12
Iefeta ese Israel e lohiaia
1 Efraim taudia ese edia tuari gaudia e abi, e tore isi, e hanai, Safon ela, Iefeta e gwau henia, eto, Dahaka dainai Amono taudia ituarihenidia totona o hanai negana ai na so boirimai, ai danu baiama lao? Ai na oiemu ruma baia doua, oi kwaramu ai.
2 Iefeta ese e haere henidia, eto, Lau bona egu orea taudia emai heai na bada, Amono taudia ida, bena na boirimui negana ai umui na asioma, idia imadia amo asio hamaurigu.
3 Lau na diba umui basio hamaurigu, bena egu mauri na imagu ai mia, bena na hanai, Amono taudia na tuari henidia; bena Iehova ese lau imagu ai e atodia. Be, dahaka dainai hari dina ai vada oma, ba tuari henigu o tomu?
4 Bena Iefeta ese Gilead taudia iboudiai e haboudia, Efraim taudia e tuari henidia. Gilead taudia ese Efraim taudia e ala-ala henidia, badina be unu Efraim taudia ese vada e gwau henidia, eto “Umui Gilead taumui na heau taumui, Efraim ena amo vada o heau, Efraim tanona ai bona Manase tanona ai o noho kavamu”.
5 Bena Gilead taudia na Ioridane sinavaina ena turu-hanai gabudia e abidia, e gimadia, Efraim taudia na basie hanai. Efraim taudia haida na e heau ema; bena idia ta eto “Mani emui kara baina turu hanai” negana ai, Gilead taudia ese e nanadaia, eto “Oi Efraim tauna a?” Bena ia eto “Lasi” negana ai,
6 idia ma eto “Aogwa Shibboleth”. Bena ia na eto “Sibboleth”, badina be igwaurai-maorona na malana se heḡereḡere. Bena e dabaia tao, e alaia mase, Ioridane sinavaina ena turu-hanai gabudia ai. Una negana ai Efraim taudia gerebu-hani daha-ma e mase.
7 Iefeta na Israel taudia e hahemaoro henidia, laḡani tauratoi. Bena Iefeta, tau Gilead, e mase; iena hanua ai e guna, Gilead ai.
Hahemaoro taudia haida
8 Iefeta murinai Betelehem tauna ta ladana Ibisan ese Israel ai e hahemaoro.
9 Natuna mamaruanedia na toi-ahui, bona natuna hahinedia na toi-ahui. Natuna hahinedia toi-ahui-osi na idau iduhu taudia e henidia, bae adavadia; bona idau iduhu taudia natudia hahinedia toi-ahui danu e abidia, ia natuna mamaruanedia bae adavadia. Ia ese Israel taudia e hahemaoro henidia, laḡani hitu.
10 Bena Ibisan e mase; Betelehem ai e guria.
11 Ia murinai, Sebulun tauna ta ladana Elon ese Israel ai e hahemaoro. Ia ese Israel taudia e hahemaoro henidia, laḡani gwauta.
12 Bena Elon, tau Sebulun, e mase; Aialono ai e guria, Sebulun tanona ai.
13 Ia murinai Abdon Hilele, Piratono tauna, na Israel ai e hahemaoro.
14 Ia natuna mamaruanedia na hari-ahui, bona tubuna mamaruanedia na toi-ahui; idia na doniki hitu-ahui ai e loaloava. Ia ese Israel taudia e hahemaoro henidia, laḡani taurahani.
15 Bena Abdon Hilele, tau Piratono, e mase; bena Piratono ai e guria, Efraim tanona ai. Una na Amalek taudia edia ororo ai.