25
Iehova ese Mose e hereva henia Sinai ai
1 Iehova ese Mose e hamaoroa, eto,
2 Israel taudia ba hamaorodia, edia herahia ḡaudia bae henigu; lalodia e namomu taudia iboudiai edia herahia ḡaudia bavabi dae, egu.
3 Bavabi dae ḡaudia bini: gold bona silver bona auri labora-labora;
4 dabua vaiuridia bona mia-kakadia bona kakakakadia bona kurokurodia; nani huidia;
5 mamoe kopidia, e hakakakakadia ḡaudia, bona nani kopidia; kela audia;
6 lamepa diaranuna bona muramura mai bonadia bona e gabu muramuradia;
7 onuku nadidia bona hahelaḡa taudia edia dabua ihaheralaidia bona edia vaina ihaheralaidia nadidia.
8 Gabu helaḡana danu bae karaia egu, bogaragidiai baina noho helaoreana.
9 Dubu auta danu ba karaia; dubu bona dubu lalona ḡaudia iboudiai be lau ese baina hadibalaimu heḡereḡerena ai ba kara.
Maua Helaḡana
10 Maua ta danu bae karaia, kela reireidia amo; latana na kiubit rua mai kahana, lababana bona harana ena lata na kiubit ta mai kahana.
11 Lalona kahana gold amo ba lahasia, bona murina kahana gold amo ba ḡovaia, bona gold amo ba haheraia heḡeḡe.
12 Ring hani na gold amo ba kara, maua daigunina haniosi ai ba koko kau, kahana ai rua kahana ai rua.
13 Maduna danu ba kara, kela audia amo, bena gold amo ba ḡovadia.
14 Ini maduna na ring amo ba toi hanai, maua kahana kahana ai, ihualaina ḡaudia ai baela.
15 hari maduna na ring lalodiai do bae mia, basie veridia lasi.
16 Bena taravatu nadidia, baina henimu ḡauna, do ba udaia maua lalonai.
17 Ikaruhi ta danu gold namo-hereana amo ba karaia, ena lata kiubit rua mai kahana, ena lababa kiubit ta mai kahana.
18 Ikaruhi duduna duduna kerubi rua ba koro,
19 duduna ta kerubi ta ma duduna ta kerubi ta; ikaruhi bona kerubi raruosi na gold siri tamona amo ba kara.
20 Hari kerubi na hanidia amo ikaruhi bae hakerukerua; idia bae hevaira heheni, bona ikaruhi bae vaira henia.
21 Hari ikaruhi na maua latanai bavatoa kau, hebogahisi teronona ai bainela; bona taravatu nadidia, do baina henimu ḡauna, na maua lalonai ba udaia.
22 Unuseni ai baita hedavari: ikaruhi daenai, taravatu mauana latanai e miamu kerubidia raruosi padadia amo, lau ese baina hereva henimu; haheḡani iboudiai, Israel taudia ba henidia ḡaudia, na baina hadibalaimu.
Pata Helaḡana
23 Pata ta danu, kela audia amo ba karaia, latana na kiubit rua, lababana na kiubit ta, harana ena lata na kiubit ta mai kahana.
24 Gold amo ba ḡovaia, bona ba haheraia heḡeḡe.
25 Digina danu ba karaia, labalaba na tau ta imana palapalana heḡereḡerena, ia danu gold namo-hereana amo ba haheraia heḡeḡe.
26 Ring hani danu gold amo ba kara, pata aena haniosi ai ba koko kau.
27 Hari ring be pata digina henunai ba koko kau, maduna audia bae hetoi hanai.
28 Maduna danu kela audia amo ba kara, bona gold amo ba ḡovadia, pata ihualaina.
29 Pata ḡaudia danu, mereki bona nau bona bio bona kehere, iboudiai na gold namo-hereana amo ba kara.
30 Nega iboudiai flaoa helaḡana na una pata latanai baine hedabara lau vairagu ai.
Lamepa Patana
31 Lamepa patana ta danu ba karaia, gold namo-hereana amo. Aena bona duna na gold amo ba koro: aena bona duna bona kehere bona heraherana, bure bona huahua, iboudiai na gold siri tamona amo ba koro.
32 Rigina bae tauratoi, kahana toi kahana toi.
33 Rigi ta ena kehere bae toi, itadia sakada huahuadia na heheto, ta ta mai buredia bona mai huahuadia, rigi iboudiai.
34 Duna ai danu kehere bae hani, sakada huahuadia na heheto, ta ta mai buredia bona mai huahuadia.
35 Rigi rua rua amo danu buredia ta ta ba koro: rigi rua bure ta, rigi rua bure ta, rigi bure ta, rigidia henudia kahadia ai.
36 Hari rigi bona bure na gold namo-hereana sirina tamona amo ba koro.
37 Bena lamepa hitu ba kara, gabudia ai bavatodia, edia diari na pata vairana kahana bae hadiaria.
38 Ihaḡoevadia ḡaudia bona momorudia iudadia merekidia iboudiai na gold namo-hereana amo ba kara.
39 Hari lamepa patana, mai kohuna idoinai, ikaralaina gold-na ena metau be talent ta.
40 Ba heita, ini ḡau ba kara hari ina ororo ai emu ai vada eme hedinarai heḡereḡerena.