34
Daina sivaraina
1 Iakob bona Lea natudia hahinena Daina na eha loaloa, una tano hahinedia i'igo-itadia ela.
2 Bena una tano lohiana, Hamoro, tau Hivi, natuna Sekem ese e ḡahusia, bena e rosia, e ḡaḡaia.
3 To ia ese Iakob natuna Daina e ura henia lalodika, mai lalona idoinai, bena ia lalona ihamarumaruna herevadia e gwaurai heniava.
4 Bena Sekem ese tamana Hamoro e hamaoroa, eto, Ina hane-ulato bavabia, baina adavaia.
5 Iakob na harina e kamonai Sekem ese natuna Daina vada e hahemaraia, a natuna mamaruanedia ese taora ai seri e reḡudiava, bena Iakob ese hereva ta se gwauraia ela bona idia ema.
6 Bena Hamoro, Sekem tamana, e lasi, Iakob ida bae hereva-hereva eto.
7 A Iakob natuna mamaruanedia na harina e kamonai, bena taora amo e lasi mai lalo-hisihisidia bona mai badudia ida; badina be una tau ese Israel vada e hahemaraia, Iakob natuna Daina vada e ḡaḡaia, dainai.
8 A Hamoro ese e hamaorodia, eto, Natugu Sekem ese oi natumu e ura henia lalodikamu; mani emu kara ba henia, baine adavaia.
9 Beseda bae hatamona: umui ese natumui ulatodia ba henimai, emai ai bae headava; ai danu natumai ulatodia baia henimui, emui ai bae headava.
10 Bogaragimai ai ba noho: ai emai tano na umui emui tano ai bainela; iniseni ai ba biru, ba hoihoi, ba hanua.
11 Sekem ese danu hane-ulato tamana bona taihuna e hereva henidia, eto, Egu noinoi boma abia dae, hane-ulato davana boma gwauraia, bena bama henimui.
12 Ena be davana ba habadaia herea, to vada baina henimui; ḡau tamona, hane-ulato na ba henigu, baina adavaia.
13 A Iakobo natuna mamaruanedia na e haere koikoi, Sekem, tamana Hamoro ida, e dibaḡanidia, taihuna Daina vada e hahemaraia dainai.
14 E hamaorodia, eto, Taihumai na se peritomea tauna baia henia na taravatu, bona hemarai ihavarana karana emai ai.
15 To ini baia kara henimui toma: bema umui ese emui maruane iboudiai ba peritomedia, ai bamomai,
16 ai ese natumai ulatodia baia henimui bona natumui ulatodia baia abidia, bena bogaragimui ai baia noho, bese tamona ai baitala.
17 A bema emai hereva basio abia dae, basio peritome, ai na hane-ulato baia abia, baiala.
18 Hamoro bona natuna Sekem na edia hereva e kamonai, bena raruosi e moale;
19 hari tauhau na se halahe, edia ura mo e karaia, badina be Iakob natuna ulatona e moalelaia bada; tamana ena ruma ai danu ia sibona herea.
20 Bena Hamoro, natuna Sekem ida, edia hanua ikoukouna ela, edia hanua taudia e hereva henidia, eto,
21 Ini taunimanima na maino e uramu; taunabunai eda tano ai bae noho baine namo: bae hoihoi bona bae biru, badina be tano na bada. Natudia ulatodia baita adavadia, bona natuda ulatodia baita henidia.
22 To idia lalodia bae heḡereḡere bogaragidai bae noho bona ita ida bese tamona ai baitala dalana na tamona mo: ita bogaragidai maruane iboudiai baita peritomedia, idia e karamu heḡereḡerena.
23 Gabe amo edia seri bona edia kohu bona edia boromakau iboudiai na iseda ai baita halao, ani? Idia ida baita herohemaino, bena bogaragidai do bae noho.
24 Hanua taudia iboudiai ese Hamoro bona natuna Sekem edia hereva e abia dae; bena maruane iboudiai e peritomedia.
25 Dina ihatoina ai, taudia hisidia e dai lasi, bena Iakob natuna rarua, Simeon bona Levi, hari Daina taihuna, ese edia dare e abi, hanua ai e raka vareai, bena mamaruanedia ibouboudiai e aladia mase;
26 Hamoro bona natuna Sekem danu dare amo e aladia mase. Daina danu Sekem ena ruma amo e hakaua diho, bena ela.
27 Bena Iakob natuna mamaruanedia na ela, Sekem taudia masedia ai e davaridia, bena hanua e habuaia tari, taihudia e hahemaraia dainai.
28 Edia mamoe bona edia boromakau bona edia doniki bona edia ruma kohudia bona adia uma anidia idoidiai e abihaidia;
29 natudia maraḡidia danu bona adavadia e abidia mauri. Edia ruma kohudia e ha-ore, bena ruma e doudia.
30 Bena Iakob ese Simeon bona Levi e gwau henidia, eto, Hekwarahi egu ai vada o havaraia, bona ladagu vada o hadikaia ina tano taudia, Kanaan taudia bona Perisi taudia, bogaragidiai. Bena ita na dia hoho dainai idia na bae hebou, bae tuari henigu; bena lau bona egu ruma taudia iboudiai baita mase ore.
31 A idia e haere, eto, Be, taihumai na ariara hahinena ai e halaoa namo eiava?