43
Iehova hairaina ese dubu e hahonua
Una murinai ia ese e hakaugu lao, mairiveina kahana e vaira henia ikoukouna ai. Bena Israel Diravana hairaina na itaia, mairiveina kahana amo ema. Ena mai reḡena na sinavai momo reḡedia na heheto; bena ia hairaina ese tanobada na e hakiama-kiamaia. Egu mata-hanai na hanua ihabua-tarina totona ema negana ai na mata hanailaia ḡauna bona Kebara sinavaina badibadinai na mata hanailaia ḡauna heḡereḡeredia. Bena tano ai na goru diho. Bena Iehova hairaina na mairiveina kahana e vaira heniava ikoukouna amo dubu ai e vareai negana ai, Lauma ese e abigu isi, laloma kahana maḡuna lalonai e laohaigu; bena na itaia, Iehova hairaina ese dubu vada e hahonua.
Una tau na badibadigu ai ginina ai, lau ese gado ta na kamonai, dubu lalona amo e hereva henigu; e hamaorogu, eto, Taunimanima natuna e, Egu terono bona ae-palapalagu imoina gabuna binai; iniseni ai baina noho hanaihanai, Israel taudia bogaragidiai. Israel besena taudia ese lau ladagu helaḡana basie hamiroa lou, idia bona edia pavapava edia ariara karadia amo, eiava edia pavapava tau-anidia masedia amo, eiava edia raka-vareaina na lauegu raka-vareaina bona edia iduara ihua-ihuadia na lauegu iduara ihua-ihuadia badibadidiai bae alodia, bena lau bona idia padamai ai na hehari maḡuna mo baine mia dainai. Edia kara dika-rohorohodia vada e kara dainai lau ladagu helaḡana vada e hamiroa, taunabunai lau ese egu badu garaḡarana ai vada na ha-oredia. Harihari edia kaivakuku itomadihohenidia bona edia pavapava tau-anidia masedia na bae negedia daure, bena lau na idia bogaragidiai baina noho hanaihanai.
Dubu bona Ihaboulaina Patana Taravatudia
10 Taunimanima nahma e, dubu ita-itana bona ilalo-hatana na Israel besena taudia ba hamaorolaidia, edia kara havara hemaraidia bae hemarai helaoreana. 11 Bena edia kara iboudiai hemaraidia bema hemarai, bena dubu bona ihaero-hatana, raka-lasina bona raka-vareaina, bona oromana idoinai, ba haheitalaidia, bona ena hahedua herevadia bona ena taravatu iboudiai ba hadibalaidia; idia vairadiai ba torea, bena idia ese ena taravatu bona ena hahedua herevadia iboudiai na bae badinadia bona karadia bae kara. 12 Dubu taravatuna binai ororo dorina tanona hegeḡemadai idoinai baine helaḡa herea. A itaia, dubu taravatuna bunai.
13 Ihaboulaina patana ihahetohona, kiubit amo e hahetohoa, binai. (Ini kiubit na kiubit ta bona ima-palapala lababana ta). Ia badina hara-latana na kiubit ta, bona lababana na kiubit ta; ia na mai isena, ohena idoinai e ḡeḡea ahu ḡauna, isena lababana na ima-kwakikwaki daḡana ta heḡereḡerena. Ihaboulaina patana harana latana na ini baine heto: 14 badina, tano ai, amo ela bona henu digina, kiubit rua, bona lababana na kiubit tamona; bona digi maraḡina amo ela bona digi badana, kiubit hani, bona lababana na kiubit tamona. 15 Ihaboulaina patana rahurahuna na kiubit hani; bona ihaboulaina patana rahurahuna amo doa hani e hagini, edia lata na kiubit tamona. 16 Hari rahurahu ena lata bona ena lababa bae heḡereḡere, lalana kiubit gwauta-rua bona lababana danu kiubit gwauta-rua. 17 Digina danu ena lata bona ena lababa bae heḡereḡere, latana kiubit gwauta-hani bona lababana kiubit gwauta-hani; isena danu baine geḡea ahu, ia lababana na kiubit duduna. Bona ia badina heḡeḡemadai ai na kiubit tamona. Ihaboulaina patana vadavadana na mairiveina kahana baine vaira henia.
18 Bena ia ese e hamaorogu, eto, Taunimanima natuna e, Ḡaubada Iehova na ini e gwau tomamu: Hahedua herevadia, ihaboulaina patana ena, bini. Ḡole-oho bouboudia na latanai bae hahelaḡadia bona rara bae nevarilaia totona bae haginia dinana ai, 19 Levi hahelaḡa taudia, Sadok ena iduhu taudia, kara helaḡadia ikaradia totona e raka henigu kahimu taudia, na boromakau maruanena ta ba henidia, kara dika iabi-ohona boubou ḡauna ai bainela. Ḡaubada Iehova na e herevamu. 20 Bena rarana kuri ta bavabia, ihaboulaina patana ena doa haniosi ba dahulaidia, bona digi daigunina haniosi danu, bona isena heḡeḡemadai ai; unu amo ihaboulaina patana ba haḡoevaia bona kara dika na iena amo bavabia oho. 21 Bena una boromakau maruanena, kara dika iabi-ohona ḡauna, na bavabia, vada e gwauraia hidi gabuna ai ba haḡolea oho, dubu tanona ai, to helaḡa gabuna murimurinai. 22 Bena dina iharuana ai, nani maruanena asi bebeka-bebekana ta ba hahelaḡaia, kara dika iabi-ohona ḡauna ai bainela. Unu amo ihaboulaina patana ma ba haḡoevaia, boromakau maruanena amo o haḡoevaia heḡereḡerena. 23 Ba haḡoevaia ḡuḡuru, bena boromakau maruanena asi bebeka-bebekana ta bona seri mamoe maruanena asi bebeka-bebekana ta ba hahelaḡadia. 24 Iehova vairanai ba heni, bena hahelaḡa taudia ese damena na latadiai bae ḡiḡi, bena bae haḡoledia oho, Iehova ena. 25 Dina hitu lalodiai, dina ta ta ai nani maruanena ta ba heni, kara dika iabi-ohona ḡauna ai bainela; bona boromakau maruanena ta bona seri mamoe maruanena ta asi bebekabebekadia, danu ba heni. 26 Dina hitu lalodiai boubou karadia bae kara, dika na ihaboulaina patana amo iabi-ohona bona ihaḡoevana totona; unu amo ba hahelaḡaia. 27 Unu dina bae haḡuḡurudia, bona dina ihataurahanina amo hahelaḡa taudia ese emui ḡole-oho bouboudia bona emui maino bouboudia ḡaudia na bae hahelaḡadia, ihaboulaina patana latanai; bena lau ese baina abimui dae. Ḡaubada Iehova na e herevamu.