20
Sofara ena hereva iharuana
Bena Sofara, tau Naamata, na e haere, eto:
Taunabunai, egu lalo-hadai ese e haere henigumu,
badina be lalogu na e haraḡamu dainai.
Gwau-gwau herevadia na kamonaimu, idia ese e hadikagumu;
bena egu lalo-parara amo lauma ese e haere henigumu.
Gunaguna amo, taunimanima na tanobada ai e atodia negana amo,
ina na so diba a?
Kara dika tauna ena heagi na kwadogi,
bona Dirava se matauraiamu tauna ena moale na e doko haraḡamu, ani?
Ena be tauna do baine lata ela bona guba,
bona kwarana na ori ai baine kau,
to ia na baine mase hanaihanai, ia sibona tagena na heto;
vada e itaia taudia na baeto “Ia be edeseni ai?”
Ia na baine roho lao, nihi na heto, bena basie davaria;
bae lulua oho, hanuaboi mata-hanaina na heto.
E itaia matana ese basine itaia lou;
ena gabu ese basine itaia lou.
10 Ia natuna ese ogoḡami taudia edia heduru bae tahua;
bona ia imana ese ena taḡa baine heni lou.
11 Ia turiana na mai goadadia, eregabe na heto;
a ena goada na ia ida ḡahu ai baine hekure.
 
12 Ena be kara dika na mai gaihona uduna ai,
bona malana henunai e huniamu;
13 ena be lalona na se heḡereḡere baine kahua nege,
bona uduna ai e dogoa taomu;
14 to ana aniani na e idita ia bogana ai,
gaigai ena mase muramurana na heto ia lalonai.
15 Taḡa na e hadonoamu, bena ma e mumutaia negemu;
Dirava ese ia bogana amo e halasiamu.
16 Gaigai edia mase muramurana e topoamu,
hekori gaigaina ese baine koria mase.
17 Sinavai na basine raraidia,
bada-ranuna bona rata-hetarina e arumu na basine itadia.
18 Ena ḡaukara huahuana baine heni lou,
bona basine hadonoa;
ena hoihoi anina amo
moale taina basine davaria.
19 Badina be ogoḡami taudia vada e moidia tao bona vada e rakatanidia;
se haginia rumana vada e dadia.
 
20 Badina be ena ani-gunita na asi dokona;
una dainai ia ese e moalelaiamu ḡauna ta basine atoa tabe.
21 E anianiva negadiai bahu taina se miava;
taunabunai ena taḡa na basine mia daudau.
22 Ena taga badana lalonai ia na baine hekwarahi;
lalo-hisihisi siahuna idoinai na ia latanai baine kau.
23 Ia bogana ihakununa totona
Dirava ese ena badu garaḡarana na ia latanai baine siaia;
ia latanai baine hadihoa, medu na heto;
ana aniani ai bainela.
24 Auri iona amo baine heau;
auri-laboralabora dibana ese baine tarakia uru;
25 e veria ohomu, ia tau-anina amo e veria lasimu,
matana mai kimoremorena na ia audunana amo e lasimu;
gari ese e butua taomu.
26 Dibura vada e heḡaeḡaelaia, iena taḡa ihadonodia;
asie hahururua lahina ese baine araia,
ena kalaga ai e miamu ḡaudia baine aradia ore.
27 Guba ese ena kara havara baine hahedinaraia;
tanobada na ia ihadikana totona baine tore isi.
28 Ena ruma kohudia na bae huadia lao,
Dirava ena badu dinana ai bae veridia oho.
29 Kara dika tauna davana binai, Dirava ena amo;
ahuna binai, Dirava ese vada e gwaurai henia.