18
Kara dika tauna laumana baine mase
1 Iehova ena hereva egu ai ma e kau, eto:
2 Badina be dahaka ina hereva lada-isina o gwauraia louloumu, o tomu
“Tama ese vine huahuadia kasiridia vada e ani,
bona natudia isedia e urimu”?
3 Ḡaubada Iehova na e tomu: Lau na maurimu heḡereḡerena, ina hereva lada-isina na basio gwauraia lou Israel ai.
4 A itaia, lauma iboudiai na lauegu, tama laumana bona natuna laumana danu; kara dika tauna laumana na baine mase.
5 Tau ta ena kara bema maoromaoro, taravatu ibadinana ai bona kara maoromaoro ikaradia ai bema noho,
6 ororo ai basinema aniani eiava Israel besena kaivakukudia basinema gaga dae henidia; dekena tauna adavana basinema kara miro henia eiava hahine ta na ena rara-kara dinadia ai basinema raka kahi henia;
7 ta na basinema hahisia, a abitorehai tauna ena abitorehai toana bema henia lou; kohu basinema dadi; hitolo taudia bema ubudia bona asi dabuadia taudia bema hadabualaidia;
8 moni basinema heni torehai mai heatokauna eiava heatokau monidia haida basinema abi; imana na kara havara amo bema rua; taunimanima padadiai hahemaoro ḡoevaḡoevana bema karaia;
9 egu taravatu daladia ai bema raka bona egu hahedua herevadia bema badinadia ḡoevaḡoeva: una tau na kara maoromaoro tauna; momokani ia na do baine mauri. Ḡaubada Iehova na e herevamu.
10 Natuna maruanena ta bema havaraia, bena una mero na dadidadi bona rara ihahebubuna tauna ai bema hahelao,
11 bona ini ḡaukara iboudiai basiema kara, a ororo ai bema aniani, dekena tauna adavana bema kara miro henia,
12 ogoḡami taudia bona e dabumu taudia bema hahisidia, kohu bema dadi, abitorehai toana basinema heni lou, kaivakuku bema gaga dae henidia, kara dika-rohorohodia bema kara,
13 moni bema heni torehai mai heatokauna, bona heatokau monidia haida bema abi: una tau be baine mauri a? Ia na basine mauri. Ini ḡau dika-rohorohodia iboudiai vada e kara; momokani, ia na baine mase; ia rarana na ia sibona latanai.
14 A ina tau ese natuna maruanena ta bema havaraia; bena natuna ese tamana ena kara dika iboudiai bema itadia, bena bema gari, bona unu kara heḡereḡeredia ai basinema kara,
15 ororo ai basinema aniani, eiava Israel besena kaivakukudia basinema gaga dae henidia, dekena tauna adavana basinema kara miro henia,
16 tau ta basinema kara dika henia, abitorehai toana basinema abia, kohu basinema dadi, a hitolo taudia bema ubudia bona asi dabuadia taudia bema hadabualaidia,
17 imana na kara havara amo bema rua, abitorehai heatokauna eiava heatokau monidia haida basinema abi, egu hahedua herevadia bema badinadia bona egu taravatu daladia ai bema raka: una tau na tamana ena kara havara dainai basine mase; momokani ia na do baine mauri.
18 A tamana, badina be moni na gwaurai-lagau amo e abiva, bona tadikakana ena kohu e dadiva, bona ena bese taudia bogaragidiai kara dia nanamo e karava, ia na ena kara havara dainai do baine mase.
19 Ḡau tamona, umui na o tomu “Dahaka dainai natuna basine hisihisi tamana ena kara havara dainai?” Natuna na taravatu lalonai baine ḡaukara bona baine kara maoromaoro, bona egu taravatu iboudiai baine badinadia namonamo, negana ai, momokani ia na do baine mauri.
20 Kara dika tauna laumana na baine mase. Natuna basine hisihisi tamana ena kara havara dainai, bona tamana basine hisihisi natuna ena kara havara dainai; kara maoromaoro tauna ena kara maoromaoro na ia sibona latanai, bona kara dika tauna ena kara dika na ia sibona latanai.
Dirava ena kara na maoromaoro
21 A kara dika tauna na ena kara dika iboudiai amo bema raka oho, bona egu taravatu iboudiai bema badinadia, bona taravatu lalodiai bema ḡaukara bona bema kara maoromaoro, ia na momokani do baine mauri; ia na basine mase.
22 Kerere iboudiai, ia ese e kara ḡaudia, na ta basie laloa tao ia latanai; ena kara maoromaoro dainai ia na baine mauri.
23 Ḡaubada Iehova na e tomu: Edena na moalelaiamu, kara dika tauna baine mase, eiava ena dala baine rakatania bena baine mauri, a?
24 A kara maoromaoro tauna ese ena kara maoromaoro e rakataniamu bona kara havara e karaiamu, bona kara dika-rohorohodia e karamu, kara dika tauna heḡereḡerena, negana ai, ia na baine mauri, a? Ena kara maoromaorodia ta basie Laloa tao; ena koikoi karadia bona ena kara dika daidiai, ia na baine mase.
25 Ḡau tamona umui na o tomu “Ḡaubada ena dala na dia maoro”. Israel besena e, a kamonai! Egu dala na dia maoro a? Lasi, umui emui dala hari dia mamaoro ani?
26 Kara maoromaoro tauna ese ena kara maoromaoro baine rakatania bena baine kara havara negana ai, ia na una kara havara dainai baine mase; ena kara havara dainai do baine mase.
27 Ina danu, kara dika tauna ese ena kara dika baine rakatania bena taravatu lalonai baine ḡaukara bona baine kara maoromaoro, ia ese ena mauri baine rauaia.
28 E helalo bena ena kara kerere iboudiai amo e raka oho dainai, ia na momokani do baine mauri; ia na basine mase.
29 Ḡau tamona, Israel besena na e tomu “Ḡaubada ena dala na dia maoro”. Israel besena e, egu dala na dia maoro a? Lasi, umui emui dala hari dia mamaoro ani?
30 Ḡaubada Iehova na e tomu: Taunabunai, Israel besena e, lau ese baina hahemaoro henimui, ta ta ena dala ena dala heḡereḡeredia. Ba helalo kerehai, emui kerere iboudiai amo ba raka siri, kara havara ese baine hadikamui vaitani na garina.
31 Emui kerere iboudiai, lau o kara henigu karadia, na ba negedia daure, lalo matamatadia bona lauma matamatadia bavabi. Israel besena e, ba mase anina be dahaka?
32 Badina be lau ese ta ena mase asina moalelaiamu; taunabunai, ba helalo kerehai, bena ba mauri. Ḡaubada Iehova na e herevamu.