2
Lauma Helaḡa e diho
1 Pentekoste dinana ai idia iboudiai gabu tamona ai e hebou.
2 Bena guba amo reḡe ta e reḡe dagu, lai badana huna na heto, e helai bou rumana e hahonua.
3 Bona lahi maladia na heheto e heita, idia ta ta tubuadia ai e hururu.
4 Bena Lauma Helaḡa ese e hahonudia, bona idau gado idau gado ai e hereva, Lauma ese e henidia heḡereḡerena.
5 Una negana ai Iuda taudia Ierusalem ai e nohova, Dirava garina e gariva taudia, tanobada tanodia loḡora amo ema.
6 Una rege e kamonai ai, hutuma e hebou, bena laumadia e daure, badina be ta ta ena gado ena gado e kamonai.
7 Iboudiai e daradara bona e hoa, eto, Ini e herevamu taudia na dia Galilea taudia a?
8 O edeheto ita iboudai ta ta ena gado ena gado korikori ai edia hereva ta kamonaimu?
9 Patia amo, Media amo, Elam amo, Mesopotamia amo, Iudea amo, Kapadokia amo, Ponto amo, Asia amo,
10 Frugia amo, Pamfulia amo, Aigupto amo, bona Kurene amo (una na Afrika kahana ta). Haida be vadivadi taudia Roma amo; haida be Iuda taumai; haida be Iuda ai e halaodia taudia;
11 haida danu Krete taudia bona Arabia taudia. Tatau bini Dirava ena hoa ḡaudia e herevalai henidamu, eda gado korikori ai.
12 Iboudiai e hoa, bona e daradara, e hereva heheni, eto, Ina na dahaka?
13 A haida ese e kirikuilaidia, eto, Idia na vine ranuna matamatana e inua, e kekeromu.
Petro ena haroro
14 A Petro na gwauta-taosi ida e gini tore, erena e habadaia, e haroro henidia, eto, Iudea taumui bona Ierusalem ai o nohomu taumui e, ina na ba haeroa, bona egu hereva ba kamonai.
15 Ini na dia kekekero, umui o laloamu heḡereḡerena, badina be ina na doini daba.
16 A ina na Ioel, peroveta tauna, ese e gwauraia guna herevana; eto,
17 Dirava eto, Tanobada dokona dinadia ai
Lau laumagu baina seia dobi, taunimanima iboudiai latadiai;
Bena natumui mamaruanedia bona hahinedia do bae peroveta,
Bona emui eregabe bae mata hanai,
Bona emui iahu bae nihi.
18 Oibe, unu dinadia ai egu hesiai taudia bona hahinedia latadiai
Laumagu do baina seia dobi, bena bae peroveta.
19 Bena hoa ḡaudia na guba ai baina hahedinarai,
Bona toa ḡaudia tanobada ai;
Rara bona lahi bona kwalahu.
20 Dina do baine dibura,
Hua na rara ai bainela,
Lohiabada ena dina badana bona herea-daena baine kahira-kahira negana ai.
21 A Lohiabada ladana bae hatoa taudia na bae mauri.
22 Israel taumui e, ina hereva ba kamonai: Iesu, tau Nasaret, Dirava ese dekemui e siaia vasi, bona siahu karadia bona hoa karadia bona toa na bogaragimui ai e hahedinarai, Dirava ese ia imana amo e karava; umui danu dibamui.
23 Ia hari, Dirava ena lalo-hadai bona ena diba ese e henimui tauna, umui ese murimuri taudia imadia amo vada o hasatauroa.
24 A Dirava ese e hatorea isi lou, mase ena iḡui e ruha; badina be mase na ia idogo-taona asi dibana.
25 David danu ia herevana e gwauraia; eto,
Lohiabada na nega idoinai vairagu ai na itaia,
Badina be ia na idibagu kahana ai,
Basina marere helaoreana.
26 Taunabunai lalogu eme hisi dae,
Malagu eme moale bada,
Hidiogu na helaro ai baine taruha;
27 Badina be laumagu na mase taudia edia gabu ai basio rakatania,
Bona emu Helaḡa Tauna na basine pata.
28 Mauri daladia vada o hadibagu;
Oi vairamu itana ai egu moale baine ḡuḡuru.
29 Varavaragu e, seneda David herevana na hamaoromui momokanimu: ia na e mase, e guria, bona gara na doini mia ita dekeda ai.
30 To ia be peroveta tauna; dibana danu Dirava vada e gwau henia hamata, ia besena ta ese ena terono ai baine helai kau eto.
31 Una dainai e diba guna herevana e gwauraia, Keriso ena tore-isi-lou herevana, ia na mase taudia edia gabu ai basine noho, bona tau-anina basine pata.
32 Hari Iesu na Dirava ese e hatorea isi; ai iboumai ai danu dibamai.
33 Bona Dirava ese imana idibana amo e abia isi; bena ia ese Tamana e gwauraia hamata Laumana Helaḡana vada e abia, bona vada e seia dobi; umui ese harihari o itaiamu bona o kamomaiamu.
34 Badina be David na guba ai se dae kau, a ia hari eto,
Lohiabada ese egu Lohia e hamaoroa, eto,
Lau idibagu kahana ai ba helai,
35 Ela bona oi inaimu na
Aemu ihadaidia ḡauna ai baina halaodia.
36 Taunabunai, Israel besedia iboudiai na bae diba vaitani, hari Iesu, umui ese o hasatauroa tauna, Dirava ese Lohiabada bona Keriso ai vada e halaoa.
Ekalesia oreana e gini
37 Ini hereva daidiai, idia kudoudia e hetaha. Bena idia ese Petro aposetolo orena ida e nanadaidia, eto, Varavaragu e, ede baia kara toma?
38 Petro ese e haere henidia, eto, Ba helalo kerehai: iboumui ai bapatiso bavabia, Iesu Keriso ladana ai, emui dika igwau-taona toana; bena Lauma Helaḡa hariharina do bavabia.
39 Badina be gwau-hamata be umui emui ai, bona natumui ediai, bona dauhai nohodia taudia ediai, oibe, Lohiabada eda Dirava ese baine boiridia taudia iboudiai ediai.
40 Hereva diaḡau amo ma e sisiba henidia; bona e haduadia, eto, Ina uru gageva-gagevana amo ba roho mauri.
41 Bena erena e abia dae taudia na bapatiso e abia; una dina tamona ai taunimanima daha toi sisivana na edia orea ai e vareai.
42 Bena idia na aposetolo edia hahediba heboudia ai e noho taritariva; aniani danu e bitu hebouva, bona e ḡuriḡuri hebouva danu.
43 Gari ese iboudiai e butudia tao; bona hoa karadia bona toa diaḡau aposetolo ese e kara.
44 Bena abidadama taudia e noho hebou, bona ḡau iboudiai e abi hebou.
45 Edia kohu bona edia tano danu eha hoi, davadia e hari hagau-hagau, ta ta ena dabu ena dabu heḡereḡeredia.
46 Dina iboudiai mai lalodia tamona e hebou, Dubu Helaḡa lalonai; bona edia ruma ai e aniani hebou mai moaledia ida bona mai lalodia tamona ida,
47 Dirava e imodaia danu. Taunimanima ese e lalo namo henida; bona Lohiabada ese e hamauridia taudia na dina iboudiai dekedia ai e haboudia.