1 Taunimanima bae heai, bena hahemaoro gabuna baela, hahemaoro taudia ese bae hahemaoro henidia; asi ena kerere tauna na bae kahua nege, bona kerere tauna na ena dika davana bae henia. 2 Kerere tauna davana bema hedadaba, hahemaoro tauna baine hahedua, bena ia vairanai; kerere tauna bae hagorua diho bona bae kwadia, nega hidaosi, ena kerere metauna heḡereḡerena. 3 Bae kwadia diba ela bona nega hari-ahui, a hari-ahui basie hanai, bae kwadia momo ela bona bae hadikaiana garina.

4 Boromakau ese uit e moimoilaiamu negana ai na uduna basio ḡuia.

5 Tadikaka bae noho hebou, bena ta baine mase asi natuna, vabu na idau tauna ta basine adavaia. Ihana na ia dekenai baine raka vareai, baine adavaia; vabu ihana ena kara korikori baine karaia. 6 Bena natudia roboana na mase tauna dihina ai bainela, unu amo ia ladana basine boio Israel ai. 7 A ihana na iabina basinema ura, hari vabu na hanua tau-badadia dekediabainela, hanua ikoukouna ai; baineto “Ihagu na se uramu tadikakana dihina baine havaraia Israel ai; vabu ihana ena kara ikarana ai e gwau edeedemu”, 8 Bena hanua tau-badadia ese una tau bae boiria, bae hereva henia. Benaena hereva bema ha-aukaia, bema toma “Lau na iabina asina uramu”, 9 vabuna baine raka kahira, hanua tau-badadia vairadiai una tau ena tamaka na aena amo baine veria oho, bona vairana baine kanudia, baineto “Tadikakana garana basine havaradia tauna na ene baine heto”. 10 Bena una tau ena ruma na Israel ai ladana bae hatoa “Tamaka veri-oho tauna ena ruma”.

11 Tatau rarua bae heatu, bena idia ta adavana baine raka kahira, adavana na e heatu heniamu tauna imana amo baine hamauria totona, bena imana baine toia roro, una tau na usina eiava abona amo baine abia, 12 una hahine na imana ba utui oho; basio bogaia hisi.

13 Emu moda ai metau hahetoho ḡaudia rua, momokanina bona koikoina, ruaosi basio uda hebou. 14 Emu ruma ai danu efa* rua, momokanina bona koikoina, basie mia. 15 Emu metau hahetoho ḡauna baine maoromaoro, bona emu efa baine maoromaoro; bena emu mauri dinadia bae hoho, Iehova, emu Dirava, baine henimu tanona ai. 16 Badina be kara koikoidia unuhetomadia e karamu taudia na Iehova, emu Dirava, ese e dadaraidiamu.

17 Ba laloa tao, Amalek ese ede e karamui toma, Aigupto amo o raka Iasi negana ai. 18 Dala ai e davarimui, taumui e boerava bona e manoriva negana ai, bena e manokava dainai murimui ai e raka heveriveriva taudia na e aladia mase; ia na Dirava garina se gariva. 19 Taunabunai, Iehova, emui Dirava, ese inaimui iboudiai bogaragidiai laḡa-ani baine henimui, Iehova, emui Dirava, baine henimui emui tano ai ba halaoa tanona ai. Una negana ai Amalek ilalolaina ba rohoa oho, guba henunai. Basio laloa boio.