17
1 Boromakau ta eiava mamoe ta mai bebeka-bebekana eiava mai enadika ta basio hahelaḡaia Iehova, emui Dirava, ena: badina be una na kara dika-rohorohona Iehova, emui Dirava, vairanai.
2 Tau ta eiava hahine ta boma davaria bogaragimui ai, Iehova, emui Dirava, ese baine henimui hanuadia ta lalonai, Iehova, emui Dirava, vairanai vada e kara havara ena taravatu vada e tataia utu,
3 dirava idaudia isiaidia vada e lao heni bona vada e toma henidia diho, eiava dina eiava hua eiava hisiu vada e toma henidia diho, unu amo egu taravatu vada e tataia utu,
4 bena haida ese bema hamaorolaimui: ba kamonai negana ai anina do ba tahua malaka-malaka. Bena boma diba momokani una kara dika-rohorohona vada e karaia Israel ai,
5 una kara dikana e karaia tauna eiava hahinena na hanua ikoukouna murimurinai ba hakaua lasi, bena nadi amo ba hodoa mase.
6 Dibadia taudia rarua eiava tatoi edia hahebade dainai una tau eiava una hahine ba hodoa mase; a tau tamona ena hahebade dainai basio hodoa mase.
7 Dibadia bena e habadea taudia ese bae hodoa guna; idia muridiai taunimanima iboudiai ese bae hodoa, ela bona baine mase. Unuhetomana, dika na bogaragimui amo ba negea daure.
8 Daradara bema vara, daika ese rara e haida; hahebubua, eiava daika ena hahebade na momokani, eiava daika ese heatu e matamaia, bona hanua taudia ese danu bema hepapahuahulaia; bena ba tore isi, Iehova, emui Dirava, ese baine abia hidi gabuna baola,
9 hahelaḡa taudia Levi iduhuna amo bona hahemaoro dagina enai e miamu tauna vairadiai ba gini, ba nanadaidia. Bena idia ese bae haeroa bona) na bae haere henimui.
10 Bena Iehova ese baine abia hidi gabuna amo bae haere henimui herevana ba bavabia dae, bona bae gwaurai henimui karadia iboudiai ba kara,
11 bae haduamui heḡereḡerena ai bona bae haere henimui eḡerena ai mo ba kara. Edia hahemaoro herevana amo basio raka siri, idiba kahana ai eiava lauri kahana ai.
12 A tau ta bema hekokoroku, hahelaḡa tauna, Iehova, emui Dirava, vairanai e ginimu bona isiaina e lao henimu tauna, basine kamonai henia, eiava hahemaoro tauna basine kamonai henia, una tau baine mase; unu amo kara dika na Israel ena amo ba negea daure.
13 Bena taunimanima iboudiai bae kamonai, bena bae gari, bona basie hekokoroku lou.
14 Iehova, emui Dirava, ese baine henimui tanona ai ba kau, bavabia, emui tano korikori ai ba halaoa, bona ba noholaia; una negana ai boma ura pavapava ta ba haginia, e noho hetabiramu besedia na heheto,
15 Iehova emui Dirava, ese baine abia hidi tauna na emui pavapava ai ba halaoa. Emui bese tauna ta bavabia, emui pavapava ai ba halaoa; idau bese tauna ta, basio abia.
16 Ḡau tamona, ia ese ena hosi basine hahohodia, bona ena orea taudia basine siaidia lou Aigupto ai, hosi ihahohodia totona. Badina be Iehova ese vada e hereva henimui, eto “Nega ta una dala amo basio lou lao”.
17 Adavana danu basine hahohodia, idia ese lalona bae ania na garina; bona silver momo bona gold momo basine habou.
18 Ena basileia teronona ai baine helai negana ai, ia ese ina taravatu buka ta ai baine torea, hahelaḡa taudia, Levi iduhuna amo, edia taravatu bukana amo baine torea hanai.
19 Buka na dekenai baine mia, bona ena mauri dinadia iboudiai baine duahia. Unu amo Iehova, ena Dirava, imatauraina ai baine manada, bona ina taravatu bona ini haheḡani baine badinadia bona karadia baine kara.
20 Lalona danu basine hekokoroku, ena bese taudia basine dadaraidia, bona haheḡani amo basine raka siri, idiba kahana ai eiava lauri kahana ai; bena ena mauri dinadia bae hoho bona natuna edia mauri dinadia bae hoho, ena basileia Israel ai.