9
Hahehisi iha-imana: Ubu-ubu ḡaudia ihamasedia
1 Bena Iehova ese Mose e haduaia, eto, Farao dekenai ba raka vareai, ba hamaoroa, baoto “Iehova, Heberu taumai emai Dirava, ini e gwau tomamu: Egu orea taudia ba kahudia nege, bae toma henigu diho. ?
2 Badina be boma rudia, doene boma dogodia tao,
3 lau Iehova imagu na emu seri taora ai e nohomu latadiai baine kau, hosi latadiai bona doniki latadiai bona kamelo latadiai bona boromakau latadiai bona mamoe latadiai: gorere dikana ediai baine kau.
4 Lau Iehova ese Israel edia seri bona Aigupto edia seri baina hididia: Israel taudia edia ḡau ta basine mase”.
5 Bena Iehova ese nega e abia hidi, eto, Kerukeru lau Iehova ese unu baina kara toma ina tano ai.
6 Bena kerukeru Iehova ese unu e kara toma; bena Aigupto taudia edia seri iboudiai eha mase, a Israel taudia edia seri ai ḡau ta se mase.
7 Bena Farao ena hesiai taudia ese hereva e mailaia, Israel taudia edia seri ai ḡau ta se mase. A Farao ese lalona ma e ha-aukaia, Heberu taudia se kahudia nege.
Hahehisi ihatauratoina: Iohururu
8 Bena Iehova ese Mose bona Aaron e hamaorodia, eto, Lahi kahuna bavabia, Mose ese baine tahoa dae Farao vairanai.
9 Una kahu na baine heḡiḡi rohoroho Aigupto tanona idoinai, bena iohururu bae vara bona bae toto, taunimanima kopidia ai bona mauri ḡaudia idau-idau iboudiai kopidia ai, Aigupto tanona idoinai.
10 Bena idia ese lahi kahuna e abia, Farao vairanai e gini; bena Mose ese e tahoa dae, bena iohururu e vara bona e toto, taunimanima kopidia ai bona mauri ḡaudia iboudiai kopidia ai.
11 Bena mea taudia na asi goadadia Mose vairanai bae gini, badina be idia danu mai iohururudia, Aigupto taudia iboudiai heḡereḡeredia.
12 A Iehova ese Frao lalona ma e ha-aukaia, bena ia ese se kamonai henidia, Iehova ese Mose e hamaoroa guna heḡereḡerena.
Hahehisi ihahituna: Medu hetarina
13 Bena Iehova ese Mose e haduaia, eto, Daba matana ai ba tore isi, Farao vairanai ba gini, ba hamaoroa, baoto “Iehova, Heberu taumai emai Dirava, ini e gwau tomamu: Egu orea taudia ba kahudia nege, bae toma henigu diho.
14 Badina be ina nega ai egu hahehisi iboudiai na oi latamu ai bona emu hesiai taudia latadiai bona emu orea taudia latadiai baina siai, bena vada ba diba lau be asi idaigu tanobada idoinai.
15 Badina be imagu bama toia roro, siahuna korikorina amo bama hahisimui, boma mase ore.
16 A ina dainai vada na hamaurimu: egu siahu baina haheitalaimu bena tanobada idoinai lau ladagu bae heatolaia helaoreana.
17 Doini o heaḡimu egu orea taudia vairadiai dainai ikahu-negedia so uramu.
18 A kamonai: kerukeru, hora inihetomana ai, medu hetarina dika-hereana baina hadihoa, tanobada matamana negana ema bona hari Aigupto tanona do asi dibana ḡauna.
19 Taunabunai, hari dina ai emu boromakau bona emu ḡau iboudiai taora ai e nohomu na ba hakaudia vareai; badina taunimanima bona mauri ḡaudia hahidaosi basio abidia vareai a taora ai bae noho na medu hetarina ese baine aladia bena iboudiai bae mase ore”.
20 Bena Farao ena hesiai taudia hahidaosi, Iehova gadona garina e gariva, ese edia hesiai taudia bona edia seri e hakaudia vareai ruma ai;
21 a Iehova ena hereva e dadaraia tauna ese ena hesiai taudia bona ena seri e rakatanidia taora ai.
22 Bena Iehova ese Mose e hamaoroa, eto, Imamu a duduia isi, medu-hetarina baine diho Aigupto tanona idoinai, taunimanima latadiai bona mauri ḡaudia idau-idau latadiai bona au idau-idau ava idau-idau iboudiai latadiai, Aigupto tanona idoinai.
23 Bena Mose ese ena itotohi e duduia isi; bena Iehova ese guba-rahu bona medu-hetari e hadiho tanobada ai, lahi danu tanobada ai e diho. Iehova ese medu-hetarina e hadihoa Aigupto tanona idoinai.
24 Taunabunai, medu-hetarina bona lahi e diho bou, vada e bada herea; Aigupto tanona idoinai nega ta unu asie diho toma, Aigupto besena e vara matama amo ema.
25 Bena medu-hetarina ese taora ai e nohova ḡaudia iboudiai e aladia, Aigupto tanona idoinai, taunimanima bona mauri ḡaudia idau-idau; medu-hetarina danu taora avadia iboudiai e hadika bona au iboudiai e hagari.
26 Gosen tanona ai mo, Israel taudia ese e noholaia tanona ai, medu-hetarina na se diho.
27 Bena Farao ese Mose bona Aaron e boiridia, eto Lau na ina nega ai vada na kara havara: Iehova na maoromaoro; lau bona egu orea taudia na kara dika taumai.
28 Iehova ba noia, badina be ini guba-rahu bona medu-hetari badadia vada eme davana. Vada baina kahumui nege; ina murinai basina dogomui tao.
29 Bena Mose ese e haere henia, eto, Hanua amo aina raka lasi, imagu aina toi roro, Iehova enai; bena guba-rahu baine doko, medu-hetarina danu baine doko: unu amo vada ba diba tanobada na Iehova ena.
30 Ḡau tamona, lau dibagu oi bona oiemu hesiai taudia ese Dirava Iehova do basio matauraia.
31 Una negana ai flax bona bali vada e dika: badina ba bali anina vada e dobi bona flax vada e tubu.
32 A uit bona rae na asie dika badina be do asie tubu.
33 Bena Mose ese Farao e rakatania, hanua amo e raka lasi, imana e toi roro Iehova enai; bena guba-rahu bona medu-hetari na e doko, bona medu na se diho tanobada ai.
34 A Farao ese e itaia, medu bona medu-hetari bona guba-rahu vada e doko, bena is ese ena kara dika ma e habadaia, lalona ma e ha-aukaia lou, ia bona ena hesiai taudia danu.
35 Farao lalona vada e auka, Israel taudia se kahudia nege, Iehova ese Mose e hamaoroa heḡereḡerena.