1 Ini hahenamo bona heuduguirai herevadia vada na gwaurai henimui na anidia iboudiai do bae vara vaitani negana ai umui do ba helalo. Iehova, emui Dirava, ese bese idau-idau bogaragidiai baine hakarohomui rohoroho gabudia ai. 2 Bena Iehova, emui Dirava, ba lou henia, ia erena ba kamonai, ena haheḡani iboudiai hari ina dina ai vada na gwaurai henimui na ba badinadia, umui bona natumui danu, mai lalomui idoidiai bona mai laumamui idoidiai. 3 Bena Iehova, emui Dirava, ese baine hamaurimui, baine bogamui hisi; bena Iehova, emui Dirava, ese bese idau-idau bogaragidiaie hakarohomui rohoroho gabudia amo ma baine haheboumui lou. 4 Ena be taunimanima haida be guba dokona henuna ai e nohomu, to ia ese unu amo baine haheboumui bona unu amo baine hakaumui mai. 5 Iehova, emui Dirava, ese senemui edia tano ai ma baine hakaumui vareai; bavabia, emui tano. Ia ese baine hanamomui bona baine hahutumamui, ela bona senemui edia hutuma ba hereaia. 6 Iehova, emui Dirava, ese umui lalomui bona garamui lalodia baine hahelaḡadia; bena ba lalokau henia mai lalomui idoidiai bona mai laumamui idoidiai; bena vada ba mauri. 7 Bena Iehova, emui Dirava, ese ini heuduguirai iboudiai na inaimui latadiai bona e badu henimui, e daḡedaḡe henimui, taudia latadiai baine gwaurai. 8 A umui na Iehova erena ma ba kamonai, bona ena haheḡani iboudiai, hari ina dina ai na haḡanilaimui, ḡaudia, na ba badinadia. 9 Bena Iehova, emui Dirava, ese baine hanamomui; imamui ḡaukaradia anidia baine habada, bona garamui baine hahutumadia, bona emui seri baine hahohodia, bona emui taboro baine habada. 10 Iehova, emui Dirava, erena boma kamonai, ena haheḡani bona ena taravatu, ina taravatu bukana ai vada e hetore ḡaudia, na boma badinadia, bona Iehova, emui Dirava, boma lou henia mai lalomui idoidiai bona mai laumamui idoidiai ida, ia ese unu baine karamui toma.

11 Badina be hari ina dina ai na haḡanilaimui haheḡanina na dia auka herea bona dia daudau herea. 12 Ḡauna na dia guba ai; ta basioto “Daika ita daidai baine dae guba ai, baine mailaia edai, bena baita kamonaia bona karana baita karaia?” 13 Ḡauna na dia davara unukahana ai; ta basioto “Daika ita daidai bainela davara unukahana ai, baine mailaia edai, bena baita kamonaia bona karana baita karaia?” 14 A ḡauna na badibadimu ai, bona udumu ai, bona lalomu ai, karana ba karaia totona.

15 0 itaia, hari ina dina ai mauri bona namo, bona mase bona dika, vairamui ai vada na atodia. 16 Hari ina dina ai vada na haḡanimuimu, Iehova, emui Dirava, ba lalokau henia, ena dala ai ba raka, bona ena haheḡani bona ena taravatu bona ena hahemaoro herevadia ba badinadia; unu amo ba mauri, bona ba hutuma, bona Iehova, emui Dirava, ese baine hanamomui, ba raka vareai bona emui tano ai ba halaoa tanona lalonai. 17 A lalomui bema auka bona taiamui bema kudima, bena haida muridia amo baola, dirava idaudia ba toma henidia diho bona isiaidia ba lao heni, 18 lau ese hari dina ai na hamaoromui gunamu, vada ba mase; Ioridane sinavaina ba hanaia, unukahai tano ta bavabia emui tano ai ba halaoa tanona lalonai emui mauri dinadia basie hoho. 19 Guba bona tanobada na boi henidiamu, lau na habadelaimuimu herevadia na hari dina ai idia ese bae hamomokani: lau na mauri bona mase, bona hahenamo bona heuduguirai, na vairamui ai vada na atodia. Taunabunai, mauri bavabia hidi; bena umui ba mauri, bona garamui bae mauri; 20 bena Iehova, emui Dirava, ba lalokau henia, bona erena ba kamonai, bona ba badinaia tarika-tarika. Badina be ia na emui mauri, bona ia bagunai emui mauri dinadia bae hoho, Iehova ese senemui, Abraham bona Isaak bona Iakob, e gwaurai henidia hamata baine henidia eto tanona ai do ba noho.