13
Efraim baine dika vaitani
Efraim e hereva negadia ai,
taunimanima na e heude-heude;
Israel ai idia ese ia e imodaia,
a Baal dainai e kerere, bena e mase.
Harihari idia ese edia kara dikadia e hahohodiamu,
bona edia kaivakuku na e hahetaria aurina amo e karadiamu;
kaivakuku na silver amo e karadiamu mai ima-idibakadia ida,
iboudiai na ima-idibakadia taudia ese e karadiamu.
Idia na e tomu “Ini na ba boudia”.
Taunimanima ese boromakau natudia laulaudia e harahudiamu.
Taunabunai, idia na daba ninoana heḡereḡerena ai baela,
eiava e puki haraḡamu hununa heḡereḡerena ai;
uit ikwadilaina gabuna amo e heoda ohomu momona na heto,
eiava kwalahu gaba-mauru amo e lasimu na heto.
 
Aigupto tanona amo
lau na Iehova, emui Dirava.
Dirava ta asi dibamui, lau mo;
asi ihamaurimui ta, lau mo.
Tano ḡaḡaena ai na dibamui,
medu se dihova tanona ai;
a e ani lava dae negana ai bogadia e kunu,
bena e hekokorokuva;
taunabunai e lalogu boio.
Una dainai lau ese baina kara henidia leona na heto;
taiga na heto dala isena ai baina bani tao.
Bea, natuna vada e henaodia ḡauna, na heto,
latadiai baina roho kau,
kemedia baina daredia.
Unuseni ai baina ha-oredia leona na heto,
uda boromana ese bema daredia na heto.
 
Israel e, baina habuamu tari;
daika ese baine durumu?
10 Harihari emu pavapava na edeseni ai,
bona ede baine hamaurimu toma?
Emu lohia iboudiai na edeseni ai,
bona ede bae gimamu toma?
Umui ese o herevalaidia, oto
“Pavapava ta bona lohia haida ba henimai”,
taudia na edeseni ai?
11 Egu badu ai pavapava haida vada na henimui,
bona egu badu ḡaraḡara ai ma vada na abidia oho.
 
12 Efrai ena kara havara na vada e kumia,
ena kara dika na vada e koua.
13 Sinana e hekamonaimu,
to ia na kavakava merona,
ena vara negana vada e kau
to sinana bogana amo se lasimu.
14 Mase gabuna amo baina rauadia a?
Mase amo baina hamauridia a?
Mase e, emu hahehisi be edeseni ai?
Mase gabuna e, emu hahebua-tari be edeseni ai?
Hebogahisi na matagu amo vada eme hehuni.
 
15 Ena be tadikaka bogaragidiai bema bada oho bada oho,
to laurabada, Iehova ena lai, bainema,
tano ḡaḡaena amo baine toa;
ela bona ranuna basine helohilohi,
bona ena ranu gabuna baine kororo;
ena habou-habou rumana lalona amo
ḡau hereadia iboudiai baine ha-oredia.
16 Samaria ese ena kerere davana baine huaia,
badina be ia ese ena Dirava vada e daḡedaḡe henia;
idia na dare ai bae mase,
natudia maraḡidia na bae huaridia patapata,
bona edia rogorogo hahinedia na bae dapadia parara.