42
Iosef kakana Aigupto ai
Iakob ese harina e kamonai Aigupto be mai uitina, bena ia ese natuna e gwau henidia, eto, Badina be dahaka o herarai hehenimu? Ma eto, Vada na kamonaimu Aigupto be mai uitina; baola, unuseni ai ita ada ba hoia, baita mauri helaoreana; bena basita mase. Bena Iosef kakana gwauta-osi Aigupto ela, uit ihoina; a Beniamina, Iosef tadina, na Iakob ese e rua, kakana ida basinela; badina be ia eto, Dika ese bema butua tao na garina. Taunabunai, Israel natuna na taunimanima loḡora ida uit ihoina ela; badina be doe na bada Kanaan tanona ai.
Iosef na tano idoinai lohiana, taunabunai taunimanima iboudiai ia dekena ela, uit e hoia. Iosef kakana danu ia dekena ela, ia vairanai e goru diho. Iosef ese kakana e itadia negana ai, ia lalona vada e parara idia be daidia, to e hereva henidia idau tauna na heto, e gwau henidia, eto, Umui be ede amo oma? Idia eto, Kanaan tanona amo ama, aniani ihoina totona. Iosef be kakana dibana, to idia asi dibadia ia. Bena Iosef ese ena nihi ai idia e nihiraidia e helalolai une. Bena e gwau henidia, eto, Umui na hasinadoa taumui; ina tano ena manoka itana oma. 10 Idia ese e haere henia, eto, Ḡaubada e, lasi, dia unuheto; ai na oi isiaimu ilao-henina taumai, aniani ihoina totona ama. 11 Ai na tau tamona natuna, hereva momokani taumai; asia hasinadoamu. 12 A ia ese ma e gwau henidia, eto, Lasi, tano ena manoka itana totona oma. 13 Idia ma eto, Ai na oi isiaimu ilao-henina taumai, tadikaka gwauta-rarua, tau tamona natuna Kanaan ai; a tau-muritai be harihari tamamai dekenai, bona ta be vada e mase. 14 A Iosef eto, Vada na hereva, ani, umui be hasinadoa taumui. 15 A baina dibamui: Farao maurina ai na herevamu, ini amo basio raka oho ela bona tadimui bainema. 16 Umui emui amo ta ba siaia, tadimui baine hakaua mai; a orena be dibura rumana ai ba noho. Unu amo baina dibamui, emui hereva be momokani eiava lasi. Bema lasi, umui na momokani hasinadoa taumui. 17 Taunabunai, ia ese dibura rumana ai e koudia, dina toi.
18 Dina ihatoina ai, Iosef ese e hereva henidia, eto, Ini ba kara toma, bena ba mauri; badina be lau danu Dirava garina na garimu. 19 Bema umui na hereva momokani taumui, umui ta ese dibura rumana ai baine noho, a orena be vada baola, uit ba laohaia, varavaramui adia. 20 Bena ba lou mai, tadimui ba hakaua mai dekegu ai; unu amo baina diba emui hereva na momokani, bena basio mase. Unu ba kara toma. 21 Bena idia na e hereva heheni, eto, Momokani, ita na vada ta kerere tadida dainai; badina be ena taitai ta kamonai, to ena noinoi asita abia dae; una dainai ina hekwarahi na ita edai vada e kau. 22 Bena Ruben eto, Lau na hamaoromui, ani, nato “Mero na basio hadikaia”, to umui na asio kamonai, harihari ia rarana na ita latadai. 23 Idia na asi dibadia Iosef na edia hereva anidia dibana, badina be ia na gado-hanai tauna uduna amo mo vada e hereva henidia. 24 Bena ia na e raka siri, e tai; gabeamo e lou henidia, e hereva henidia. Bena ia ese Simeon e abia, gadea amo e ḡuia idia vairadiai. 25 Bena Iosef e hahedua, edia puse na uit amo bae hahonu, bona ta ta edia moni edia puse ai bae uda lou, bona dala lakwana danu bae henidia. Bena unu e kara toma. 26 Bena edia puse na edia doniki dorudia ai e ato kau, e raka lao.
27 Adorahi ai e taruha, bena ta ese ena puse e kehoa, ena doniki baine ubua eto; bena ena moni e itaia, puse uduna ai. 28 Bena ia ese tadikakana e hamaorodia, eto, Egu moni vada e haloua, ḡauna na egu puse ai. Bena kudoudia e hetaha, gari ese e butudia tao, e hereva heheni, eto, Dirava na ede vada e karada toma?
29 Kanaan tanona ai e kau, tamadia Iakob dekenai. Bena edia laolao sivaraina e hamaorolaia, eto, 30 Una tano lohiana ese e daḡedaḡe henimai, dibura rumana ai e koumai, eto ai na hasinadoa taumai. 31 A ia ese a hamaoroa, ato “Ai na hereva momokani taumai, dia hasinadoa; 32 ai na tadikaka gwauta-rarua, tau tamona natuna, a ta vada e mase, bona taumuritai be tamamai dekenai, Kanaan tanona ai.” 33 Bena una tano lohiana eto “Ini amo baina diba umui na hereva momokani taumui eiava lasi: umui ta baina dogoa tao iniseni ai, a orena be uit ba laohaia, varavaramui adia; 34 bena tadimui tau-muritai tauna ba hakaua mai dekegu ai, bena bainadiba umui be hereva momokani taumui; bena tadikakamui na baina henimui lou, bona ina tano ai ba hoihoi danu”.
35 Bena uit na edia puse amo e bubua negana ai, ta ta edia moni e davari edia puse ai; bena idia bona tamadia moni e itaia ai e gari dikadika. 36 Bena tamadia Iakob ese e gwau henidia, eto, Natugu na egu amo vada o abidia oho: Iosef vada e boio; Simeon vada e boio; harihari Beniamina danu bavabia oho o tomu; ini hisihisi iboudiai na lau mo latagu ai. 37 Bena Ruben ese tamana e hamaoroa, eto, Beniamina basina hakaua lou dekemu ai, lau natugu raruosi bavaladia mase. Lau imagu ai ba siaia, bena lau ese ma baina mailaia mai maurina ida. 38 A Iakob eto, Natugu basina kahua nege, basio laohaia; badina be kakana korikori vada e mase, ia mo sibona dekegu ai e nohomu. Dala ai dika ta ienai bema kau, lau buruka taugu na umui daimui ai mase gabuna bama lao henia mai lalo-hisihisigu ida.