3
Ḡuriḡuri karadia e hagini lou
Hua ihahituna e kau negana ai, Israel taudia na hanua lalodiai e nohova. Bena taunimanima na Ierusalem ela, e hegogo hebou, tau tamona na heto. Bena Iesua Iosadak, mai bamona hahelaḡa taudia ida, bona Serubabele Sealtiele, mai varavarana ida, e tore isi, Israel Diravana ena ihaboulaina patana e larebaia, ḡole-oho boubou ḡaudia na ia latanai bae hahelaḡadia totona, Dirava ena tau Mose ena taravatu ai e torea heḡereḡerena. Ihaboulaina patana na ena gabu ai e haginia, badina be gari ese e butudia tao, unu tano taudia daidiai; bena ḡole-oho boubou ḡaudia na ia latanai e hahelaḡadia Iehova ena, daba ai bona adorahi ai. Bona kalaga ariana e karaia, e torea heḡereḡerena, bona dina ta ta amo ḡole-oho boubou ḡaudia hahidaosi e hahelaḡadia, taravatu ese dina ta ta ahudia e gwaurai heḡereḡerena. Una murinai idia ese ḡole-oho boubou ḡaudia e hahelaḡadia loulouva, hua matamata bouboudia bona Iehova ena aria negadia korikoridia bouboudia, bona ta ta edia lalo-namo bouboudia, Iehova e heni ḡaudia, iboudiai danu. Hua ihahituna dinana gini-gunana ai idia ese ḡole-oho boubou ḡaudia e hahelaḡadia matama, Iehova ena. A Iehova ena dubu badina na do asie hadaia. Taunabunai, idia ese nadi iḡaukaralaidia taudia bona kamuta taudia na moni e henidia; bona aniani bona inuinu ḡaudia bona dehoro na Sidono bona Turo taudia e henidia, sida audia na Lebanon amo bae lasilaidia kone ai bona lopa ai bae atodia na davana, Kurese, Parasa pavapavana, ena gwau-maoro heḡereḡerena.
Dubu ihagini-louna e matamaia
Dirava ena dubu Ierusalem ai e lou henia laḡanina iharuana huana iharuana lalonai, Serubabele Sealtiele bona lesua losadak na e ḡaukara matama, tadikakadia oredia, hahelaḡa taudia bona Levi taudia, bona abi-mauri amo Ierusalem vada e lou henia taudia iboudiai ida. Idia ese laḡani ruahui vada e hanai taudia Levi oreana lalonai e duanaidia, idia ese Iehova ena dubu ḡaukarana bae itaia tao. Bena Iesua, mai natuna bona varavarana ida, bona Kadmiele mai natuna, Iuda vevena taudia, ida, ese Dirava ena dubu ai e ḡaukarava taudia na e itadia tao hebou, Henadab natuna bona Levi taudia mai natudia bona varavaradia ida.
10 Ruma-hagini taudia ese Iehova ena dubu badina e hadaia negana ai, hahelaḡa taudia ese edia dabua helaḡadia e hahedokilai, bena mai kibidia ida e raka kahira, bona Levi taudia, Asaf garana, mai edia botabota auridia ida, e raka ela, Iehova ihanamolaina totona, David, Israel pavapavana, ena haheḡani heḡereḡerena. 11 Bena ane e abi hadava-hadava, Iehova e imodaia bona e hahenamo henia, eto,
Badina be ia na namo;
Badina be ena hebogahisi e hesiriu hanaihanaimu, Israel enai.
Bena Iehova e hanamoa negana ai, taunimanima iboudiai na e lolo mai gao badadia ida, Iehova ena dubu badina vada e hadaia dainai. 12 A hahelaḡa taudia bona Levi taudia bona iduhu kwaradia loḡora, tau burukadia, dubu gunana e itaia taudia na e tai lolololo, ina dubu badina e hadaia e itaia negana ai; a hutuma na moale dainai e lolo badabada. 13 Taunabunai, taunimanima asie diba maoro dahaka reḡe, moale eiava taunimanima edia taitai reḡedia; badina be taunimanima na e lolo badabada, bona reḡena na dauhai danu e kamonaiva.