1 Sara ena mauri laḡanidia iboudiai na sinahu-ta ruahui hitu. 2 Sarana Kiriat-araba ai eha mase: una hanua na Kanaan tanona ai, ladana ta be Heberon. Abraham na ruma ai e raka vareai, Sara taina e tai. 3 Bena Abraham na mase rumana amo e diho, Hiti taudia e hamaorodia, eto, 4 Lau na umui bogaragimui ai na noho hedoamu; tano ta mani a henigu, egu gara gabuna ai bainela, unuseni ai egu mase baina guria. 5 Bena Hiti taudia ese e haere henia, eto, 6 Ḡauka e, oi na lohia badana, ai bogaragimai ai; emai gara gabudia ai gabu herea-daena ta bavabia, emu mase ba guria; ai ta ese ena gara gabuna basine rua oiemu ai. 7 Bena Abraham e tore isi, una tano taudia, Hiti taudia, vairadiai e igo diho; 8 e hamaorodia, eto, Lalomui bema heḡereḡere egu mase iniseni ai bama guria, Efron Sohara boma noia daigu ai: 9 ia ese Makapela kohuana, ena tano hetoana ai, bema henigu. Davana korikori baina henia, egu gara gabuna ai baina halaoa. 10 Hari Efron na Hiti taudia bogaragidiai e helaiva. Bena Efron, Hiti tauna, ese Abraham e haere henia, Hiti taudia vairadiai bona ena hanua taudia iboudiai vairadiai, eto, 11 Ḡauka e, lasi; una tano mai kohuana ida baina henimu; egu bese taudia iboudiai vairadiai vada baina henimu, emu mase iguridia gabuna ai bainela. 12 Bena Abraham ese una gabu taudia vairadiai e igo diho. 13 Bena Abraham ese Efron e hereva henia, una gabu taudia vairadiai, eto, Mani a hakala henigu: una tano davana mani aina henimu; avabia, bena egu mase unuseni ai baina guria. 14 Bena Efron ese Abraham e haere henia, eto, 15 Ḡauka e, a kamonai: una tano davana na silver sekeledia sinahuhani. Ita raruosi padadai una na ḡau ta a? Emu mase unuseni ai ba guria. 16 Abraham ese Efron ena hereva e kamonai, Hiti taudia vairadiai tano davana unu e gwauraia toma, bena silver sekele* dia sinahu-hani, idia edia sekeleheḡereḡeredia, e henia.

17 Taunabunai Efron ena tano Makapela ai, Mamare badinai, mai kohuana bona mai auna iboudiai na 18 Abraham ena tano korikori ai ela. Hiti taudia vairadiai bona ena hanua lalonai e hebouva taudia iboudiai vairadiai e hoia. 19 Bena Abraham ese ia adavana Sara e guria, Makapela kohuana lalonai, Mamare badinai. Una gabu na Heberon, Kanaan tanona ai. 20 Una tano bona una kohua be Abraham ese e abi vaitani, Hiti taudia edia amo.