7
1 Lada namona ese dehoro namo-hereana e hereaiamu,
bona mase dinana ese vara dinana e hereaiamu.
2 Taitai rumana ilao-henina be namo,
aria rumana ilao-henina na dika;
badina be taunimanima iboudiai ini e doko tomamu,
bona mauri taudia ese bae helalolaia.
3 Lalo-hisihisi ese kiri e hereaiamu;
badina be vaira ḡegeva ese lalona e hamoaleamu.
4 Aonega taudia lalodia na taitai rumana ai,
a kavakava taudia lalodia na kiri rumana ai.
5 Aonega tauna ena gwau-gwau e hakala heniamu tauna be namo,
kavakava taudia edia ane e kamonaimu tauna na dika.
6 Kavakava taudia edia kiri na
au ginigini uro henunai e aramu reḡedia na heheto;
ina danu asi anina.
7 Momokani, hahehisi ese aonega tauna e hakavaiamu.
bona koikoi henitaona ese lalona e hamiroamu.
8 Kara dokona ese kara matamana e hereaiamu,
bona lalo-manau ese lalo-heaḡi e hereaiamu.
9 Basio badu haraḡa,
badina be badu ese kavakava taudia lalodia e noho henidiamu.
10 Basioto “Dahaka dainai nega gunadia ese ina nega e hereaia?”
Badina be dia aonega amo so henanadaimu.
11 Kohu iabina mai aonegana ida be namo,
dina e itaiamu taudia ihanamodia;
12 badina be aonega ena hegima na moni ena hegima na heto,
bona lalo-parara ena hahenamo be aonega ese lalo-parara tauna e naria balahenimu.
13 Dirava ena ḡaukara ba haeroa:
ia ese vada e hagagevaia ḡauna na daika ese baine hamaoromaoroa.
14 Emu namo e badamu dinana ai ba moale, bona emu dika e badamu dinana ai ba laloa, Dirava ese unu ruaosi vada e karadia, taunimanima na basie diba dahaka dahaka ia murinai bae vara helaoreana.
15 Egu mauri asi anina lalonai, ḡau iboudiai vada na itadia: kara maoromaoro tauna na ena kara maoromaoro ai e masemu, bona kara dika tauna na ena kara dika ai ena mauri e hadaudauamu.
16 Metaira ba kara maoromaoro, metaira ba aonega; sibomu ba heala anina be dahaka?
17 Metaira ba kara dika, bona basio kavakava; emu nega do basine ore ai vada ba mase anina be dahaka?
18 Ina na ba kahua tao bona una na basio kahua nege be namo; badina be Dirava garina e garimu tauna na idia iboudiai bogaragidia amo baine raka lasi.
19 Aonega ese aonega tauna e hagoadaiamu; bena ia ese hanua lohiadia gwauta e hereadiamu.
20 Momokani, asi kara-maoromaoro tauna ta tanobada ai e kara namomu mo, bona nega ta se kara dikamu.
21 Taunimanima edia hereva iboudiai basio hakala henidia, emu hesiai tauna baine uduguiraimu bena ena hereva ba kamonai na garina.
22 Lalomu ai vada o diba, nega momo oi ese haida na vada o uduguiraidia.
23 Ina idoinai aonega amo vada na tohoa. Lau nato “Baina aonega”; to aonega egu amo na idauhai.
24 E miamu ḡauna na idauhai; ia na dobu, dobu masemase. Daika ese baine davaria diba?
25 Lalogu na haloua, baina diba, bona aonega bona ḡau badidia baina tahudia; bona kara dika ena kavakava bona kavakava ena kava kukuha baina dibadia.
26 Bena ḡau idita-hereana ta na davaria, mase iditana e hereaiamu ḡauna; una ḡau be lalona na idoa bona huo bona imana na gadea hahinena. Dirava e hamoaleamu tauna na iena amo e roho maurimu; a kara dika tauna na ia ese e abiamu.
27 Haroro Tauna e tomamu: A itaia, ina na vada na davaria. Lalo-hadai idau-idau vada na haboudia, ede bae hatamona toma;
28 Ialogu ai vada na tahua loulou, to asina davaria. Daha ta lalodia amo tau tamona na davaria, a ini iboudiai lalodia amo hahine ta asina davaria.
29 A itaia, ina mo vada na davaria: Dirava ese taunimanima e karadia mai edia maoromaoro, a idia ese dala idau-idau vada e tahudia.