28
Lipu Hananiangamdi Imangidingdi
1 “Uwagi sabangama Aron masok sangua Isreldi, gabu garang lupdi Nadap, Abihu, Eleasar xaung Itamar, bu duwa halianga dituxu oxatagua bila lipu hananiangamdi.
2 Utongtongia imang mogungaguamdi mana sabangama Aron ba gumangiding xaung disina yaya sabanga na.
3 Uharua na lipu ubung bisamanam longgalo ngasina xabianga nadi mana oxata na bila li ba ditongtongia imangdi mana Aron, bu mogu ba sok lipuxigu hananiangama tuxu oxata nanga.
4 Imanggadi bagudili bing ditongtongiadi: ringringing imanginoa, gamong imanginoa, imanging maxaxaya, imanging yauyaungama, toxong sakunganoa, xaung waxunoa. Bagula ditongtongia imang mogungaguamdi mana sabangama Aron gabu garang lupdi bu dituxu lipu hananiangam oxatanoa nanga.
5 Daxap gol, yau mutuxu monga, sikokop xaung sabuxana, xaung imang xai sibuna bu ditongtongiadi.
Lipu Hananiangam Gamong Imanginoa
6 “Utongtongia gamogamu imanginoa mana gol, xaung yau mutuxu monga, sikokop xaung sabuxana, xaung imang xai sibuna. Lipu ubung bisamanamdi ditongtongia.
7 Disigi waxu yaxuam luwa mana imang rubing luwa, bu sanga ba goxi.
8 Disusu waxu ulenama xai sibuna bila gamogamu imanginoa. Imang taininau rangua, utongtongia mana gol xaung yau mutuxu monga, sikokop xaung sabuxana, xaung imang xai sibuna.
9 “Oxop siang oniks luwa saing ubung Isrel garang lupdi yadingdi mana dingtang,
10 usu mana hayauxingadinga. Ubung yading 6 mana siang tela xaung yading 6 mana tela.
11 Ubung Isrel garang lupdi yadingdi mana siang luwa(di) ba bila lipu siang buninganama bung mana. Saking utaga sianggadi ba mana siang tuxungang yauyaungamdi
12 saing goxidi mana gamogamu imanging yaxung hataindi bu duwa siang hatuminga muliamdi mana Isrel garang lupdi. Bagula Aron xoxi yayadi bagudili mana yaxuang luwa bu Toxoratamona hatumia lipuxindi bungingbunginalo.
13 Utongtongia siang tuxungang yauyaungamdi
14 xaung waxu gol luwa ususudi bila waxua, saing usigi waxudi ba mana siang tuxungang yauyaungamdi.
Lipu Hananiangam Ringringing Imanginoa
15 “Utongtongia ringring imanginoa hauli suxuya Urana murunganoa. Lipu ubung bisamanama bing tongtongia. Utongtongia bila gamogamu imanginoa: mana gol, xaung yau mutuxu monga, sikokop xaung sabuxana, xaung imang xai sibuna.
16 Rubing luwadi luwadi maxaxayadinga taininau saing uluki hataing hataina sanga mana rubing taining tainina sentimita 22.
17 Saking utaga siang giminak sabanggamdi maxixinga luwadi luwadi mana. Maxixinga mugamugangam bing kanilian, topas xaung beril.
18 Luwa bing emarol, sapaya xaung daimon.
19 Tuwa bing yasin, aget xaung amatis.
20 Luwadi luwadi bing kirisolait, oniks xaung yaspa. Utagadi mana siang tuxungam yauyaungamdi.
21 Mana siang 12 ba, ubung Isrel garang lup tela mana taining tainina. Siang tela xap yaya mana Isrel bakbaging 12 tela.
22 “Utongtongia waxu luwa mana gol sigixingang sibuna mana ringring imanginoa. Utongtongiadi bila waxua.
23 Utongtongia raxu luwa mana saing usigidi mana ringring imanging yoyoang luwa.
24 Usigi waxu gol luwadi ba mana raxu luwadi ba mana ringring imanging yoyoandi.
25 Waxu subingang luwadi bing usigidi mana siang tuxungam yauyaungamdi luwa duwa mana gamogamu imanging yoyoang hataindi duwa maxania.
26 Utongtongia raxu gol luwa saing usigidi mana ringring imanging yoyoang luwa teladi duwa hawa xaung imang ubunia, gamogamu imanging rubinia.
27 Utongtongia raxu gol luwadi muli saing usigidi mana yoyoang hataindi duwa hawa mana gamogamu imanginoa, haxek mana waxung ulenam sihinoa.
28 Ringring imanging raxundi bing ugoxidi mana gamogamu imanging raxundi xaung waxua mutuxu monga, usigi mana waxu ulenama, bu ringring imanginoa sanga ba tibala sangua gamogamu imangin te.
29 “Bungingbungina Aron luxu mana Urana Yabang Maringina, bagula xoxi Isrel garang lupdi yadingdi (etua) mana tuturina mana ringring imanging Urana murungang suxuyangama bu bungingbunginalo Toxoratamona hatumiadi.
30 Xauna, uta Urim xaung Tumim maluxuʼm ringring imanginoa, bu duwa (etua) mana Aron tuturina bungingbungina luxu mana Toxoratamona maxanoa. Bila balau bungingbunginalo bagula Aron xoxi axadi dahauli suxuya Urana murunganoa mana Isreldi (etua) mana tuturinoa bungina wa Toxoratamona maxania.
Lipu Hananiangamdi Imangiding Teladi
31 “Utongtongia imang maxaxaya mana imang mutuxu monga bu wa hawa mana gamogamu imanginoa.
32 (Uyunga) Ginangina lia mana lipu toxonoa. Utongtongia sihinoa mana ginangina nam singina.
33 Uyauyau mana pomigranet marang babundi mana yau mutuxu monga, sikokop xaung sabuxana mana imang maxaxaya sihinoa, xaung belo goldi didararagadi liwe manadi.
34 Belo goldi xaung pomigranetdi bing tela tela wagigia imang sihinia.
35 Aron bing sau bungina tuxu hananianga oxatanoa. Belodi dararagangadinga bagula lipudi dilungu bungina luxu mana Toxoratamona maxania mana Urana Yabang Maringina, xaung bungina sok ma muli, nam mati.
36 Utongtongia yauyaunga tela mana gol sigixingang sibuna saing ubung haruanga baguli mana: Toxoratamona Inia.
37 Ugoxi waxu mutuxu monga mana saing usigi mana toxotaxu sakunganoa maxania.
38 Bagula wa etua mana Aron ramramonoa, saing Aron bagula xoxi lipudi kuboluding diandi mauxangadinga bila ba bungina xap Isreldi hananiangading maringing baruamtadi disinadi ma. Bungingbunginalo bagula wa etua mana Aron ramramonoa bu sanga ba hananiangadi duwa xai Toxoratamona maxania.
39 “Utongtongia imang yauyaungam xaung toxotaxu sakunganoa mana imang xai sibuna. Lipu ragangam bing raga waxu ulenama.
40 Utongtongia imang yauyaungamdi, waxu ulenamdi xaung toxotaxu sakungandi mana Aron garang lupdi ba gumangiding xaung disina yaya sabanga nadi.
41 Usausau imanggadi bagudili mana sabangama Aron xaung garandi masup, baing umatu guxenga manadi saing umogudi mana oxatagua. Umogudi nanga bu dituxu lipu hananiangam oxatanoa nanga.
42 “Utongtongia imang hawangamdi bu kaukau mulangidingdi, ungguti mana uledingdi ri mala mana babadingdi.
43 Aron gabu garandi bing disaudi bungingbungina diluxu mana xahi guguniangama kimbo dima haxek mana kabukabu hananiangama bu dituxu oxatadinga mana Urana Yabang Maringina, nam daxap mauxanganoa dimati.
“Hanaunaunga baguli wa bungingbunginalo mana Aron xaung garandi dima kimuya mana.