamoxi Siriama bagula gugunia lipu haungingam xumang sibuna, ne xaitamoxi Isipkama bagula dalidi.
12 Bungina tuxudi masup, baing bagula hasua maina saing bagula ung xumana sibuna manadi dimati. Ning haringinganoa bagula sup sap.
13 Namua na xaitamoxi mana Siria wa kanggua bagula gugunia lipu haungingam xumang sibuna muli, titingadinga dali adi guguniadi muga ba. Niani xumana disup baing bagula goxoya mala muli xaung lipu haungingam xumang sibuna dibaxagi mana xalingiding haungingamdi.
14 “Mana bungina baguba lipu xumana bagula dududing mana xaitamoxi mana Isip wa bukang. Adi dududing maluxu mana ung sibum bakbagima bagula dududing mana xauna bu dilibu axamang tela bila mibinga yanamiding tela bagu ba aningona, ne bagula xungdi mari.
15 Baing xaitamoxi mana Siria wa bukang bagula ma saing bagula dahaxuru titia gamgaminga rubinia mana long sabangga gamgamingang haringinam tela, saing bagula diluxu bila ba saing daxap longga ba. Bagula Isip lipuxing haungingamdi haringingading sanga mading te. Tegu. Lipuxing haungingam mugamugangamdi bila balau xauna. Namua na haringingading bagula sanga mana dili haringina te.
16 Baing xaitamoxi Siram bagula libu ing murunganoa, saing lipu tela sanga ba bili te. Bagula haringiaina ba wa etua mana titi ralanama Isrel, saing tuxu hangglangiangua rimania.
17 Bagula hau hatuminganoa ba ma xaung yonggaxing lipu haungingam haringing longgalo, saing bagula hau haruangua rangua xaitamoxi mana Isip wa bukang. Bagula sina nanuhanging tela ba yau bu hanggalangia Isip yonggaxinoa, ning hatuminganoa bagula aningona kimbo hauli te.
18 Kimuya bagula ila haunggana masahangdi saing bagula tuxu dingia xumana. Ne yanam titi telam tela bagula sahi hasianganoa saing haxuya kubolunoa na.
19 Baing bagula xaitamoxi Siriama goxoya mala mana long sabanga gamgaminga haringinamdi duwa ing sibung titinia, ne bagula tatuaki xung mari saing sup.
20 “Xaitamoxi(a) xap yabanoa bagula soxi lipu takis xabinganam tela mala bu xap sianga mana yonggaxing xalingindi. Ne bunging gamoita baing bagula mati, ning matianoa bagula sok mana kubolua ati salianama te, kimbo mana haingingua te.
21 “Xaitamoxi(a) xap yabanoa bagula lipu musung sibuna. Lipua ba bagula xap yabanoa maringina te. Bagula ma bungina lipudi dahatum ba duwa xai, saing bagula sok xaitamoxi mana muraga xaung haruanga orana.
22 Bakbak haungingamdi bagula disup sibuna maxania. Bagula hanggalangiadi baing. Xauna, bagula hanggalangia lipu hananiangam mugamugangama.
23 Kimuya mana hau haruangua, bagula libu kubolu murakkama, saing bagula sok haringina, heku lipu xumana disu mana te.
24 Hata sibuna li bagula ma haunggana probinsi sianggamdi, saing bagula libu kubolua mugangandi dilibu monga te: Bagula tuxu sinak mana axamang xangxana xapdi rangua lipuadi dalidi. Bagula sina xalaxaladi ba na adi disu mana. Bagula hau hatumingua ba dali long sabanga gamgaminga haringinamdi—ne bunging gamoita ing ganina.
25 “Baing bagula haringia hatuminganoa, bagula haringia gamona ba wa haringina, saing bagula gugunia bakbak haungingam sabanga ba haunggana xaitamoxi mana Isip wa bukang. Xaitamoxi mana Isip wa bukang bakbaging haungingam bagula haringiding buk, ne sanga ba dali bixuanoa te, namua na lipudi bagula dahau haruangua ba dituxu murakdi mana.
26 Ing sibuna lipuxindi daxang rangua ba bagula dasai daxangua ba dahanggalangia. Bakbaging haunginamdi bagula daxap doa, saing xumana bagula dimati.
27 Xaitamoxi luwa hatumingading dahaxi ba dilibu doa na dingtang bagula dirung mana kabukabu xangingam taininau saing dilangua dingtang, baing susu. Namua na subingua bagula ma mana xaidap mogunganama, heku lipu tela tuba ba libu ing murunganoa.
28 Xaitamoxi Siriama bagula goxoya malau titinia xaung xalinging xumang sibuna xapdi haungingia, ne hatuminganoa bagula haxi ba hanggalangia Urana sabunganoa. Bagula libu ing murunganoa. Sup, baing bagula goxoya masup mala ing titinia.
29 “Mana xaidap mogunganama, xaitamoxi Siriama bagula goxoya ma mana Isip wa kanggua, ne bagula dalidi bila muga te.
30 Namua na lipuadi duwa yuwaxa wagadingdi bagula dima bu dahaunggana, saing bagula maxuwa saing sui. Ne bungina goxoya mala titinia atin salianoa bagula xap Urana sabunganoa, saing bagula libu xai mana adi diyamu Urana sabunganoa.
31 “Lipuxing haungingamdi bagula dilibu axadi didongdongia ganangang haringina, Urana Numanoa baing. Bagula dibili hananianga xaidap tainingtaininamdi. Baing bagula dita axamang maxuwangam hanggalangiangama Urana Numania.
32 Bagula ta adi diyamu Urana ba daxanga diania mana haruangang orana. Ne lipuadi daxabia Urana ba bagula dili haringina duxukxugia.
33 “Yanam xabianga maringinamdi bagula tubatuba lipu xumana xai, ne bunging mongaita bagula dimati waxangia, kimbo ditaudi yabia kimbo ditadi salak yabania kimbo dahanaidi.
34 Bungina daxap salaga bila ba, haulinga daxap bagula kaxukana, saing xumana digugu ding ranguadi bagula lipu haruanga maxung teguamdi.
35 Yanam xabianga maringinam teladi bagula daxap salaga. Bila balau bagula disok sigixingang sibuna, laing xaidap subinganoa, namua na xaidap mogunganama ma yu.
36 “Xaitamoxi(a) bagula libu ing murunganoa. Bagula hasuaina xaung iti ing sibuna yanoa etua mana urana longgalo, saing bagula harungia Urana ba dali urana longgalo xaung daudaunga diang sibuna. Bagula libu ing murunganoa laing Urana ating salianoa aningong masup, namua na axadi Urana hau hatuminganoa ba libu bagula sok.
37 Xaitamoxi(a) bagula hangata uranadi mugangandi disabu manadi, xaung hangata urana haingdi muruding mana ba. Bagula hangata urana longgalo, namua na bagula hasua ba ina dali ding longgalo.
38 Heku mana uranadi ba, bagula sina yaya na urana wasa mana long sabanga gamgamingang haringinamdi, urana ba mugangandi daxabia te. Baing bagula hatanga ba sina yaya na mana gol, silba, siang xai sibundi xaung yahanga siang sabanggamdi sinadi.
39 Bagula xusunga urana titi telamga ba hauli wasa mana long sabanga gamgaminga haringing sibunam iniadi. Bagula sina yaya na lipu gaxarea dila hawa mana. Bagula mogudi disok yanamdi etua mana lipu xumana, saing bagula tuxu sinaga mana titia nadi bila haxuyangadinga.
40 “Bunging axamang subinganoa, baing bagula xaitamoxi(a) mana Isip wa bukang bagula haunggana xaitamoxi(a) mana Siria wa kanggua. Xaitamoxi Siriama bagula ri mala mana bila malasu, xap wilkadi, hosidi, xaung waga xumana dima rangua. Bagula diluxu numanuma xumana saing dima dima, dibaxagi dimatu ding, dikisi mala manadi bila silinga sabanga.
41 Bagula luxu ma titi ralanama Isrel. Baing lipu xumang sibuna bagula dimati. Ning bakbakka Idom, bakbakka Moap, xaung bakbakka Amon duwauyu bagula digiti mala.
42 Haringinganoa bagula xap numanuma xumana, saing bagula xap numanuma Isip xauna.
43 Bagula xap Isip xalinging siang sabanggamdi, gol xaung silba iniadi xauna. Baing bagula Libiadi xaung Itiopiadi dalidi ba dila hawa mana.
44 Ne naxuyangadi lungudi mana axadi disok sangga karaga xaung kanggua bagula libu maxuwa. Binabu bagula atin disala haringina, saing bagula ila haung haringing sibuna bu ung xaung hanggalangia sibuna lipu xumana.
45 Bagula rang numang moki xaitamoxiamdi liwe mana tega xaung Urana bimbiang ralanama. Ne bagula sup la ba, xola mana lipu tela ba hauli.”