12
1 Taravatu bona haheḡani bini, Iehova, senemui edia Dirava, vada e henimui tanona ai ba badinadia namonamo, tanobada ai ba mauri noho dinadia iboudiai.
2 Gabudia bavabi besedia edia dirava e toma henidia dihomu gabudia iboudiai ba habuadia tari, ororo badadia ai bona ororo maraḡidia ai bona au mauridia henudiai.
3 Edia ihaboulaina patadia ba ḡiḡidia dobi; edia pupu nadidia ba hamakohidia rohoroho; edia au helaḡadia ba. doudia; edia kaivakuku ba hamakohidia, bona ladadia ba roho una gabu ai.
4 Iehova emui Dirava, na unu basio kara henia toma.
5 A Iehova, emui Dirava, ese gabu ta baine abia hidi, emui iduhu iboudiai lalodia amo, unuseni ai ladana baine atoa, bona unuseni ai baine noho. Una gabu ba tahua;
6 bena ba lao henia, emui ḡole-oho bouboudia, bona emui boubou idauidaudia, bona emui karoa ihagwautadia, bona emui dudui-isi ḡaudia, bonaemui gwauhamata ḡaudia, bona emui herahia ḡaudia, bona emui boromakau natudia roboadia, bona emui mamoe natudia roboadia, iboudiai ba laohai.
7 Unuseni ai danu Iehova, emui Dirava, vairanai bavaniani, bona ba moale hebou, emui ḡaukara iboudiai lalodiai, umui bona emui ruma taudia, badina be Iehova, emui Dirava, ese vada e hanamomui.
8 Harihari iniseni ai ta karamu karadia na unuseni ai basio kara. Iniseni ai ta ta ena ura ena ura ta karamu,
9 badina be emui laḡa-ani gabuna bonaemui tano korikori, Iehova, emui Dirava, ese baine henimui gabuna, na do asio kau.
10 A Ioridane sinavaina unukahana ai ba hanai, Iehova, emui Dirava, ese baine henimui emui tano korikori ai ba halaoa tanona; bena ia ese inaimui bogaragidia amo baine hamaurimui ela bona mai mainomui ida ba noho;
11 una negana ai vada na haḡailaimui ḡaudia iboudiai ba laohaidia, Iehova, emui Dirava, ese, ia ladana unuseni ai baine mia totona, baine abia hidi gabuna ai: emui ḡole-oho bouboudia, bona emui boubou idau-idaudia, bona emui karoa ihagwautadia, bona emui dudui-isi ḡaudia, bona emui gwauhamata ḡaudia, Iehova ena.
12 Una negana ai umui na Iehova, emui Dirava, vairanai ba moale hebou, umui bona natumui mamaruanedia bona natumui hahinedia, bona emui hesiai taudia bona emui hesiai hahinedia; bona Levi tauna emui hanua ai e nohomu danu, badina be ia na asi ahuna bona asi ena tano umui bogaragimui ai.
13 Nahuamui ba toho, emui ḡole-oho bouboudia na basio hahelaḡadia gabu kavakava ai,
14 a Iehova ese emui iduhu bogaragidia amo baine abia hidi gabuna ai mo; unuseni ai emui ḡole-oho bouboudia ba hahelaḡadia, bona unuseni ai na haḡanilaimuimu karadia iboudiai ba kara.
15 Ḡau tamona, emui hanua idau-idau iboudiai lalodiai, mauri ḡaudia haida, uda nanidia bona dia na heheto, bavaladia diba, bona hidiodia bavani, emui ura heḡereḡerena, bona Iehova, emui Dirava, ese ena hahenamo vada e henimui heḡereḡerena; vada e taubu taudia bona asie taubu taudia bae ani diba.
16 A mai raradia na basio ani; rara na tano ai ba hahebubua, ranu na heto.
17 Ini na basio ani diba, emui hanua idau-idau iboudiai lalodiai: emuiuit eiava emui vine ranuna eiava emui dehoro karoadia ihagwautadia, eiava emui boromakau eiava emui mamoe natudia roboadia, eiava emui gwauhamata ḡaudia eiava emui herahia ḡaudia eiava emui dudui-isi ḡauna.
18 A Iehova, emui Dirava, vairanai bavani, Iehova, emui Dirava, ese baine abia hidi gabuna ai, oi bona natumu maruanena bona natumu hahinena, bona emu hesiai tauna bona emu hesiai hahinena, bona Levi tauna emu hanua ai e nohomu; bona emu ḡaukara iboudiai lalodiai ba moale.
19 Nahuamu ba tohoa, Levi tauna basio reaia, emu tano ai ba noho dinadia iboudiai.
20 Iehova, emui Dirava, ese emui tano baine habadaia, vada e gwau henimui hamata heḡereḡerena, bena gado dainai baoto “Lau na vamu baina ania”, una negana ai vamu do bavania, emui ura heḡereḡerena.
21 Iehova, emui Dirava, ese baine abia hidi bona ladana baine nemailaia gabuna bema daudau, emui boromakau eiava emui mamoe, Iehova ese vada e henimui ḡaudia, bavaladia diba, vada na haḡanimui heḡereḡerena; bena emui hanua ai bavani, emui ura heḡereḡerena.
22 Uda nanina eiava dia boma ani heḡereḡerena, unu danu bavani; vada e taubu bona asie taubu taudia bae ani diba.
23 Ḡau tamona, mai raradia basio ani; badina be rara be mauri, bona mauri be hidio ida basio ani.
24 Basio ania; tano ai ba bubua, ranu na heto.
25 Basio ania, bena ba namo, umui bona natumui umui murimui ai, Iehova vairanai o kara maoromaoromu dainai.
26 To, emui ḡau helaḡadia bona emui gwauhamata ḡaudia vada ba laohaidia, Iehova ese baine abia hidi gabuna ai;
27 bona emui ḡole-oho bouboudia hidiodia bona raradia naIehova, emui Dirava, ena ihaboulaina patana ai ba hahelaḡadia. Bena emui boubou ḡaudia raradia na Iehova emui Dirava ena ihaboulaina patana ai ba sei, a hidiodia be bavani.
28 Nahuamui ba toho, ini na haḡanilaimuimu herevadia iboudiai na karadia ba kara; bena ba namo, natumui danu umui murimui ai bae namo hanaihanai, kara namodia bona kara maoromaorodia Iehova, emui Dirava, vairanai o karamu dainai.
29 Iehova, umui Dirava, ese gabudia bavabi besedia baine negedia daure, bena umui ese gabudia bavabi bona edia tano ba noholaia;
30 una negana ai nahuamui ba toho, idia do bae hebua tari murinai edia dala ai ba raka na garina, bona edia dirava ba herevalaidia, baoto “Ini bese na edia dirava ede e toma henidia diho tomamu Lau danu unu baina kara toma”, na garina.
31 Iehova, emui Dirava, na unu basio kara henia toma; badina be lebulebu karadia iboudiai Iehova ese e inai henimu be idia ese vada e kara, edia dirava ihanamolaidia; oibe, natudia mamaruanedia bona natudia hahinedia na lahi ai e haḡoledia oho, edia dirava ihanamolaidia.
32 Vada na henimui haheḡanidia iboudiai ba badinadia namonamo; latadiai hereva ta basio atoa kau, bona edia amo hereva ta basio kokia.