1 Iakob na e raka lao, ela bona mairiveina kahana taudia edia tano ai eha kau. 2 Bena ranu gurina ta e itaia taora ai, mamoe seridia toi na badibadinai hehekure, badina be una ranu na mamoe seridia e hainulaidia. Nadi badana ta ai guri iduarana e koua ahu; 3 mamoe seridia idoidiai e hegogo unuseni ai, bena idia ese nadi na guri iduarana amo e kurea oho, mamoe seridia e ha-inulaidia, bena nadi na guri iduarana ai ekurea lou ena gabu ai.

4 Bena Iakob ese mamoe ireḡudia taudia e nanadaidia, eto, Varavaragu e, ede amo oma? Idia eto, Ai be Haran taumai. 5 Ma e nanadaidia lou, eto Umui na Laban, Nahoro natuna, dibamui eiava? Idia eto, Dibamai. 6 Ma e nanadaidia lou, eto, Ia be namo a? Idia eto, I, vada namo; natuna kekenina Rahela mani a itaia, ena mamoe serina e hakaua maimu. 7 Iakob eto, Dina tubua binai, boromakau ihaboudia negana be dohore; mamoe seridia boma ha-inudia, boma lao, adia boma henidia. 8 Idia nae haere, eto, Lasi: mamoe seridia iboudiai bae hegogo guna, bena guri iduarana nadina baia kurea oho, bona mamoe seridia baia ha-inudia.

9 Ia idia ida dounu e herevava ai, Rahela na e kau, tamana ena mamoe serina e hakaudia, badina be ia ese e reḡudiava. 10 Iakob ese vavana Laban natuna kekenina Rahela e itaia, vavana Laban ena mamoe serina e hakaua mai, bena ia na e raka kahira, nadi guri iduarana amo e kurea oho, vavana Laban ena mamoe serina e ha-inudia. 11 Bena Iakob ese Rahela e harahua, bona e tai danu mai gao badana ida. 12 Iakob ese Rahela e hamaoroa ia na ia lalana Rebeka natuna; bena Rahela e heau ela, tamana e hamaoroa.

13 Laban ese vavana Iakob harina e kamnonai, bena ia e heau ela, e rosia, e harahua; bena ena ruma e hakaua lao. Bena Iakob ese hari idoidiai Laban e hamaorolaia. 14 Bena Laban ese e hamaoroa, eto, Momokani, oi na turiagu turiana bona hidiogu hidiona. Taunabunai, Iakob na ia ida e noho, hua tamona.

15 Bena Laban ese Iakob e hereva henia, eto, Oi na varavaragu dainai isiaigu ba lao heni asi davamu a? Ame hamaorogu, davamu be dahaka? 16 Hari Laban na mai natuna kekenidia rarua, vara guna ladana na Lea, tadina ladana be Rahela. 17 Lea matana na dika, a Rahela na hane namo, mai hairaina. 18 Iakob ese Rahela e ura henia; taunabunai ia eto, Laḡani hitu isiaimu baina lao heni, natumu hane-muritai Rahela iabina totona. 19 Laban eto, Oi baina henimu be namo, idau tauna ta baina henia na dika; dekegu ai ba noho. 20 Taunabunai, Iakob ese Laban isiaina e lao heni laḡani hitu, Rahela iabina totona; a lalona e tomava dina gadoi mo na heheto, badina be ia ese Rahela e ura henia lalo-dikava. 21 Bena Iakob ese Laban e hamaoroa, eto, Adavagu a henigu, badina be egu nega vada e ore, taunabunai aina adavaia na tomamu. 22 Bena Laban ese una gabu taudia iboudiai e haboudia, aria e karaia. 23 Hanua e boi, bena ia ese natuna Lea e hakaua vareai Iakob dekenai; bena Iakob ese e adavaia 24 Laban ese danu ena hesiai hahinena Silpa na Lea e henia, ena hesiai hahinena ai bainela. 25 Daba e rere, bena Iakob ese hahine na e itaia, Lea mo. Bena ia ese Laban e gwau henia, eto, Ede vada o karagu toma? Isiaimu asina lao heni Rahela iabina totona a? Dahaka dainai o koigu? 26 Laban na e haere, eto, Ai emai kara iniseni ai be hane-muritai asia haheadavaia gunamu, a hane-guna e headava gunamu. 27 Ina hahine ariana purana baine ore, murinai tadina danu baia henimu; davana be laḡani hitu ma isiaigu ba lao heni. 28 Iakob na unu e kara toma: dina hitu e ore, bena Laban ese natuna Rahela e henia, baine adavaia. 29 Laban ese danu ena hesiai hahinena Bilha na Rahela e henia, ena hesiai hahinena ai bainela. 30 Bena Iakob e raka vareai Rahela dekenai; ia ese Rahela e ura henia bada, a Lea e ura henia maragi. Ia ese Laban isiaina ma e lao heni, laḡani hitu.

31 Iakob ese Lea e dadaraia dainai Iehova ese e bogaia hisi, natuna e henia; a Rahela na gabani. 32 Bena Lea na e rogorogo, e mara, mero ta e abia; ladana e hatoa Ruben:* badina be ia eto, Iehova ese egu lalo- hisihisi vada e haḡerea; harihari adavagu ese baine ura henigu. 33 Ma e rogorogo lou, e mara, mero ta e abia; bena eto, Iehova vada e kamonai adavagu vada e dadaraigumu, una dainai ina mero danu vada e henigu. Bena ladana e hatoa Simeon.† 34 Ma e rogorogo, e mara, mero ta e abia; bena eto, Harihari adavagu ida baia hahebou, badina be memero tatoi vada na heni. Bena ladana e hatoa Levi.‡ 35 Ma e rogorogo, e mara, mero ta e abia; bena eto, Harihari Iehova aina imodaia. Bena ladana e hatoa Iuda.§ Una murinai ia na se rogorogo lou.