56
Dirava ena taravatu ibadinana na mai davana
Iehova ini e gwau tomamu:
Hahemaoro ba karaia ḡoevaḡoeva,
kara maoromaorodia ba kara;
badina be asi vanahana egu hahemauri bainema,
bona egu haheroho-mauri baine hedinarai.
Unu e kara tomamu tauna na namo,
bona taunimanima natuna, e badinaia tarika-tarikamu tauna, danu.
Ia ese dina helaḡa e badinaiamu, se hadikaiamu;
bona imana e nariamu, kara dika ta baine karaia na garina.
Idau tauna Iehova ena orea lalonai vada e vareai na basineto
“Iehova ese ena orea amo do baine bibigu tabe”;
bona e taravaia tauna basineto
“A itaia, lau na au kaukauna”.
Badina be Iehova ini e gwau tomamu:
E taravadia taudia hahidaosi ese egu dina helaḡadia e badinadiamu,
bona lalogu ihanamolaina ḡaudia e abidia hidimu
bona egu taravatu e badinaia tarika-tarikamu, taudia na
lau ese egu ruma ai bona egu haba lalodiai
pupuna ta bona lada ta baina henidia,
natu-adora memerodia bona kekenidia ihereadia ḡaudia;
lada mia-hanaihanaina baina henidia,
bena edia amo basine boio.
 
Idau bese taudia Iehova ena orea ai vada e vareai,
ia bae toma henia diho helaoreana
bona Iehova ladana bae lalokau henia
bona isiaina bae lao heni totona taudia,
dina helaḡa e badinaiamu, asie hadikaiamu,
bona egu taravatu e badinaia tarika-tarikamu, taudia iboudiai na
lau ese egu ororo helaḡana ai baina hakaudia dae,
bona egu ḡuriḡuri rumana ai baina hamoaledia;
edia ḡole-oho bouboudia bona edia boubou ḡaudia idau-idau na
egu ihaboulaina patana ai baina abidia dae;
badina be egu dubu na bese loḡora iboudiai
edia ḡuriḡuri rumana bae gwauraia.
Ḡaubada Iehova, Israel bogaragina amo e luludia oho taudia
e haboudiamu Diravana, e tomu
“Lau ese ma haida ienai baina haboudia,
na haboudia guna taudia ida”.
 
Israel edia kaivakuku irevadia
Umui tano paka boromadia na baoma, amui bavani,
umui uda-ahu boromadia danu.
10 Ena gima taudia matadia na kekepulu,
iboudiai na asi aonegadia;
idia na sisia asi gadodia na heheto,
asi kwaru dibadia;
e nihimu, e hekuremu,
mahuta e ura henia lalo-dikamu.
11 Sisia na e gadodiamu,
bogadia asie kunumu;
mamoe ireḡudia taudia danu lalodia asie pararamu,
iboudiai na sibodia edia dala ai e raka sirimu,
iboudiai ta ta sibona ena namo sibona ena namo ihabadana e tahuamu,
ta se dabumu.
12 Idia na e tomu: Aoma, vine ranuna baita abia,
inuinu ḡauna goadana baita inua doroka-doroka;
bena kerukeru na hari dina ida baine heḡereḡere,
bada bona bada herea.