49
Iakob ena hahenamo
1 Bena Iakob ese natuna e boiridia, eto, Iboumui ai ba hebou, emui ai dahaka dahaka nega gabedia ai baine vara na baina hamaorolaimui.
2 Iakob natuna e, a raka kahira,
Tamamui Israel ena hereva ba hakala henia.
3 Ruben, oi na natugu roboana, egu goada anina roboana,
Heaḡi badina, siahu badina.
4 To oi na ranu na heto, taunabunai oi na basio herea,
Badina be tamamu ena geda ai o hekure, o hamiroa.
5 Simeon bona Levi na boga tamona amo;
Edia ura hehunidia be koikoi bona dadidadi.
6 Laumagu e, edia kara hehunidia ai basio raka vareai,
Lalogu e, edia hebou amo ba raka siri;
Badina be edia badu ai taunimanima e aladia mase.
Bona edia ura kava ai boromakau e haberodia.
7 Edia daḡedaḡe na uduguiraiamu, badina be vada e idita;
Edia badu na uduguiraiamu, badina be vada e auka.
Ahudia Iakob ai baina ḡiḡi rohoroho,
Israel ai baina hakarohodia,
8 Iuda e, tadikakamu ese bae imodaimu,
Oi imamu na inaimu aiodia ai bavatoa kau;
Tamamu natuna ese bae toma henimu diho.
9 Iuda na leona natuna;
Natugu e, leona vamu momo e ania na heto vada o goadamu;
Leona e hekuremu na heto laḡana e aniamu,
Leona burukana na heto: daika ese baine haoa?
10 Lohia auna na Iuda ena amo basie abia oho,
Tarava iatuna tauna ai danu basie dabu,
Ela bona bainema tauna na do bainema;
Bena bese loḡora ese ia bae badinaia.
11 Ena doniki na vine auna ai baine mataia,
Ena doniki natuna na vine auna namo-hereana ai baine mataia.
Ena dabua na vine ranuna ai baine huria,
Ena hahedoki na vine ranuna kakakana ai baine huria;
12 Matana bae kakakaka, vine ranuna na heto,
Isena bae kuroka-kuroka rata na heto.
13 Sebulun na kone ai baine noho,
Lagatoi edia hetu gabuna ai bainela,
Ena tano hetoana na Sidono badibadinai.
14 Isakara na doniki mai goadana
Seri bogaragidiai e hekuremu na heto;
15 E itaia ena laḡa-ani be namo,
Ena tano be mai hairaina;
Bena kohu ihuana tauna ai ela,
Hesiai tauna ai ela.
16 Dan be ena orea taudia baine hahemaoro henidia,
Israel iduhuna ta baine hahemaoro henia.
17 Dan na gaigai dala isena ai na heto,
Hekori gaigaina dala isena ai,
Hosi ae-geduna e koriamu,
Bena hosi tauna e morumu.
18 Iehova e, emu hahemauri vada na nariamu.
19 Gad be tuari oreana ta ese baine tuari henia,
To ia ese baine hadareredia.
20 Asere ena tano ai uit momo baine vara,
Aniani namodia baine dabarai, hanua pavapavadia adia.
21 Napatali na dia hahinena na heto, e kahua nege,
Bena natuna namo-hereadia e havaradiamu.
22 Iosef na au rigina mai huahuana na heto,
Au rigina ranu gabuna ai e varamu na heto,
Rigina na maḡu amo e daemu.
23 Peva taudia ese vada e hahisia,
E tarakia, e haberoa;
24 To iena peva na mia,
Iakob Siahuna ese ia imana vada e ha-aukadia,
Mamoe Ireḡuna, Israel Nadi-ginina, ladana ai.
25 Tamamu ena Dirava bunai: ia ese baine durumu,
Siahu-idoinai Diravana: ia ese baine hanamomu.
Guba atai ai ena hahenamo,
Dobu gabuna tanobada henunai ena hahenamo,
Kemena ena hahenamo, bogana ena hahenamo.
26 Tamamu ena hahenamo ese
Ororo gunadia edia hahenamo e hereaiamu,
Mia-hanaihanai ororodia edia hahenamo e hereadiamu.
Hahenamo bini Iosef latanai bae diho,
Tadikakana ida e haheparara tauna tubuana ai bae kau.
27 Beniamina na uda sisiana vamu e tahuamu na heto,
Daba ai ana vamu e aniamu,
Adorahi ai e ala ḡaudia e harimu.
28 Israel iduhudia gwauta-ruaosi bini; tamadia ena hahenamo herevadiabini. ta ta e hanamolaidia.
29 Bena ia ese e haḡanidia, eto, Tubu tama dekedia ba laomu: tubugu bona tamagu badibadidiai ba gurigu, nadi kohuana ai, Efron tau Hiti ena tano ai.
30 Kohuana bunai Makapela imeana ai, Mamare kahana ai, Kanaan tanona ai; Abraham ese Efron tau Hiti ena amo e hoia, ena gara gabuna ai bainela.
31 Unuseni ai Abraham mai adavana Sara ida e guridia, unuseni ai Isaak mai adavana Rebeka ida e guridia; unuseni ai danu Lea na guria.
32 Kohuana bunai, mai imeana, na Hiti taudia edia amo e hoia.
Iakob e mase
33 Iakob ese natuna ihaḡanidia e hadokoa, bena ena mahuta patana ai e hekure diho, laumana e heni dae, tubu tama dekedia ela.