8
Peroveta tauna natuna ladana
1 Bena Iehova ese e hereva henigu, eto, Nadi palakana badana ta bavabia, bena taunimanima iboudiai dibadia revarevadia amo ba torea “Mahere-salala-hasa-basa ena”.
2 Bena ihamomokanina taudia namodia na abidia. Uria, hahelaḡa tauna, bona Sekaria, Ieberekia natuna, egu kara bae hamomokania totona.
3 Bena peroveta hahinena dekenai na raka vareai, bena ia na e rogorogo, mero ta e havaraia. Bena Iehova ese e hamaorogu, eto, Ladana ba hatoa “Mahere-salala-hasa-basa”;
4 badina be mero na “Mama” eiava “Ina” do basine boi diba negana ai, Damasko ena taḡa bona Samaria ai bae dadi kohudia na Asuria pavapavana vairanai bae hua lao.
5 Iehova ese ma e hereva henigu, eto,
6 Badina be ina bese ese Siloa ranudia, e aru metaira-metairamu ḡaudia, vada e dadaraidia, bona Resini bona Remalia natuna garidia ese e butudia taomu,
7 una dainai Ḡaubada ese Sinavai Badana ranudia na idia ihadikadia totona e ha-arudia maimu. Unu ranu na goada herea bona momo, Asuria pavapavana mai hairaina idoinai ida; bena abata ese sinavai baine hahonudia, sinavai popotodia iboudiai baine utudia dae;
8 ma baine aru lao ela bona Iuda tanona baine utua dae, ma bainela, baine dae ela bona aio ai baine kau. Emanuel e, hanina hetoi-rorodia ese emu tano lababana baine hahonua.
9 Bese idau-idau e, ba heḡiḡi rohoroho, ba gari dikadika!
Gabu daudau e, ba hakala!
Emui rami ba hekasilai, ba gari dikadika;
emui rami ba hekasilai, ba gari dikadika.
10 Ba henega bou, to ḡau ta basine vara;
ba hereva, to emui hereva basine gini;
badina be Dirava na ai dekedekemai ai.
Iehova garina ba gari
11 Badina be Iehova ese unu e hereva henigu toma; imana mai goadana na lau latagu ai e atoa kau, bona e sisiba henigu, ina bese ena dala ai basina raka. Eto,
12 Ina bese ese “dika henegadia” e gwauraimu ḡaudia iboudiai na umui ese “dika henegadia” basio gwauraidia, bona garidia e garimu ḡaudia na garidia basio gari, bona kudoumui basie hetaha.
13 A Iehova Sabaota hari ba gwauraia “helaḡa”; ia mo ba gari henia, bona ia dainai kudoumui bae hetaha.
14 Ia na gabu helaḡana ai bainela, bona Israel oreadia ruaosi ediai hekwakwanai bona hetutuhi nadidia ai bainela, bona Ierusalem inoholaina taudia ediai rikiriki bona idoa ai bainela.
15 Hutuma na ienai bae hetutuhi; bae moru bona bae hehuari; baine idoadia, bena baine abidia.
16 Hahediba herevadia ba hunidia; egu hahediba taudia mo ba hadibadibalaidia.
17 Iehova baine naria; ia ese vairana na Iakob ena iduhu amo e huniamu; ia baina laroa.
18 A itaia, lau bona natugu, Iehova ese vada e henigu memerodia, na toa bona gware Israel ai, Iehova Sabaota, Siona ororona ai e nohomu Diravana, ena amo.
19 Bae hamaoromui, baeto “Rohe taudia bona mea taudia, e tanatanamu bona e hereva hemaunumu taudia, na ba nanadaidia” negana ai ba laloa, taunimanima ese edia Dirava basiema nanadaia a? Mase taudia bema nanadaidia mauri taudia dadiai a?
20 Hahediba daladia bona hahediba herevadia ba badinadia. Momokani ina e gwauraiamu herevana na asi diarina.
21 Tano bae rakaia hanai mai hisihisi badadia bona mai hitolodia ida; bena bae hitolo negana ai bae badu ḡaraḡara, bena edia pavapava bona edia Dirava bae uduguiraidia. Bae gaga dae,
22 bona tanobada bae raraia, a hisihisi bada bona dibura mo bae ita, hisihisi bada-hereavaburana; bena dibura masemase lalonai bae doridia vareai.