1 Una dala amo ta raka siri, Basan dalana amo tala; bena Og, Basan pavapavana, e raka lasi, mai ena orea taudia iboudiai, Edrei ai e tuari henida. 2 A Iehova ese e hereva henigu, eto, Ia garina basio gari; badina be ia bona ena orea taudia iboudiai bona ena tano na oi imamu ai vada na atodia; Sihon, Amoro pavapavana, Hesebon ai e nohova tauna, o kara henia heḡereḡerena, ina tau danu unu ba kara henia toma. 3 Taunabunai, Iehova eda Dirava ese Og, Basan pavapavana, mai ena orea taudia iboudiai ida, ita imada ai e atodia; bena ta hadarerea vaitani, ena orea tauna ta se roho mauri. 4 Una negana ai, ena hanua iboudiai ta abidia, hanua ta asita reaia; ta abi hanuadia iboudiai na tauratoi-ahui, Aragob tanona ai; Og, Basan pavapavana, ena basileia bunai. 5 Ini hanua iboudiai na mai maḡudia bona mai ikoukoudia bona mai ikahidia ida; hanua maraḡidia; si maḡudia danu diaḡau ta abidia. 6 Bena ta habuadia tari, Sihon, Hesebon pavapavana, ta kara henia heḡereḡerena; hanua ta ta lalodiai tatau bona hahine, memero bona kekeni, ta aladia ore; 7 a edia boromakau bona edia kohu ta abidia, eda. 8 Una negana ai Amoro pavapavadia raruosi edia tano ta abi, Ioridane sinavaina unukahana ai, Aranon kourana amo ela bona Heremon ororona. 9 (Hari Heremon ororona na Sidono taudia ese ladana e hatoamu “Sirion”, a Amoro taudia ese ladana e hatoamu “Seniri”). 10 Ororo doridia hanuadia iboudiai ta abidia, bona Gilead tanona idoinai bona Basan tanona idoinai, ela bona Saleka bona Edrei: Og, Basan pavapavana, ena hanua bunu. 11 (Hari Og, Basan pavapavana, na Refaim tauna; Refaim taudia iboudiai vada e mase ore, ia mo noho. Ena mahuta patana na auri amo e karaia; ḡauna na do mia Raba ai, Amono taudia edia tano ai. Vaevae ita Israel tauda eda kiubit amo e hahetohoa, ena lata na kiubit taurahani-ta, bona ena lababana kiubit hani.)*

12 Una negana ai ta abia tanona, Aroere, Aranon kourana isena ai e miamu hanuana, amo, bona Gilead ororodia kahana mai hanuadia ida, lau ese Ruben iduhuna taudia bona Gad iduhuna taudia na henidia. 13 A Gilead kahana bona Basan, Og ena basileia, idoinai, Aragob tanona idoinai mai Basan ida, lau ese Manase iduhuna kahana taudia na henidia. (Una Basan tanona na ladana e hatoamu “Refaim taudia edia tano”. 14 Iairi Manase ese Basan tanona, Aragob tanona idoinai ela bona Gesuru taudia edia tano bona Maakata taudia edia tano, e abia, unu tano hanuadia ladadia e hato “Havoto-iairi”, ia inemaina; ladana na unu e hatoa tomamu emabona hari.) 15 Gilead tanona na Makiri na henia; 16 bona Gilead ela bona Aranon kourana na Ruben iduhuna taudia bona Gad iduhuna taudia na henidia; edia tano hetoana na koura bogaragina amo ela, ela bona Iabok sinavaina, Amono taudia edia tano hetoana. 17 Araba taorana danu na henidia, hetoana na Ioridane sinavaina, Kinerete† gohuna amo ela bona Tadi Gohuna, taora ai, bona Pisga ororona badi-tanona mairiveina kahana ai.

18 Una negana ai na haḡanimui, nato: Iehova ese ina tano vada e henimui, emui. Emui goada taudia iboudiai na edia tuari ḡaudia bae abi, tadikakamui Israel taudia vairadiai. 19 A adavamui bona natumui bona emui boromakau - dibagu emui boromakau na momo - vada na henimui hanuadia ai bae noho, 20 ela bona Iehova ese tadikakamui na laḡa-ani baine henidia, bona umuidanu laḡa-ani baine henimui. Bena Iehova ese be henidiamu tanona Ioridane sinavaina unukahana ai na idia ese bae abia, edia tano; bona umui na iboumui ai ba lou lao, vada na henimui tanona ai ba noho.

21 Una negana ai Iosua na haḡania, nato, Iehova, emu Dirava, ese ini pavapava raruosi ede e karadia toma na matamu amo vada o itaia; benaini, ba lao henidia basileiadia danu unu baine karadia toma. 22 Idia garidia basio gari; Iehova, emu Dirava, ese oi daimu ai baine tuari.

23 Una negana ai danu lau ese Iehova na noia, nato, 24 Ḡaubada Iehova e, oi na emu siahu bona imamu ena goada toadia vada o haheitalaigu matama; badina be edena dirava, guba ai eiava tanobada ai, ḡaukara badadia bona siahu toadia ikaradia mai dibana, oi heḡereḡeremu? 25 Iehova e, mani emu kara bama raka hanai, taora namona Ioridane sinavaina unukahana ai bona ororo tanodia namodia ela bona Lebanon bama itadia. 26 A Iehova ese e badu henigu, umui daimui ai; bena se kamonai henigu. Ia ese e haere henigu, eto, Vadaeni, ena hereva na basio gwauraia lou. 27 Pisga ororona ba dara dae, dorina ai ba gini, ba roha lao, tano na matamu amo ba itaia, lahara kahana ai, mirigini kahana ai, diho kahana ai, mairiveina kahana ai; badina be ina Ioridane sinavaina na basio hanaia. 28 A Iosua ba haḡania bona ba hagoadaia, bona lalona ba ha-aukaia; badina be ia ese ina besetaudia baine hakaudia hanai, Ioridane sinavaina unukahana ai; bena oi ese matamu amo ba itaia tanona na ia ese baine henidia, edia tano. 29 Taunabunai, ita na koura ai ta taruha, Bete-peoro hevaira hehenina ai.