18
Lobu Tuwa
1 Toxoratamona owa masok rangua Ebraham muli mana Mamre xaing sabangadi rubinia. Xaidaba sala, saing Ebraham rung xahing xaluxinia.
2 Bagu mahaing saing hata sibuna li bagu lipu tuwa dili maxania. Bungina bagudi, mesa yunga xahing xaluxinoa saing luki mala ranguadi, saing gung king tuxundi, turu mari titia.
3 Harua ba, “Lipu sabanga, nabu uyaha manga, bing uwa mongaita rangua nga lipuxim oxatama.
4 Uyunga lipuxigu oxatama xap langa ma bu adamia kimdi to. Tauna, ayagua xai namuya li.
5 Uyunga ngaxap anginga teladi ma nang bu haringiang to, tauna ala. Namua na ama rangua nga lipuxim oxatama.”
Baing daharua ba, “Sangau, ulibu bila uharua ba.”
6 Binabu Ebraham ila sap xahia rangua Sara saing harua ba, “Ugogolinga! Oxop wit gagabing xai sibuna minang tuwa! Uxaningxaning salangadi saing utaudi.”
7 Saking luki mala rangua bulmakaung buranga saing mogu tutubing dungmananganam tela. Xap mala rangua lipuxing oxatama ba tutu bu tau sap.
8 Baing xap bulmakau suing langina xaung sis xaung bulmakau mututungana tau ba ma, saing sinadi nadi. Daxang mua, baing Ebraham li haxek ranguadi xai tela namuya.
9 Duxusunga ba, “Hainima Sara kabi?”
Haxuya ba, “Bagu wa xahi lunia.”
10 Baing tela harua ba, “Bagula ngagoxoya ma muli mana sobakka baguli niani etuama, saing hainima Sara bagula sep ing sibung garang luba.”
Ne Sara lungu haruanganoa, namua na wa xahi xaluxinia lipua ba ubunia.
11 Ebraham Sara tang duwa tabaxana ba, binabu Sara nianing hayauxingamdi bing disup ba.
12 Baing ina naga Sara masisi lunia saing hatum ba, “Sanggagua xabati ba, xaung ayuagu wa duanga ba. Ne hatata bagula yahangua bila li xap nga baru?”
13 Baing Toxoratamona harua na Ebraham ba, “Baruta Sara masisi saing harua ba, ‘Ngatabaxa ba, binabu bagula ngahayau baru?’
14 Axamang tela haxi buk mana Toxoratamona te. Bagula ngagoxoya ma muli mana sobakka baguli niani etuama bila menau ngamogu ba, saing Sara bagula sep ing sibung garang luba.”
15 Sara maxuwa binabu hatiam saing harua ba, “Ngamasisi te.”
Ne harua ba, “Tegu, umasisi baing.”
Ebraham Xusunga Haringina Mana Sodam
16 Lipu tuwadi ba dimesa ba dilauba, baing tung dibagu mari mala mana long sabangga Sodam. Baing Ebraham haxa mala ranguadi ba yungadi daxangia.
17 Baing Toxoratamona harua ba, “Bagula ngayameng hatumingagua ngahau ba mana Ebraham? Tegu.
18 Maxung sibuna Ebraham bakbagindi bagula disok numanuma haringina, bagula ramramoding sabanga. Baing mana ina, bagula numanuma titiam longgalo daxap guxama.
19 Namua na ngamogu bu tabina garandi xaung bakbagidingdi dima kimu ba disu mana Toxoratamona daxanganoa, bu dilibu kuboluadi daxai xaung dimaring. Baing ina naga, bagula ngalibu haruanga longgalo mana Ebraham bila ngahau ba.”
20 Baing Toxoratamona harua ba, “Ngalungu harungianga xumang sibuna daharungia long sabangga Sodam Gomora tang. Kuboludingdi didoa sibuna.
21 Binabu bagula ngari mala bu ngabagu nabu kuboluadi dilibudi bila haruanga ngalungu ba. Nabu tegu, bing bagula ngaxabia.”
22 Sup, baing lipu luwadi duxugia dahaxa mala Sodam. Ne Ebraham wauyu, li mua Toxoratamona maxania.
23 Baing Ebraham ila haxek rangua saing xusunga ba, “Maxuna bagula uhanggalangia lipu kubolu maringinamdi xaung lipu kubolu dianamdi xauna?
24 Nabu lipu kubolu maringinam 50 duwa mana long sabangga ba. Maxuna, bagula uhanggalangia longga ba masup? Bola uyungadi duwa bu lipu maringinam 50 ba disup te?
25 Uhatumia, labu ulibu bila bau tai! Ung lipu kubolu maringinamdi xaung lipu kubolu dianamdi xauna mati sanga te! Bagula bila ulibu kubolu taininau mana lipu kubolu maringinamdi xaung lipu kubolu dianamdi. Uhatumia, labu ulibu bila bau tai! Lipu titiam longgalo Suxuyangadinggama bing libu maringina, maxuna?”
26 Baing Toxoratamona harua ba, “Nabu ngabagu lipu kubolu maringinam 50 duwa mana long sabangga Sodam, bing bagula ngayunga ding longgalo duwa bu 50 ba disup te.”
27 Baing Ebraham harua muli ba, “Lipu Sabanga, ngausinga ngaungguti ngaharua naung bila ba, ne nga bila gagap xaung hayata ing ganina. Ne ngabo ba ngaharua muli.
28 Heku lipu maringinam 50, nabu ngaunia 5 mana titingadinga. Bagula uhanggalangia longga ba masup namua na 5 ba duwa te?”
Baing Toxoratamona harua ba, “Nabu ngabagu lipu maringinam 45 duwa la ba, bagula ngahanggalangiadi te.”
29 Baing Ebraham harua muli na ba, “Bola 40 ding ganiding duwa la ba, bing baruta?”
Baing Toxoratamona harua ba, “Mana namua 40 duwa, bing bagula ngalibu te.”
30 Baing Ebraham harua ba, “Lipu Sabanga, sanga ba atim disala manga te. Ne ngabo ba ngaharua muli. Bola 30 ding ganiding duwa la ba, bing baruta?”
Baing Toxoratamona haxuya ba, “Mana namua ngabagu 30 duwa, bing bagula ngalibu te.”
31 Baing Ebraham harua ba, “Lipu Sabanga, ngaharua naung xumana ba, ne ngabo ba ngaharua muli. Bola 20 ding ganiding duwa la ba, bing baruta?”
Baing Toxoratamona harua ba, “Mana namua ngabagu 20 duwa, bing bagula ngahanggalangiadi te.”
32 Baing Ebraham harua ba, “Limu Arangga, sanga ba atim disala manga te. Ne ngabo ba ngaharua bunging tela muli. Bola 10 ding ganiding duwa la ba, bing baruta?”
Baing Toxoratamona harua ba, “Mana namua ngabagu 10 duwa, bing bagula ngahanggalangiadi te.”
33 Toxoratamona harua rangua Ebraham laing sup, baing ilauba. Baing Ebraham goxoya mala numia muli.