35
Peroveta herevana Seiri ororona latanai
Iehova ena hereva na egu ai e kau, eto, Taunimanima natuna e, vairamu ba huaia Seiri ororona enai; bena ia latanai ba peroveta, baoto, Ḡaubada Iehova na ini e gwau tomamu: Seiri ororona e, a itaia, lau ese na inai henimumu. Lau imagu baina toia roro, oi ihadikamu totona; baina habuamu tari bona baina havahumu. Emu hanua na baina habuadia tari; oi na gabu ḡaḡaena ai ba hahelao; bena ba diba lau na Iehova. Badina be o daḡedaḡe hanaihanaiva, bona Israel taudia na dare ena siahu ai o atodia kauva, edia hisi-ani negana ai, edia dava-abi orena ai; una dainai, (Ḡaubada Iehova na e gwaumu), lau na maurimu heḡereḡerena ai lau ese baina haheḡaeḡaemu rara ena, bona rara ese baine hahavamu; badina be rara vada o hahebubua, una dainai rara ese baine hahavamu. Seiri ororona na baina havahua bona baina habuaia tari; bona lao mai taudia iboudiai na iena amo baina hadokodia dae. Emu ororo iboudiai na e aladia mase taudia ai baina hahonudia; dare amo bae aladia mase taudia na emu ororo ai bona emu koura ai bona emu koura dobudobudia iboudiai lalodiai bae hekida diho. Baina habuamu tari hanaihanai, bona emu hanua na haida ese basie noholaidia. Bena vada ba diba lau na Iehova.
10 Badina be oi oto “Ini bese ruaosi bona ini tano ruaosi na lau ese baina abidia, bena ai ese baia ḡaunaidia”, (gau tamona Iehova na unuseni ai); 11 una dainai (Ḡaubada Iehova na e gwaumu) lau na maurimu heḡereḡerena ai, oi ese o inai henidia dainai badu bona vaḡeḡe karadia o karalai henidia heḡereḡeredia ai lau ese baina kara henimu; bona bogaragimu ai baina hedinarai, baina hahemaoro henidia negana ai. 12 Bena ba diba, lau Iehova ese emu hereva, Israel ororodia o gonaḡonalaidia herevadia, iboudiai vada na kamonai; oto “Idia na vada e habuadia tari; vada e henimai, baia ha-oredia”. 13 Sibomu emu heaḡi vada o habadaia, lau ihadikagu herevadia vada o gwaurai; bona emu hereva vada o hahohodia, lau ihadikagu; lau vada na kamonai. 14 Ḡaubada Iehova na ini e gwau tomamu: Tanobada idoinai ihamoalena totona lau ese baina habuamu tari. 15 Israel ahuna latanai o moaleva, vada e hebua tari dainai, heḡereḡerena ai lau ese baina kara henimu; oi danu ba hebua tari, Seiri ororona bona Edom idoinai, oibe, idoinai. Bena idia bae diba lau na Iehova.