4
Ken Ebal Tang
1 Adam kinu rangua haininoa Ip, baing gamona saing hayau gara lup tela. Harua ba, “Toxoratamona hauli nga ngaxap gara lup tela.” Binabu uxu ba Ken.
2 Kimuya hayau kixinginoa Ebal.
Tauna, Ebal sok lipu sipsip wasanganama, saing Ken sok lipu umangam(a).
3 Bunging tela Ken xap anginga umangam tela(di) ma hanania(di) mala rangua Toxoratamona.
4 Baing Ebal xauna xap hananiangua ma—sipsibing matuaudi mututungading oranamdi. Baing Toxoratamona yaha mana Ebal xaung hananianganoa,
5 ne yaha mana Ken xaung hananianganoa te. Binabu Ken atin disala haringina saing ramramonoa haring.
6 Baing Toxoratamona harua na Ken ba, “Baruta atim disala xaung ramramoma haring?
7 Nabu ulibu xai, bagula ngaxapkung. Ne nabu ulibu xai te, bing kubolu diana yai xalumia, ragung usok baing. Muruna ba xapkung, ning uhaxi bu udali.”
8 Xaidap tela Ken bala kixinginoa Ebal ba, “Tala umangia.” Tang duwa umangia, baing Ken taha kixinginoa Ebal mati.
9 Baing Toxoratamona xusunga Ken ba, “Kixingima Ebal kabi?”
Haxuya ba, “Ngaxabia te. Baruta? Nga kixingigua lipuxing wasangama?”
10 Binabu Toxoratamona harua ba, “Uraxata bila ba? Ulungu! Kixingima sibinoa wa titia ba wagi manga.
11 Titia xaxa suxungunoa ba nung kixingima sibunoa bungina mati rimamia. Binabu hatata guxam dianoa xapkung. Titia ribaina maung.
12 Bungina uki titia, bagula ua te. Bagula uwa lipu yabam teguam xaung uhaxahaxa mauli titia.”
13 Ken harua na Toxoratamona ba, “Mauxangana ngaxap li tubu buk manga.
14 Laku, hatata usuka nga sangua titia, saing bagula ngawa maxamia muli te. Bagula ngawa lipu yabagu teguam xaung ngahaxahaxa mauli titia. Lipu gaxarea sok manga bagula ung nga mati.”
15 Baing Toxoratamona harua na ba, “Tegu! Nabu lipu tela unggung, bing bagula xap salaga dali ungia bila 7.” Baing Toxoratamona ta mogungua mana Ken, nam lipu tela sok mana bu ung mati.
16 Binabu Ken ila sangua Toxoratamona maxanoa saing rung mana titia Nod. Titia ba wa Iden sanga karagia.
Ken Bakbagindi
17 Ken kinu rangua haininoa, baing gamona saing hayau gara lup tela, yanoa Inok.
18 Baing Inok xapsaxi Irat. Irat xapsaxi Mehuyael. Mehuyael xapsaxi Metusael. Metusael xapsaxi Lamek.
19 Lamek yau haing luwa. Tela yanoa Ada saing tela yanoa Sila.
20 Ada hayau Yabal. Yabal bing adi duwa mana numa mokiamdi xaung adi moruamdi mugangadinga.
21 Kixinginoa yanoa Yubal. Yubal bing adi dahali hap xaung adi diyup panggeriang mugangadinga.
22 Sila xauna hayau gara lup tela, yanoa Tubal-Ken. Tongtongia axamang oxatamdi mana bras xaung ain. Tubal-Ken hamunganoa yanoa Nama.
23 Lamek harua na hainindi tang ba,
“Ada Sila, tang galungu nga to,
hainigudi axap haruangagua to.
Ngaung lipu tela namua na taha nga,
Gananung tela uda nga, binabu ngataha mati.
24 Lipu gaxarea ung Ken bing xap salaga dali inia 7,
ne nga ngaharua ba, lipu gaxarea ung nga, bing xap salaga dali inia 77.”
Set Xaung Enos
25 Adam kinu muli rangua haininoa, baing hayau gara lup tela. Harua ba, “Urana sina gara tela muli nanga ba xap Ebal yabanoa, namua na Ken ung mati.” Binabu uxu ba Set.
26 Set xauna garanoa, saing uxu ba Enos.
Mana bungina baguba lipudi dungguti disabu mana Toxoratamona, duxu yanoa.