13
Hahealo herevadia
1 Heura-heheni na bogaragimui ai baine hesiriu.
2 Idau taudia iabi-daedia basio lalo boio; badina be una kara dainai haida ese aneru vada e abidia dae, a asi dibadia unu be aneru.
3 Dibura rumadia ai e hekoumu taudia ba lalodia, umui danu idia idla bema koumui hebou na heto. E hahisidiamu taudia danu ba lalodia, badina be umui danu mai tau-animui.
4 Taunimanima iboudiai es headava bae matauraia, mahuta gedana basie hadikaia; badina be Dirava ese herahe-dadi taudia bona heudahanai taudia do baine hahemaoro henidia.
5 Lalomui ai moni basio hekisehekise henia, a dekemui ai mimia ḡaudia na bavabi, asi karikarimui; badina be Dirava eto, Lau na basina negemu bona basina rakatanimu, lasi ona lasi vaitani.
6 Taunabunai, mai goadada ida baitato,
Lohiabada be egu hekaha,
Lau na hasina gari;
Taunimanima ese ede bae hadikagu toma?
7 Ihakaumui taudia, Dirava ena hereva vada e hadibalaimui taudia, na ba lalodia; edia kara anina ba haeroa, bena edia abidadama ba haḡoia.
8 Iesu Keriso na varani bona harihari dia idau, bona basine idau ela bona hanaihanai.
9 Hahediba herevadia idau-idau basie hakaumui kerere; badina be ina na namo, Dirava ena harihari-bada ese laloda baine ba-auka, dia aniani ḡaudia ese; unu ḡau ese e badinava taudia asie hanamodiava.
10 Ita na mai eda pata helaḡana, a ḡuriḡuri kalagana ena hahelaḡa taudia na unu amo basie aniani diba.
11 Badina be mauri ḡaudia raradia na hahelaḡa tauna badana ese Helaḡa Herea gabuna ai e vareailaia, kara dika iabi-ohodia, a tau-anidia na taruha murimurinai e ḡole oho.
12 Unuhetomana Iesu danu ikoukou murimurinai e mase, ia sibona rarana amo bese taudia baine hahelaḡadia helaoreana.
13 Taunabunai, ita na ia dekena baitala, taruha murimurinai, ia hemaraina danu baita huaia.
14 Badina be iniseni ai ita na asi eda mia-hanaihanai hanuana, a mia-hanaihanai hanuana, gabeai baine hedinarai ḡauna, ta tahuamu.
15 Taunabunai, ia dainai daba daba idoidiai Dirava iheatolaina na eda boubou ḡauna ai baita haloa; ududa bibinadia ese ia ladana bae imodaia.
16 Kara namo bona kohu iharina na basio rea, badina be Dirava ese helaḡa karadia enehetomadia e moalelaimu.
17 Ihakaumui taudia ba kamonai henidia bona ba matauraidia. Badina be idia ese umui laumamui e gimadiamu, edia kara anidia bae gwaurai hedinarai taudia na heheto. Unu bae kara toma mai moaledia ida baine namo; a mai ḡanaḡanana ida bae karaia negana ai na emui ai anina taina basine vara.
18 Ba ḡuriḡuri ai emai; badina be ai a tomamu lalomai be ḡoḡoeva-ḡoḡoeva, bona a uramu ḡau idoidiai baia kara maoromaoro.
19 Lau na noinoi henimuimu, unu ba kara toma, bena ma baina vasi haraḡa-haraḡa.
20 Maino Diravana, mamoe ireḡudia tauna badana, Iesu Keriso, miahanaihanai herohemainona rarana dainai mase amo e hatorea isi lou Diravana, ese
21 ḡau namodia idoidiai baine hanamolaimui ḡuḡuru; bena umui ese iena ura ba kara, bona ia ese e moalelaimu ḡaudia na umui lalomui ai baine havara, Iesu Keriso dainai. Ia baita imodaia hanaihanai. Amen.
22 Varavaragu e, lau na noimuimu, egu hahealo herevadia bavabi dae, badina be hereva dia hoho vada name tore henimui.
23 Ba diba, varavarada Timoteo vada e ruhaia nege. Ia bema mai haraḡa, raruosi baiama vasi itamui.
24 Ihakaumui taudia iboudiai bona helaḡa taudia iboudiai ba hanamodia. Italia taudia ese e hanamomuimu.
25 Harihari-bada be iboumui ai emui ai baine mia. Amen.